Read kumam Iswilia 5 Bible Online

Iswilia 5 - kumam bible

Iswilia 5

¹Musa bin oko coko jo me Isirael dedede karacel di eko waco negi be, “Winyunu wun jo me Isirael, iswilia kede cik kame ango atie mino wu i ceng katin, wun ibinunu siyao gi di ikounu keto cunyu lubo gi.

²Rwot Rubanga wa bin otimo isikan kede wa i moru me Sinai.

³En likame bin etimo isikan kede jonywal wa kenekene, do kede wada jo dedede kame tin otienu kan.

⁴I moru kunono Rwot bin oko yamo kede wun wang i wang, i mac.

⁵I kare nono ango en bin kame acungo i dierediere wu kede Rwot pi waco ne wu kope mege; pien wun oudo bin ilworunu mac omio likame ikounu yito i wi moru. “Rwot bin owaco be,

⁶‘Ango en Rwot Rubanga wu, ngat kokwanyo wu ki lobo me Misiri, kakame bin ibedunu iye ipasoi.

⁷“ ‘Likame ibinunu woro rubanga moro ace kwanyo ango.

⁸“ ‘Kur itimunu cal me gimoroni piru me awora, akadi cal me gimoro kame tie malo, arabo kame tie i wi lobo, amoto kame tie i pii me dud lobo.

⁹Kur ilurunu wi wu i nyim gi arabo iworunu gi; pien ango Rwot Rubanga wu abedo Rubanga kame nganyeko. Ango amio alola but jo kame daga kede but idwe gi tuno naka but ikwae me anyim me lwak me adek kede ongwon.

¹⁰Do ango anyuto amara na kalikame lokere but lwak me ikwae me tutumian kede tutumian me jo kame mara di kigwoko cik na.

¹¹“ ‘Kur itiunu kede nyinga pi timo gikarac, pien ango Rwot Rubanga wu abino mino alola but ngat kame tio kede nyinga kirac.

¹²“ ‘Poore igwokunu ceng Sabato di ikounu mine ebed ceng kacil, bala kame ango Rwot Rubanga wu atieko ciko ne wu.

¹³Ibinunu timo tice wu dedede pi ceng kanyape.

¹⁴Do ceng me kanyaare mere obedo ceng me wei, en ceng kame komio but ango Rubanga wu. Likame poore ngatamoro timo tic i ceng nono; akadi wun, idwe wu, ipasoi arabo apasoi wu, leini wu, arabo jokumbor kame tie bedo i piny wu. Ipasoi kede apasoi wu miero gida kiud wei bala wuda.

¹⁵Yutununu be wun bin ibedunu ipasoi i Misiri, di ango Rwot Rubanga wu ako kwanyo wu ki kuno kede twer adwong kede teko; pi mano, ango aciko wu pi gwoko ceng Sabato.

¹⁶“ ‘Poore dano acelacel wor papa mere kede toto mere, bala kame ango Rwot Rubanga wu aciko ne wu, tetekeny gi dedede bed ne wu kiber di ikounu tieko kare kalac i lobo kame ango atie mino wu.

¹⁷“ ‘Kur itimunu nek.

¹⁸“ ‘Kur itimunu adote.

¹⁹“ ‘Kur ikwalunu.

²⁰“ ‘Kur imiunu ijura me abe i kom ngatamoro.

²¹“ ‘Kur ingobelo dako ka ngatamoro; kur ingobelo ode, lobo mere, ipasoi arabo apasoi mege, doke mege, pundan mege, arabo gimoroni kame en etie kede.’

²²“I kare kame wun bin icokerenu kede i dud moru, Rwot bin oko yamo kede wu kede dwan amalo ki mac kede ki edou apek di ecol cucucuc. En bin eko mino wu cik nogi kenekene, di likame eko medo ace i kom gi. Di do en bin eko wandiko gi i kom kide are abatal di eko mino gi buta.

²³“Kakame wun bin iwinyunu kede dwan kame wok ki yiro kame oudo col cucucuc di mac liel i moru, jotel me ikekon wu karacel kede joadongo wu oko bino buta

²⁴di kiko waco be, ‘Neningo, Rwot Rubanga wa otieko nyuto ne wa deyo mere kede twer mere kakame wan owinyo kede di en eyamo i mac. Ceng atin wan otieko neno be Rubanga karuno yamo kede dano di dano nono pwodi ko dong kuo.

²⁵Aso, pinyo do kamio wan opoore to? Twon mac nono bino muducaro wan. Wan obino to ka bobo omedo winyo dwan Rwot Rubanga wa.

²⁶Pien ngai kotieko winyo Rubanga akuo di etie yamo i mac, bala wan, di eko dong di ekuo?

²⁷Musa, in kikomi en ioti inok kuno di iko winyo gi dedede kame Rwot Rubanga wa waco, di iko dwogo waco ne wan gikame en ewaco ni. Wan obino winyo di oko timo bala kame en ewaco.’

²⁸“Rwot bin oko winyo kope kame wun iwacunu na, di en eko waco na be, ‘Ango atieko winyo kope kame jogo owaco nin; kope dedede kame gin kiwaco tie kakare.

²⁹Ka koto gin di kiko bedo kede tam kame cal kamanoni nakanaka, tam me bedo kede lworo buta kede lubo cik na dedede, koto gi dedede obedo ne gin kiber nakanaka karacel kede ne ikwae gi.

³⁰Oti iwace gi kidoki i iemai gi.

³¹Do in Musa, dong buta kan, di ango ako bino mini cik kede iswilia dedede kame in ibino pwonyo gin, tetekeny gin kilub gi i lobo kame ango atie mino gin pi doko mergi.’

³²“Pi mano, wun miero igwokerenu di ikounu timo gikame Rwot Rubanga wu otieko ciko ne wu; likame poore iparaunu tenge kiye.

³³Wun miero ilubunu yongayo kame Rwot Rubanga wu otieko nyuto ne wu, tetekeny ibedunu kuo, di gi dedede ko bino bedo ne wu kiber, kede ikounu tieko kare kalac i lobo kame itienu ot mano di eko doko meru.