Read kumam Iswilia 4 Bible Online

Iswilia 4 - kumam bible

Iswilia 4

¹Di do Musa oko waco ne jo be, “Jo me Isirael, lubunu iswilia kede cik kame ango atie pwonyo wu pi gwoko, tetekeny ibedunu kuo di ikounu donyo i lobo kame Rwot Rubanga ka joakwari wu tie mino wu, di ikounu bedo iye.

²Kur imedunu kop moro i kom kop kame ango aciko ne wu, doko kur ikwanyunu kop moro tenge, do gwokunu cik ka Rwot Rubanga wu kame ango atieko mino wu.

³Wun kikom wu itiekunu neno gikame Rwot bin otimo i moru me Peor; kite kame Rwot Rubanga wu oneneko kede jo dedede i diere wu, jo kame bin woro rubanga Baal,

⁴do wun jo kame bin ikounu meede kede geno Rwot Rubanga wu pwodi tin itie ikuunu dedede.

⁵“Nenunu, ango atieko pwonyo wu iswilia kede cik ka Rwot Rubanga na bala kame en oudo ecika kede. Lubunu gi i lobo kame itienu ot donyo iye pi doko meru.

⁶Gwokunu gi, doko ketunu cunyu lubo gi, pien manono en kame bino nyuto ne atekerin apat rieko kede niang atut kame wun itienu kede. Kame gin kiko winyo iswilia nogi dedede, gin kibino waco be, ‘Ateteni jo me ateker adwong noni riek doko kitie kede niang kame tut!’

⁷“Likame tie ateker moro ace, akadi di edwong benyo, kame rubanga gi iyapiyapi kede gi bala Rwot Rubanga wa i kare dedede kame wan okok kede bute.

⁸Doko likame tie ateker moro ace, akadi di edwong benyo, kame tie kede iswilia kopoore bala magonogi dedede kame tin ango atieko pwonyo wu.

⁹Do nenunu be igwokerenu twatwal, tetekeny kur imiunu wi wu wil kede gikame wun inenunu kede wangu, doko kur imiunu gi kiyai ki cunyu pi kare me kuo wu lung. Tatamunu gi but idwe wu kede but ikwae wu,

¹⁰kite kame wun bin icungunu kede i nyim Rwot Rubanga wu i moru me Sinai, kakame Rwot bin owaco nango kede be, ‘Cok na jo i nyima. Ango amito gin kiwiny kope kame ango ayaro waco, tetekeny gin kipwonyere bedo kede lworo buta tek di pwodi gin kitie i wi lobo, doko kiko bino pwonyo idwe gi da timo kamanono.’

¹¹“Wun bin ikounu ot di ikounu cungo i dud moru di mac birano iye eoto malo i edou, di yiro kame pek di ecol cucucuc oume.

¹²Di Rwot bin oko yamo kede wun ki mac nono. Wun bin iwinyunu dwane do likame inenunu gimoro; iwinyunu kenekene dwan kame tie yamo.

¹³En bin eko waco ne wu kop me isikan mere, kame en eko ciko wu pi gwoko, manono en cik tomon kame en eko wandiko i kom kide are abatal.

¹⁴Di i kare nono Rwot oko cika pi pwonyo wu iswilia kede cik dedede kame wun poore ilubunu i lobo kame wun iyapununu donyo iye di ikounu mane edoko meru.

¹⁵“Bala kame wun bin likame ikounu neno kede Rwot i kare kame en bin eyamo kede wu ki mac i moru me Sinai, mito igwokerenu twatwal,

¹⁶tetekeny kur itimunu dub pi timo caljwogi moro piru atie i cal me dako arabo icuo;

¹⁷cal me le moro kame tie i piny amoto cal me winyo moro kame por i malo;

¹⁸cal me gimoro kame liao alia i piny arabo me dek nam moro.

¹⁹Kame ingolorunu malo di ikounu neno ceng, duwe, acerin kede gi dedede kame tie i edou, kur cunyu wai wu woro gi di ikounu donyo timo tic ne gin. Gin kibedo jamini kame Rwot Rubanga wu otieko mino but jo apat dedede pi gin woro.

²⁰Do Rwot bin okwanyo wun ki Misiri, kakame oudo itienu iye i lieto bala agulu me cwako nyonyo, pi wun doko jo mege obe, bala kame nataman itienu kede.

²¹Rwot bin oko lilo na pi wun, di eko kwongere be ango likame abino ngolo ecilet me Yorodan pi donyo i lobo amio kame en etie mino wun pi doko meru.

²²Ango abino to i lobo noni di likame angolo loka tetuca me Yorodan, do wun iyarunu ngolo loka tetuca ikounu ot mano lobo aber nono doko meru.

²³Aso, gwokerenu kur wi wu wil kede isikan kame Rwot Rubanga wu bin otimo kede wu, doko kur itimunu cal me gimoroni kame Rwot Rubanga wu otieko gengo wu iye.

²⁴Pien Rwot Rubanga wu ka elilo ecal bala mac; en enganyeko.

²⁵“Kame wun ibedunu i lobo nono odoko kare kalac di ikounu nywalo idwe di idwe wu da oko nywalo ikwae, ka ikounu dubere pi timo cal me gimoroni me awora, manono udo itimunu gikarac i nyim Rwot Rubanga wu di ikounu mine elilo kede wu.

