Read kumam Iswilia 31 Bible Online

Iswilia 31 - kumam bible

Iswilia 31

¹Kakame Musa otieko yamo kede kope nogi ne jo me Isirael,

²en eko waco negi be, “Nan mwaka me dongo nango otieko tuno tol acel kede ot are. Nataman ango ali do kede teko me lole bobo. Doko medo i wi manono, Rwot otieko waco na be likame ango abino ngolo ecilet me Yorodan.

³Rwot Rubanga wu kikome en kame bino telo ne wu anyim ngolo Yorodan loka tuca di eko muducaro atekerin atie kunono, tetekeny wun ilunyunu bedo i lobo gi. Yosua bino bedo ngatel wu bala kame Rwot otieko waco.

⁴Rwot bino muducaro jo nogo bala kame oudo ebwono kede Sikon kede Og, gin abakai me jo Amor, di eko dudubo lobo gi.

⁵Rwot bino mino gi i cingu, di wun ikounu bino timo negi gikame mitere di ilubunu cik dedede kame ango atieko mino wu.

⁶Miero icungunu di itekunu di itienu kede nwangcuny. Kur ibedunu kede lworo but gi, pien Rwot Rubanga wu tie upere kede wu; likame en ebino ngalo wu amoto weko wu.”

⁷Musa oko lwongo Yosua di eko waco ne i nyim jo dedede me Isirael be, “Cung di itek di itie kede nwangcuny, pien in en kame ibino tero jogi ot bedo i lobo kame Rwot bin ociko pi mino joakwari gi.

⁸Rwot en kame bino telo ne wu anyim. En ebino bedo tie kede wu, likame ebino ngalo wu amoto weko wu. Aso, kur cunyi poti amoto ibed kede lworo.”

⁹Musa oko wandiko iswilia nogi di eko mino gi but josaseredoti Jolebi, gin jo kame oudo gwoko Sanduku me Isikan ka Rwot, karacel kede but joadongo me Isirael.

¹⁰En eko ciko gi di ewaco be, “Ingei buli mwakini kanyaare, i ajikini me mwaka kame koweko ne kede jo banyi, i kare me Ebaga me Kimere,

¹¹di jo dedede ocokere woro Rwot Rubanga wu i kakame en ebino yero ne wu, ibinunu somo iswilia nogi dedede ne jo me Isirael di gin kiwinyo.

¹²Ibinunu coko cuo, mon kede idwe dedede, ribo kiton jokumbor kame bedo i bomban wu, tetekeny ngat acelacel winy iswilia nogi di eko pwonyere bedo kede wor but Rwot Rubanga wu, kede di eko lubo kiber kope me iswilia nogi.

¹³Manoni bino mino ikwae wu me kare dedede kalikame ngeo iswilia ka Rwot bino winyo gi di kiko pwonyere bedo kede wor but Rwot Rubanga wu, i kare dedede kame wun ibedunu kede i lobo kame nataman ibinunu ngolo ecilet me Yorodan pi ot bedo iye di eko doko meru.”

¹⁴Rwot oko waco ne Musa be, “Kare me to nin otieko doko iyapiyapi. Lwong Yosua ikounu ot kede i Eema me ariamakin keda, tetekeny acibe i wang tic.” Aso, Musa kede Yosua oko ot di kiko cungo i Eema me ariamakin kede Rwot,

¹⁵di Rwot oko neeno but gi i nget ekeko me Eema i cal me edou kocungo bala epir.

¹⁶Rwot oko waco ne Musa be, “In iyapuno to, do ingei to nin jo bino weka di kiko donyo woro rubangan mogo apat, rubangan me lobo kame gin kitie ot iye; gin kibino weka di kiko turo isikan kame ango oudo atimo kede gi.

¹⁷Ka manono otimere, gero bino maka i kom gi di ako weko gi di likame bobo kiko twero neno wanga; abino muducaro gi pi gero na. Peko atot bino poto negi di kiko bino waco be, ‘Mam peko gi tie poto ne wa pien likame Rubanga wa doko tie kede wa?’

¹⁸I kare nono ateteni ango abino jalo gi pi gikarac kame gin kitimo me lokere donyo woro rubangan ace.

¹⁹“Pi manono, nan wandiko wer kame ango atie mino wu, di in Musa iko pwonyo jo me Isirael iye tuno gin make kede wi gi, tetekeny ebed bala ijura na i kom kop amako gi.

²⁰Pien kame ango atieko tero gi i lobo alac di mio, kame bin ango acikere di akwongere pi mino joakwari gi, gin kibino daga di kiko turo isikan na kede gi.

²¹Pi tim gi nono, ka peko adongodongo oko poto negi, wer noni bino bedo bala ijura apido gi, pien wi ikwae gi likame bino wil iye. Pien ango nan angeo cuto gikame tam gi bino lengere timo, akadi di pwodi likame atero gi i lobo kame bin ango acikere di akwongere pi mino gi.”

²²Cenge nono Musa oko wandiko wer nono di eko pwonyo jo me Isirael iye.

²³Di Rwot oko cibo Yosua wot ka Nun i wang tic di ewaco be, “Cung di itek kede nwangcuny, pien ibino telo jo me Isirael donyo i lobo kame ango acikere pi mino gi; ango abino bedo tie kedi.”

²⁴Musa oko wandiko Iswilia ka Rubanga dedede i itabu abongo weko gimoro ooko.

²⁵Di do eko waco ne josaseredoti Jolebi kame bin yeo Sanduku me Isikan ka Rwot be,

²⁶“Terunu itabu me Iswil noni di ikounu kete i nget Sanduku me Isikan ka Rwot Rubanga wu; poore edong kunono bala ijura kame pido wun jo mege.

²⁷Pien ango angeo be wun jo me Isirael ibedunu joepali kede jojemo. Pien ka ber wun ijemunu ne Rwot di pwodi ango atie akuo, do ka ato ibinunu do jemo kalamo kano tien adi!

²⁸Cokunu joadongo me buli ekeko kede jotel dedede i nyima, tetekeny ango awac kope nogi di gin kiwinyo, di ako bino lwongo malo kede lobo pi bedo ijurak apido gi.

²⁹Pien ango angeo be ingei ango to, wun ibinunu bilor di ikounu weko timo gikame ango aciko ne wu pi timo. Di do i cen mere peko ko bino poto ne wu, pien udo iwangunu cuny Rwot i yore me wun timo gikame rac i wange.”

³⁰Di do Musa oko waco kope atie i wer cako i agege mere tuno i ajikini mere. Kope mege tie kaman: