Read kumam Iswilia 30 Bible Online

Iswilia 30 - kumam bible

Iswilia 30

¹Musa oko waco ne jo me Isirael be, “Nan ango atie mino wu yero jamini are: winyo kame Rwot bino mino wu arabo can kame en ebino keto i komu ka idagenu. Kame gikame ango awaco ne wu nogi dedede otimere ne wu, i kare kame itienu bedo kede kumbor kakame Rwot bino riamo wu iye, ibinunu yutuno gikame ango amio wu yero.

²Ka di do wun kede idwe wu ikounu dok but Rwot Rubanga wu, di ikounu lubo kede cunyu lung cik mege kame tin ango atie mino wu,

³Rwot kisa bino make i komu di eko dwoko ne wu kuo aber kame oudo itienu kede; en ebino coko wu ki diere me atekerin apat di eko dwoko wu.

⁴Akadi bed bala oudo kosarakino wu tuno i ajikini me lobo, Rwot bino coko wu ki kuno di eko dwoko wu.

⁵Rwot bino dwoko wu i lobo kame bin obedo me ka joakwari wu di lobo nono ko bino doko meru; en ebino mino wu twon mulem di ikounu bino nyai kalamo bin joakwari wu.

⁶En ebino mino cunyu kede cuny ikwae wu bedo kede wor bute, tetekeny wun ikounu bino mare kede cunyu lung, kede kuo wu lung, di ikounu bino kuo.

⁷Rwot Rubanga wu bino lokere keto can nogo i kom jokwor wu kede joading wu kame tidilo wu.

⁸Di do wun bobo ikounu bino yei winyo kop mere, di ilubunu cik mege kame tin ango atie mino wu.

⁹Di Rwot Rubanga wu ko bino timo ne wu bero i gi dedede kame wun itimunu; ibinunu nywalo idwe atot, leini wu bino nyai, doko da poti wu bino ceko cam atot. Cunye bino bedo yom mino wu mulem bala kame bin cunye obedo yom kede pi mino joakwari wu mulem.

¹⁰Do miero wun kong iwinyunu dwane di ilubunu cik mege kame kowandiko i itabu me iswil. Ipoorenu lokere bute kede cunyu lung.

¹¹“Cik kame tin ango atie mino wu likame tek teko kame mio lube bwono wu. Doko niang i kom gi da yoyot.

¹²Likame etie malo amio koto ipenyerenu be, ‘Ngai kame bino ot malo ome ne wa, tetekeny owinye di oko lube?’

¹³Doko da likame etie loka nam en amio koto ipenyerenu be, ‘Ngai kame bino ngolo nam ot ome ne wa tetekeny owinye di oko lube?’

¹⁴Li, en kom etie iyapiyapi kede wu; etie i dogu kede i cunyu. Aso, lubenu.

¹⁵“Nenunu, tin ango acibo i nyimu kuo kede mulem; to kede can, tetekeny wun iyerunu gi acel.

¹⁶Ka wun ilubunu cik ka Rwot Rubanga wu kame ango atie mino wu tin, i yore me wun mare, lubo yote mege kede iswilia mege, ibinunu kuo di ikounu nyai idokunu tot, di Rwot ko bino mino wu winyo i lobo kame itienu ot donyo di ikounu bedo iye bala meru.

¹⁷Do ka idagunu winyo kop mere di ikounu parao donyo woro rubangan ace kede tic negi,

¹⁸atuco ne wu kakaler tin be kobino neko wu; likame ibinunu tero kare alac i lobo kame itienu ngolo ecilet me Yorodan di ikounu ot bedo iye bala meru.

¹⁹Atie lwongo malo kede lobo pi bedo ijurak be, tin ango acibo i nyimu kuo kede to, winyo kede ilam ka Rubanga. Yerunu kuo tetekeny wun kede idwe wu ibedunu kuo.

²⁰Marunu Rwot Rubanga wu, lubunu kope mege, bedunu jo agenere bute, di wun karacel kede ikwae wu ikounu bino bedo kuo pi kare alac i lobo kame bin Rwot ocikere pi mino joakwari wu: Aburaam, Isaka kede Yakobo.”