²⁶Ka ikounu timo kamanono, ceng atin ango alwongo malo kede piny pi bedo ijurak i komu be likame ibinunu tieko kare kalac i lobo kame itienu ngolo ecilet me Yorodan pi mane di eko doko meru. Kobino neneko wu kotieko wu pitipit.

²⁷Rwot bino sasaro wu but atekerin apat kakame jo anonok kenekene kikom wu en kame bino dong di kikuo.

²⁸Wun ibinunu donyo woro rubangan apat ki kuno, rubangan kame jo en kotimo; gin kibedo yen kede kide kame kopao, rubangan kalikame karuno neno piny arabo winyo kop, doko likame kikaruno cam amoto ngweno gimoro.

²⁹Wun ibinunu mono Rwot Rubanga wu ki kuno di ikounu ude ka imoenu kede cunyu dedede kede kuo wu dedede.

³⁰I kare me anyim ka itienu i peko, di gi nogi dedede oko timere ne wu, wun ibinunu lokere but Rwot Rubanga wu di ikounu lubo kop mere.

³¹En ebedo Rubanga kame timo jo kisa. En likame ebino weko wu atatai arabo muducaro wu, doko en likame wie bino wil kede isikan kame en kikome bin etimo kede joakwari wu di ekwongere.

³²“Penyerenu kong kop i kom kare kokato cen, sek di pwodi likame konywalo wu, cako i kare kame Rubanga ocweo kede jo i piny. Pepenyunu jo cako ki piny tetucel tuno tetu ocelu. Benyo, tie gimoro kotieko timere kame dwong bala manoni, arabo tie ngatamoro kotieko winyo gimoro kame cal bala manoni?

³³Benyo, tie jo mogo kotieko winyo rubanga moro di etie yamo kede gin ki mac bala wun di gin kiko dong di kikuo?

³⁴Benyo, tie rubanga moro kotieko tamo ot di eko kwanyo jo mogo kibut ateker ace di en eko mino gin kidoko jo mege obe, bala kame Rwot Rubanga wu bin otimo ne wu i Misiri? En bin etimo manono di etio kede twer mere adwong kede teko mere pi kelo can, kede di etimo gianena kede giaura kede yi, doko di etimo gikame kelo lworo.

³⁵Rwot onyuto ne wun gi nogi tetekeny wun ingeunu be Rwot en Rubanga, doko likame tie rubanga moro ace.

³⁶En bin emio wun i winyunu dwane di en eyamo kede wun ki malo tetekeny epwony wu me wek iikunu ikiteso wu; doko i piny kan en eko mino wun inenunu mac mere aliel, di en eyamo kede wun kiye.

³⁷En bin emaro joakwari wu en komio en eyero wun, di eko kwanyo wu ki Misiri kede twer mere adwong, en kikome,

³⁸di eriamo tenge ki nyimu atekerin kame dongodongo di kitek kalamo wun, tetekeny en eteru i lobo gin di eko mine butu pi en doko meru, bala kame etie kede tuno tin.

³⁹Aso, mito ingeunu tin doko ketenu i cunyu be Rwot en kobedo Rubanga i malo kede i piny; likame tie rubanga moro ace.

⁴⁰Poore imakunu iswilia kede cik mege kame tin ango atieko mino wu, tetekeny wun kede ikwae wu kame bino lubo wu ki cen ibedunu kiber, di ikounu dong bedo atwal i lobo kame Rwot Rubanga wu tie mino wu pi doko meru.”

⁴¹I cen mere di do Musa oko poko bomban adek i bad tetu kide me Yorodan,

⁴²tetekeny ngat koneko dano i yore me akangas, dano kalikame oudo obedo ngakwor mere, karuno ot ringo gwokere i bomban nogo. Ngat koneko dano nono bin karuno lwi ot bedo i bomba moro acel kikom magonogo di eko bwot likame koneke.

⁴³Bomban nogo bin gin en: Beser kame bin tie i wi tim i lobo kotingere malo di epetere bala emesa, pi jo me ekeko ka Ruben; Ramot kame bin tie i adul me Gilead, pi jo me ekeko ka Gad; kede Golan kame bin tie i adul me Basan, pi jo me ekeko ka Manase.

⁴⁴Musa bin oko mino jo me Isirael iswilia kede pwony ka Rubanga.

⁴⁵En bin etimo manono di gin kitieko weko Misiri di do oudo kitie i aditot kame bin tie i bad tetu kide me ecilet me Yorodan, kakame pimere kede bomba me Betepeor. Kanono oudo obedo adul kame Abaka Sikon me jo Amor pugo, en abaka kame bin pugo bomba me Kesibon. Musa kede jo me Isirael bin oudo obwone i kare kame bin kiwok kede ki Misiri.

⁴⁶

⁴⁷Gin bin kiko donyo bedo i lobo mere karacel kede lobo me Abaka Og me Basan, en abaka ocelu me jo Amor, kame bin bedo i bad tetu kide me Yorodan.

⁴⁸Lobo nono bin cakere ki bomba me Aroer kame bin tie i nget ecilet me Arunon, di eko ot i bad tetu malo tuno i moru me Sirion, manono en moru me Kerimon.

⁴⁹Oudo bin eribo adul kame tie i bad tetu kide me ecilet me Yorodan dedede kiton tuno i bad tetu piny i Nam Oto kede tetu kide i dud moru me Pisiga.