Read kumam Iswilia 25 Bible Online

Iswilia 25 - kumam bible

Iswilia 25

¹“Ka jo are tie kede twomere moro i diere gi di kiko tero pido gi i ekiko, di ngangolkop ko ngolo kop ne ngat acel be etie kede raco, kede ne ngat ocelu be eli kede raco moro.

²Ka kopoore dano ngat kame kop olo, ngangolkop bino mino dano nono buto piny di oko dane i nyime kanono wel me ibelai kame poore kede gikarac kame en etimo.

³Kotwero dane ibelai ot ongwon dwogo piny; kame ekalamo ot ongwon manono udo imiunu kony mere odoko li i nyim jo.

⁴“Kur itweo dog twon kame itie tic kede pi canyo.[3]

⁵“Ka imiegu are bedo karacel di ngat acel kikom gi oko to abongo nywalo atin awobi, dako kame cware oto nono likame icuo me ot apat en kame bino mako. Omin me cware en kame bino make di ko loke edoko dako mere, di eko cobo timo ne gi dedede kame icuo poore timo.

⁶Atin awobi kame gin kibino cako nywalo bino bedo me omin mere oto ca, tetekeny ode kur toi i Isirael.

⁷Do ka omin me ngat oto nono likame mito bedo kede dako kame omin mere oto oweko, apuserut nono bino ot but joadongo i erute me bomba di eko waco negi be, ‘Omin me cwara otieko dagi mino nying omin mere dong tie i Isirael; en edagi cobo gikame epoore timo na bala omin me cwara.’

⁸Di do joadongo me bomba nono ko bino lwongo icuo nono di kiko yamo kede. Ka en eko cerededo di ewaco be en cunye likame mito bedo kede dako nono,

⁹dako nono bino yai di eko ot bute i nyim joadongo, di eko boloco amuka ki tien icuo nono, di eko ngulo lau i wange di eko waco be, ‘Manoni en gikame kotimo ne icuo kame dagi nywalo ne omin mere idwe.’

¹⁰Kobino lwongo jo me ode i Isirael lung be ‘jo me ot me icuo kame koboloco amuka ki tiene.’

¹¹“Ka cuo are ocako yi, di dako me icuo acel oko ot pi konyo cware di eko poto i kom icuo ocelu di eko kapakino kome me cuo,

¹²poore ingolunu cinge, kur ibedunu kede kisa bute.

¹³“Likame ipoorenu bedo kede kide are me misani; acel adwong atie me ateni, kede atitidi mere me timo kuo.

¹⁴Likame ipoorenu bedo kede gipim are; acel adwong atie me ateni, kede atitidi mere me timo kuo.

¹⁵Ipoorenu tic kede kide me misani kede gipim me ateni, tetekeny ibedunu kuo pi kare alac i lobo kame Rwot Rubanga wu bino mino wu.

¹⁶Pien Rwot Rubanga wu cunye dagi jo kame timo akodi gi nogo, jo kame sero jo.

¹⁷“Yutununu gikame bin jo Amalek otimo ne wu kakame iyaunu kede ki Misiri di itienu ot.

¹⁸Gin likame kibedo kede lworo i kom Rubanga, kiko suro di kiko neko jo dedede kame oudo kolanyo cen, di oudo iolunu teko wu otiek.

¹⁹Aso, ka Rwot Rubanga wu otieko mino wu wei ki peko me jokwor dedede kame oluko wu i lobo kame en ebino mino wu pi doko meru, yutununu pi neko jo Amalek pitipit, tetekeny kur doko ngatamoro bin yutuno gi i wi lobo kan. Kur wi wu wil i kom kop noni!