Read kumam Iswilia 28 Bible Online

Iswilia 28 - kumam bible

Iswilia 28

¹“Ka wun ibinunu lubo kop ka Rwot Rubanga wu, di igwokunu kiber cik mege kame ango atie mino wu tin, en ebino mino wu dwongo kalamo atekerin dedede me wi lobo.

²Lubunu kop ka Rwot Rubanga wu di ikounu bino udo winyo gi:

³“Rwot bino mino winyo i bomban wu kede i poti wu.

⁴“Rwot bino mino wu winyo me nywalo idwe atot, me udo amio, kede me nyai me doke kede romini wu.

⁵“Rwot bino mino winyo i aditai wu me alos kede i awale wu me nyongo alos me mugati.

⁶“Rwot bino mino wu winyo i gi dedede kame itimunu.

⁷“Rwot bino mino ibwonunu jokwor wu ka kisuro wu. Gin kibino wok ki bad acel ka kitie suro wu, do kibino ringo tenge kibutu di kisarakin i bad dedede.

⁸“Rwot bino mino wu winyo i lobo kame en ebino mino wu. Ebino mino wu winyo i gi dedede kame itimunu, doko da dere wu bino bedo di opong kede cam.

⁹“Ka wun igwokunu cik ka Rwot Rubanga wu di ikounu lubo yote mege, en ebino mino wu idokunu jo mege amake bala kame en etieko cikere kede butu.

¹⁰Jo dedede me wi lobo bino neno di kolwongo wu be jo ka Rwot, di lworo ko bino mako gi.

¹¹Rwot bino mino wu idwe atot, ebino mino leini wu nyai, ebino mino wu amio i lobo kame en bin ecikere but joakwari wu pi mino wu.

¹²Rwot bino yayabo ude kopong kede pie i malo di eko cwano kot i lobo wu i kare kame mitere, di eko mino winyo i gi dedede kame i timunu. Wun ibinunu kopao jame wu but atekerin apat, do likame wun ibinunu kopao kibut ateker moro.

¹³Ka wun ilubunu cik ka Rwot kame tin ango atie mino wu, di igwokunu gi kiber, en ebino mino wun itelunu wi jo i kare dedede do weko coko i dud gi; ibinunu meede ameda kede dongo do weko dwogo piny.

¹⁴Manoni bino timere ka likame iparaunu tenge ki kope kame tin ango atie ciko wu pi lubo, amoto donyo woro rubangan ace.

¹⁵“Do ka likame ilubunu kope ka Rwot Rubanga wu, i yore me wun dagi lubo cik kede iswilia mege kame tin ango atie mino wu, can kame bino poto i komu bino bedo kaman:

¹⁶“Rwot bino lamo bomban wu kede poti wu.

¹⁷“Rwot bino lamo aditai wu me mako alos kede awale wu me nyongo alos me mugati.

¹⁸“Rwot bino lamo wu likame inywalunu idwe atot, lobo wu likame bino ceko cam kiber, kede doke kede diegi wu da likame bino nyai.

¹⁹“Ilam bino bedo i kom gi dedede kame wun itimunu.

²⁰“Ka wun itimunu gikarac di ikounu dagi Rwot, en ebino cwano ne wu can alit, mielkom kede atotolun i gi dedede kame ibinunu timo, di jokwor wu ko bino neko wu pitipit ingei kare acecek.

²¹En ebino cwano ne wu tuwo di lubere aluba, kame bino guro i komu tuno neko jo dedede ki lobo kame itienu ot donyo iye pi doko meru.

²²En ebino cwano ne wu tuwo ajwio komu, musuja, tuwo adopo komu bala mac; ebino cwano yamo aliet kede ceng arieny cutucutu, kede tuwo atopo cam i poti; gin kibino guro ne wu tuno wun to.

²³Likame kot bino cwei, di piny ko bino doko tek bala nyonyo ayon.

²⁴Akaka cwano kot, Rwot bino mino apua kede asinge en acwei ki malo i komu, tuno neko wu.

²⁵“Rwot bino mino jokwor wu bwono wu; ibinunu beo ki tucel me ot suro gi, do ibinunu ringo tenge kibut gi i bad dedede. Di jo me atekerin dedede me wi lobo ko bino bedo kede lworo ka kineno gikame otimere ne wu.

