Read kumam Iswilia 6 Bible Online

Iswilia 6 - kumam bible

Iswilia 6

¹“Magi en cik kede iswilia kame Rwot Rubanga wu ocika pi pwonyo wu be ilubunu i lobo kame wun itienu ngolo ecilet me Yorodan pi mano di eko doko meru.

²I kare me kuo wu lung, wun, idwe wu kede ikwae wu, poore ibedunu kede lworo but Rwot Rubanga wu, di ikounu gwoko cik kede iswilia mege kame ango atie mino wu, tetekeny ibedunu i lobo nono tieko kare kalac.

³Pi mano, winyunu wun jo me Isirael, di ikounu keto cunyu lubo gi, tetekeny gi dedede bed ne wu kiber di ikounu nywal di wel wu ko meede adikinicel i lobo amio di lac, bala kame bin Rwot Rubanga ka joakwari wa ocikere kede.

⁴“Winyunu wun jo me Isirael! Rwot Rubanga wa en kene kame ebedo Rwot.[1]

⁵Poore imarunu Rwot Rubanga wu kede cunyu dedede, kede kuo wu lung, kede teko wu lung.

⁶Makunu i cunyu cik nogi kame tin ango atie mino wu.

⁷Bedunu pwonyo idwe wu iye. Tatamunu negi kop i kom gi ka itienu i paco amoto tenge, ka itienu buto amoto ka iyaunu ki kabuto.

⁸Tweunu gi i ngut cingu kede i tur nyimu kibed gianena kame konyo wu yutuno gi,

⁹doko wandikunu gi i kom ipirin me ikekon wu kede i kom irutei me bomban wu.

¹⁰“Rwot Rubanga wu bin ocikere but joakwari wu, Aburaam, Isaka kede Yakobo, be ebino mino wu lobo kame nataman en etie tero wu iye. Lobo nono tie kede bomban kabeco di kidongodongo, bomban kalikame wun en igerunu;

¹¹kitie kede ude kopong kede jamini kabeco kalikame wun en iketunu i ude nogo; doko kitie kede ataneko kalikame wun en ikunyunu, kede poti me olok kede me olibeti kalikame wun en ipitunu. Ka Rwot oko tero wu i lobo nono, di ikounu bedo tie kede cam dedede kame imitunu,

¹²poore igwokerenu kur imiunu wi wu wil kede Rwot ngat kolako wu ki Misiri, kakame bin ibedunu iye ipasoi.

¹³Poore ibedunu kede lworo but Rwot Rubanga wu; timunu tic ne en kene, doko kwongerenu kede nyinge kenekene.

¹⁴Kur iworunu rubangan mogo apat, rubangan me atekerin koluko wu,

¹⁵pien Rwot Rubanga wu ngat kame tie kede wu obedo Rubanga kame nganyeko. Cunye bino wang i komu di eko muducaro wu ki wi lobo.

¹⁶“Kur itamunu Rwot Rubanga wu bala kame bin itimunu i Masa.

¹⁷Miero iketunu cunyu gwoko kiber cik kede iswilia kame Rwot Rubanga wu otieko mino wu.

¹⁸Timunu gikame poore kede kame ber i nyim Rwot, tetekeny gi dedede bed ne wu kiber di ikounu ot donyo i lobo aber kame bin Rwot okwongere pire but joakwari wu be ebino mino wu pi doko meru.

¹⁹En ebino riamo tenge jokwor wu ki nyimu bala kame en etieko cikere pi timo.

²⁰“Kame idwe wu waru bino penyo wu be, ‘Pinyo komio Rwot Rubanga wa ociko wa pi lubo cik kede iswilia nogi dedede?’

²¹Wun ibinunu dwoko ne gin be, ‘Wan bin obedo ipasoi ka Abaka me Misiri, do Rwot oko kwanyo wa ki kuno kede twer mere adwong.

²²Wan bin oneno kede wang wa di Rwot timo i kom jo me Misiri, i kom abaka gi kede jotic mege dedede, gianena adongodongo kame kelo lworo.

²³En bin ekwanyo wan ki kuno tetekeny ekel wa kan di eko mino wa lobo noni kame bin en ecikere iye but joakwari wa be ebino mino wa.

²⁴Di Rwot bin oko ciko wa pi lubo iswilia nogi dedede, di oko bedo kede lworo but en Rwot Rubanga wa, tetekeny obed kiber nakanaka, di en eko gwoko wa obed kuo bala kame nataman otie kede noni.

²⁵Ka wan oketo cuny wa lubo cik nogi dedede i nyim Rwot Rubanga wa bala kame en eciko ne wa, udo otimo gi kopoore.’