Read kumam Iswilia 3 Bible Online

Iswilia 3 - kumam bible

Iswilia 3

¹“Kakame wan bin okounu lokere kede ot tetu malo i yongayo kame oto Basan, Abaka Og me Basan oko bino kede isirikalen mege dedede pi yi kede wa i nget bomba me Ederei.

²Rwot oko waco nango be, ‘Kur ilwore, pien ango ayaro mine i cingi, karacel kede jo mege kede lobo mere. Tim ne bala kame bin itimo ne Abaka Sikon me jo Amor kame bin pugo Kesibon.’

³“Aso Rwot Rubanga wa bin da oko mino Abaka Og me Basan karacel kede jo mege dedede i cing wa, di wan okounu neneko gin dedede abongo weko akadi dano acel.

⁴I kare nono wan bin okounu mano bomban mege dedede; likame tie bomba moro akadi acel kame wan bin likame okounu mano. Wan bin omaunu bomban ot kanyape, manono en adul me Arugob lung, piny kame bin Abaka Og me Basan pugo.

⁵Bomban nogi dedede bin kocelo kede apama abor malo di kitie kede irutei kame cegere tien are di koridakino gi kede ari me lilime. Doko da bin calere tie tot atota kalikame kocelo.

⁶Wan bin okounu muducaro gin dedede bala kame bin otimunu ne Abaka Sikon me Kesibon; i bomba acelacel bin onenekunu cuo dedede, mon, kede idwe.

⁷Do doke, diegi, kede romini, karacel kede jamini kame bin oyakunu i bomban nogo wan bin okounu tero.

⁸“Aso i kare nono wan bin okounu gamo kibut abakai are nogo me jo Amor, lobo kame tie i bad tetu kide me ecilet me Yorodan, cako ki ecilet me Arunon tuno i moru me Kerimon.

⁹(Jo Sidon lwongo moru me Kerimon be Sirion, do jo Amor lwonge be Senir.)

¹⁰Wan bin omaunu adul kame Abaka Og me Basan pugo dedede: bomban kame bin tie i lobo kotingere malo di epetere bala emesa, adulion me Gilead kede me Basan, kiton tuno i bomban me Saleka kede Ederei i bad tetu kide.”

¹¹(Abaka Og me Basan en kame do oudo pwodi odong kikom jo Repaim. Itanda mere oudo kotimo kede nyonyo; boro mere oudo tie mita ongwon, kede laco mere oudo noko mita are di opimo kede gipim kame komoko. Itanda nono pwodi kokaruno neno i bomba me Raba me jo Amon.)

¹²“Kakame wan bin otiekunu mano kede lobo kame oudo tie i bad tetu kide me Yorodan, ango ako mino jo me ekeko ka Ruben kede jo me ekeko ka Gad adul kame bin tie i bad tetu malo me bomba me Aroer, kame tie i nget ecilet me Arunon, karacel kede dul tucel me Gilead, en piny kobedo mori mori, kiton bomban mege.

¹³Ango di ako mino dul me jo me ekeko ka Manase lobo me Gilead kame bin odong, kede piny me Basan dedede, kakame oudo Abaka Og pugo, manono en adul me Arugob lung.” (Adul me Basan nono dedede bin kolwongo be lobo me jo Repaim.

¹⁴Yair, dano me ekeko ka Manase oko bin tero adul me Arugob lung, manono en Basan, kiton tuno i apokini kede adul me Gesur kede adul me Maka. En eko cako ne calere nogo nyinge, omio kolwongo calere nogo tuno tin be calere ka Yair.)

¹⁵“Ango bin ako mino Gilead but jo ka Makir wot ka Manase.

¹⁶Jo me ekeko ka Ruben kede jo me ekeko ka Gad ango bin ako mino adul kame cakere ki Gilead kiton tuno i ecilet me Arunon. Cuny ecilet nono en kame bin obedo apokini gi i bad tetu piny, kede i bad tetu malo ecilet me Jabok en kame bin poko gi, en da kame bin ebedo ikor kede jo Amon.

¹⁷I bad tetu tim, adul me jo me ikekon adek nogi bin tuno i ecilet me Yorodan; cako ki nam me Galilaya i bad tetu malo tuno i Nam Oto kame tie i bad tetu piny, doko oudo etuno i dud moru me Pisiga i bad tetu kide.

¹⁸“I kare nono bin ango ako waco ne cuo me ikekon ka Ruben, Gad, kede dul me jo me ekeko ka Manase be, ‘Bed bala Rwot Rubanga wu otieko mino wu lobo noni pi wun bedo iye, isirikalen wu dedede poore mak jamini me yi di gin kiko ngolo ecilet kitel anyim ne imiegu gi pi konyo gi mano lobo kame kibino bedo iye.

¹⁹Mon wu, idwe wu, kede leini (ango angeo be wun itienu kede leini atot) bino dong i bomban kame ango atieko mino wu.

²⁰Wun miero ikonyunu jo me Isirael wadu tuno gin mano lobo kame Rwot tie mino gi i bad tetu tim me ecilet me Yorodan, tuno di Rwot omio gi kidonyo bedo kunono kede anapakin, bala kame etieko timo ne wun. I cen mere di do wun ikounu dwogo i lobo noni kame ango atieko mino wu.’

²¹“I kare nono da ango bin ako waco ne Yosua be, ‘In itieko neno kede wangi gi dedede kame Rwot Rubanga ni otieko timo ne abakai are nogo, Sikon kede Og; doko en ebino timo kamanono ne jo dedede kame wun ibinunu ngolo ecilet donyo i lobere gi.

²²Kur ilworunu gi, pien Rwot Rubanga wu en kame yi piru.’

²³“I kare nono bin ango ako ngangao Rwot be,

²⁴‘Okwe Rwot Rubanga, in pwodi icako acaka nyuto nango ngatic ni, teko kede twer kame in itie kede. Likame tie rubanga moro i malo arabo i piny kame karuno timo jamini me twer kame cal bala kame in itieko timo.

²⁵Akwai imia angol ecilet me Yorodan loka tuca di ako neno lobo amio kame tie loka tetu nono, piny acil kobedo mori mori nono karacel kede mori me Lebanon.’

²⁶“Do Rwot bin oko lilo keda pi wun di eko dagi winyo kwac na. En eko waco na be, ‘Winyo kope ni oroma! Kur imed waco na kop nono bobo!

²⁷Oti iko yito i wi moru me Pisiga di iko ngoloro bad tetu dedede, bad tetu malo kede bad tetu piny, bad tetu kide kede bad tetu tim. Ngic lobo nono kiber, pien in likame ibino ngolo ecilet me Yorodan.

²⁸Do mi Yosua cik. Mie nwangcuny kede teko, piento en ebino telo jo ngolo loka tetuca di eko mino gi kimao lobo kame in ibino neno nono.’

²⁹“Aso wan bin okounu dong i aditot kame pimere kede bomba me Betepeor.”