²⁶Liele wu bino doko giacama ne winy kede leini me wi lobo, doko da likame tie ngatamoro kame bino riamo gi tenge kiye.

²⁷Rwot bino cwano ne wu giakwoti bala kame bin etimo ne jo me Misiri; ebino coro buge i komu, nyac kede gwenyu kalikame bino cango.

²⁸Rwot bino mino idonyunu poi, wangu da bino totoun, kede wi wu da bino babangun.

²⁹Ibinunu rarapo yongayo i dier iceng bala imuduka, jo kame piny col negi nakanaka, do likame ibinunu twero udo yongayo; jo bino donyo yeyeto wu di kiyako wu, do likame tie ngatamoro kame bino konyo wu.

³⁰“Icuo bino nero nyako me anyoma, do icuo apat en abino buto kede. Ibino gero ot, do likame ibino bedo iye. Ibino puro poto me olok, do likame ibino bilo anyakini mere.

³¹Kobino ngolo twon ni i nyimi, do likame ibino bilo ringo mere. Kobino peno punda ni di ida ineno, di likame oko dwoko ni. Kobino mino romini ni but jokwor, do likame tie ngatamoro kame bino konyi.

³²Kobino mino awobe kede anyira wu but jokumbor bala ipasoi, di wuda itienu neno; ceng dedede ibinunu ciko wangu i yongayo daro dwogo gi, do likame tie gimoro kame ibinunu twero timo.

³³Jo kalikame ingeunu en kame bino tero cam dedede kame wun icanenu puro; gin kibino tero wu kirac kede gero.

³⁴Kame inenunu can nogi dedede, wi wu bino dubere.

³⁵Rwot bino coro giakwoti alit kalikame cango i tienu; giakwoti bino mwono tienu tuno i wi wu.

³⁶“Rwot bino tero wu karacel kede abaka wu i lobo me kumbor, kakame wun akadi bin joakwari wu likame ngeo; ki kunono ibinunu donyo woro rubangan kobedo yen kede ingaroi kame kopao.

³⁷Ibinunu doko gikame kelo ne jo lworo, gi me apor kede me ayama i diere me atekerin kame Rwot bino sarakino wu iye.

³⁸“Ibinunu cuno kodi atot i poti wu, do ibinunu udo kac atitidi, pien obonyo bino camo gi.

³⁹Ibinunu puro poti me olok di ikounu gwoko gi kiber da, do likame ibinunu ngwedo anyakini gi akadi bilo bwini kame wok kiye, pien kudiling bino camo gi.

⁴⁰Ibinunu bedo kede yen olibeti i kabedo dedede me lobo wu, do likame ibinunu sut kede mo me olibeti, pien anyakini gi bino ony piny.

⁴¹Ibinunu bedo tie kede idwe awobe kede anyira, do likame gin kibino dong meru, pien jokwor bino mako gi di kiko tero gi bala mabus.

⁴²Obonyo bino camo cam wu atie i poti kede yen dedede.

⁴³“Jokumbor atie i diere wu bino dongo, do wun ibinunu meede ameda dok piny.

⁴⁴Gin kibino bedo kede jame kame kitwero kopao wu, do wun likame ibinunu bedo kede gimoro kame itwerunu kopao gi; gin en kame kibino telo wu di wun ikounu dong cen i dud gi.

⁴⁵“Can nogi dedede bino poto i komu di kiko guro i komu tuno wun dedede to, pien udo likame ilubunu kop ka Rwot Rubanga wu, i yore me gwoko cik kede iswilia mege kame en eciko ne wu.

⁴⁶Gin kibino bedo bala anyut kede ikwenyar butu kede but ikwae wu pi kare dedede.

⁴⁷Rwot omio wu jamini atot twatwal, do likame wun ikounu tic nen kede yomcuny kede kilel,

⁴⁸pi manono, nataman ibinunu tic ne jokwor kame Rwot bino cwano i komu. Kec kede orio bino neko wu, doko ibinunu ot nono, ibinunu bedo li kede gi dedede. En ebino tero wu kirac kede gero tuno wun dedede to.

⁴⁹Rwot bino kelo ateker moro ki kakabor, ki ajikini me wi lobo di gin kiko core i komu; manono bino bedo ateker kalikame wun ingeunu leb mere.

⁵⁰Gin kibino bedo jo ali kede kisa, jo kalikame bino nyuto wor but ngatamoro, joatino amoto joadongo.

⁵¹Gin kibino tero doke wu kede cam kame ipurunu, di wun ikounu bino to kec. Likame kibino weko ne wu engano moro, amoto bwini, amoto mo me olibeti; akadi kiton doke kede romini; manono ko bino mino itounu.

⁵²Gin kibino suro wu i bomban dedede atie i lobo kame Rwot Rubanga wu bino mino wu, di apama aboco me cel kame wun iketunu iye gen wu ko bino kayamakin.

⁵³“Kame jokwor wu olukaro bomban wu, gen wu bino kwanyere di ikounu donyo camo kiton idwe wu kame Rwot Rubanga wu omio wu.

⁵⁴Akadi icuo amwol kame oudo kobedo gwoko kiber tuno en dongo bino cocolo wange pi cam but omin mere kikokome, dako mere me amara kede but idwe mege apwodi odong.

⁵⁵En ebino twono gi ringo me atin mere kame en etie camo, piento en engeo be likame gimoro bobo bino dong nen, bala kame udo do etieko rwenyo kede gen pi kite kame jokwor oluko kede bomban wu.

⁵⁶Akadi dako amwol kame oudo kobedo gwoko kiber tuno en dongo, dako kalikame pwodi tiene obilo nyono piny abongo amuka, bino cocolo wange pi cam but cware me amara, but wode kede but nyare.

⁵⁷En ebino twono gi ringo me atin mere mukeru kede biero mere me nywal ka etie camo gi, bala kame udo do etieko rwenyo kede gen pi kite kame jokwor oluko kede bomban wu. En ebino camo gi i mung pien udo gi ace acamere do li.

⁵⁸“Ka wun likame ilubunu kiber kope dedede me iswilia kame kowandiko i itabu noni, kede ka likame ibedunu kede wor i kom nying Rwot Rubanga wu, en nying atie kede dwongo kede kame poore alwora,

⁵⁹en ebino cwano i komu kede i kom ikwae wu can alit kalikame gengere, kede tuwo kalikame cango.

⁶⁰En ebino cwano ne wu bobo tuwo areco kame bin omako wu i Misiri, di tuwo nogo ko bino guro i komu.

⁶¹En ebino da cwano ne wu can kede tuwo apat kalikame kowandiko i itabu noni me iswilia, tuno wun to.

⁶²Bed bala itotunu bala acer me malo, do jo anonok kenekene en kame bino dong, pien udo likame ilubunu kop ka Rwot Rubanga wu.

⁶³Bala kame cuny Rwot obedo yom kede pi mino wu mulem kede mino wu nyai, kamanono da cuny Rwot bino bedo yom dudubo kede muducaro wu; en ebino puto wu tenge ki lobo kame itienu donyo ot bedo iye bala meru.

⁶⁴“En ebino sasaro wu i diere me atekerin apat, cako ki ajikini me wi lobo tetucel tuno tetu ocelu; ki kunono ibinunu donyo tic ne rubangan kobedo yen kede ingaroi kame kopao, rubangan kame wun kiton joakwari wu likame ingeunu.

⁶⁵Likame ibinunu bedo kede anapakin i diere me atekerin nogo, likame ibinunu bedo kede kabedo kibecokina bedo meru; Rwot bino mino wu ibedunu jo kame tie kede par, jo kame kony gi li, kede jo kame li kede gen.

⁶⁶Kuo wu bino bedo di otagalakin atagalakin; iwor kede iceng ibinunu bedo kede twon lworo, di likame itienu kede gen moro i kom kuo wu.

⁶⁷Odiko acelacel ibinunu paro be koto piny obunyo yuto; doko da otieno acelacel ibinunu paro be koto piny obunyo ru. Manoni bino timere pi lworo atie i cunyu kede pi gikame wangu bino neno.

⁶⁸Rwot bino dwoko wu Misiri kede emeri, sapali kame oudo en ecikere be likame doko ibinunu rucakino. Ki kuno dano bino jalere catere but jokwor bala epasoit amoto apasoit, do likame tie ngat kame bino wilo wu.”