Read kumam Iswilia 33 Bible Online

Iswilia 33 - kumam bible

Iswilia 33

¹Magi en winyo kame Musa, ngat kobedo dano ka Rubanga, okwao ne jo me Isirael di pwodi likame eto.

²Rwot obino ki moru me Sinai; en ewok bala ceng di eko rieny ki Seir i kom jo mege; rieny mere owok ki moru me Paran. Imalaikan tutumia tomon oudo tie kede, i bade tetu cam oudo tie iye mac aliel.

³Rwot maro jo mege, jo mege tie i cinge. Aso, gin kiriebere i tiene, di kilubo gikame en eciko negi.

⁴Ango amio wu Iswil ka Rubanga, en ebedo gikame pire dwong twatwal kame ateker me Isirael tie kede.

⁵Rwot oko doko abaka me jo mege me Isirael, kakame jo me ikekon dedede me Isirael kede jotel gi ocokere kede karacel.

⁶Musa oko waco kop i kom jo me ekeko ka Ruben be, “Akwao kur jo me ekeko ka Ruben tiek atwal atwala, do kidong di kinonok nakanaka.”

⁷I kom jo me ekeko ka Yuda en eko waco be, “Rwot, okwe winy koko gi; dwok gi di iko ribo gi kede jo me ikekon apat. Rwot, mi gi kibed tek, kony gi yi kede jokwor gi.”

⁸I kom jo me ekeko ka Lebi en eko waco be, “Rwot, nyut mit nin kibut jotic ni agenere, gin Jolebi, ka gin kitio kede Urim kede Tumim. In bin itamo gi i Masa, bin icerededo kede gi i dog pii me Meriba.

⁹Gin kiko nyuto wor adwong buti, kalamo wor kame gin kimio but jonywal gi, imiegu gi kede but idwe gi. Gin kilubo cik nin, doko da kigwoko isikan kame in itimo kede jo me Isirael.

¹⁰Gin kibino pwonyo ikwae ka Yakobo cik nin; kibino pwonyo jo me Isirael Iswilia nin. Gin kibino dunyo odok angwe kur i nyimi; kibino wango giayala buti i wi alutari nin.

¹¹Rwot, okwe mi winyo i kom jamini gi, yei gamo tice gi. Bwon jokwor gi kede jo kame dagi gi atwal atwala, tetekeny kur kicatuno bobo.”

¹²I kom jo me ekeko ka Benjamin en eko waco be, “Man en jo me ekeko kame Rwot maro, gin kibedo abongo peko moro i nget Rwot; Rwot gwoko gi i kare dedede, doko en ebedo i diere gi.”

¹³I kom jo me ekeko ka Yosepu en eko waco be, “Akwao Rwot emi winyo i kom lobo me jo me ekeko ka Yosepu; emi toyo kame wok ki malo bwonge, kede eko mino pii atie piny i dud lobo tutucun iye.

¹⁴Emi lobo nono winyo me bedo tie kede anyakini mogo kame ceng ceko, kede da kodere mogo kame cek duwe kede duwe.

¹⁵Akwao be mori gi kobedo tie cako anakacia bed tie kede anyakini abeco; imukuran gi abeco nakanaka bed tie kede anyakini atot.

¹⁶Akwao lobo gi pong kede gi dedede abeco kame lobo woto, ebed tie kede bero me ngat kame bin oneeno i abum atie liel. Akwao winyo noni bed i wi jo me ekeko ka Yosepu, piento en oudo ebedo ngatel kikom imiegu mege.

¹⁷Dwongo kame Yosepu tie kede cal bala me twon kobedo nywal kao. Teko mere rom bala me tung jobi. Pi teko mere nono en ebino riamo atekerin apat tuno i ajikini me lobo; jo kobedo teko mere nono en jo tutumian me Manase kede jo tutumian kede tutumian me Epuraimu.”

¹⁸I kom jo me ekeko ka Sebulun kede me Isakar en eko waco be, “Akwao be jo me ekeko ka Sebulun ud abar i tic gi me ot cato wil i name; doko da abar me jo me ekeko ka Isakar ko nyai i miere gi.

¹⁹Gin kibino lwongo jo apat pi bino i wi moru; di kiko mino giayala atie kakare ki kuno. Gin kiudo abar gi ki nam kede ki asinge me dog nam.”

²⁰I kom jo me ekeko ka Gad en eko waco be, “Pakunu Rwot, en ngat kame bino nyano adul kame itienu iye! Gad bedo kuno bala engu atie kuro gimoro, pi puto bade amoto pakaro cogo me wie.

²¹Kakame jotel me jo me ikekon apapat me Isirael ocokere kede karacel, gin kiko mine lobo aber kalamo; manono oudo obedo iner me ngatel. En etimo gi kopoore kame Rwot mito, elubo iswilia kame Rwot omio jo me Isirael.”

²²I kom jo me ekeko ka Dan en eko waco be, “Dan cal bala atin me engu; en ebino donyo yai ki kapwono mere Basan di eoto suro jokwor mege.”

²³I kom jo me ekeko ka Naputali en eko waco be, “Rwot otimo ne Naputali bero adwong, en epong kede winyo ka Rwot; lobo gi yai ki nam me Galilaya dok tetu piny.”

²⁴I kom jo me ekeko ka Aser, en eko waco be, “Jo me ekeko ka Aser tie kede winyo kalamo jo me ikekon apat; akwao be Rubanga maru kalamo jo me ikekon apat, doko da akwao be lobo wu nyak ne wu olibeti di tot tetekeny ibedunu kede mo atot twatwal.

²⁵Bomban wu ibinunu cego erute gi kede lilim me nyonyo ayon kede buronsi pi gwoko gi; doko ibinunu bedo abongo peko moro pi kare me kuo wu lung.”

²⁶Okwe wun jo ka Rubanga, likame tie rubanga moro kame cal bala meru; en eringini piny kede idoun pi konyo wu bala ngat aringo kede asigira ot yi.

²⁷Rubanga ngat kame bedo nakanaka en ngagwok wu cinge tie ne wu bala agang. En eriamo jokwor kame oudo tie i nyimu eko yabo ne wu yongayo, di eko waco ne wu pi neneko gin dedede.

²⁸Aso, jo me Isirael nan tie kede anapakin, ikwae ka Yakobo nan bedo abongo gimoro alolo gi i lobo kame engano kede bwini tot iye, kakame toyo kame poto ki malo bwongo lobo mere.

²⁹Okwe, Isirael in itie kede winyo! Likame tie ngatamoro kame cal bala in, ateker kame Rwot en kolako. Rwot obedo ebuku kede epima nin, pi gwoki kede pi mini bwono yi. Jokwor ni bino bino buti kwano kisa, di in iko bino nyonyono ngei gi.