Read kumam Iswilia 7 Bible Online

Iswilia 7 - kumam bible

Iswilia 7

¹“Ka Rwot Rubanga wu oko tero wu i lobo kame nataman wun itienu ot iye pi mane eko doko meru, di en eko riamo atekerin atot tenge ki nyimu, jo Kiti, jo Girigas, jo Amor, jo Kanan, jo Perisi, jo Kibi, kede jo Yebu, gin dedede atekerin kanyaare kame tek doko di kitot kalamo wu,

²ka Rwot Rubanga wu oko mino gin i cingu di wun ikounu bwono gi, poore inenekunu gin tieko gi pitipit. Kur itimunu isikan moro kede gi doko kur ibedunu kede cuny me kisa i kom gi.

³Kur inyomerenu kede gi. Kur imiunu anyira kede awobe wu nyomere kede gi,

⁴pien manono bino mino idwe wu parao tenge kiweko woro Rwot di kiko donyo woro rubangan apat. Ka manono oko timere, Rwot cunye bino wang i komu di eko muducaro wu awakawaka.

⁵Do man en gikame wun ibinunu timo ne gin: reretunu alutari gin piny, mumukunu kide gin kame kisisipo me awora, tongunu piny yen kame kosisipo me woro rubanga Asera, di ikounu wango caljwogi kame gin kiworo.

⁶Pien wun ibedunu jo ka Rubanga wu. Rwot Rubanga wu otieko yero wu kikom jo me piny lung pi wun bedo jo mege, jo kame pirgi tek kibute.

⁷“Rwot omaro wun di eko yero wu, likame pi wun bin itotunu ikalamunu atekerin apat; wun oudo ibedunu ateker katitidi twatwal kalamo atekerin apat dedede.

⁸Do en oudo emaro wu doko oudo emito cobo kwongere kame en bin etimo but joakwari wu. Manono en komio en bin ekwanyo wu kede twer adwong di eko lako wu ki bedo ipasoi ka Parao abaka me Misiri.

⁹Pi mano, poore wun ingeunu be Rwot Rubanga wu en kene kame ebedo Rubanga doko egenere. En ecobo isikan mere doko enyuto amara mere kalikame lokere but lwak me ikwae me tutumian me jo kame mare di kilubo cik mere,

¹⁰do jo kame dage en eneneko gi; manono en epone kame en eculo gin kede; en likame egal kede mino gi alola.

¹¹Pi mano, ketunu cunyu lubo cik kede iswilia kame tin ango atieko mino wu.

¹²“Ka wun ikounu winyo cik nogi di ikounu keto cunyu lubo gi, Rwot Rubanga wu bino meede kede cobo isikan mere karacel kede amara mere kalikame lokere, bala kame bin en ekwongere kede but joakwari wu.

¹³En ebino maro wu di eko mino wu winyo di eko medo wel wu. En ebino mino idwe kame wun inywalunu winyo, doko ebino mino winyo i cam kame wun ipurunu, engano wu kede bwini kede mo me olibeti wu; en ebino mino wu winyo di doke wu ko nywal kidoko tot kede romini kede diegi wu da kamanono, i lobo kame en bin ekwongere pire but joakwari wu be ebino mino wun.

¹⁴Wun ibinunu bedo jo kame komio winyo kalamo atekerin apat dedede. Likame tie ngatamoro kikom wu arabo kikom leini wu kame bino bedo abwocit arabo adonge amoto edonge.

¹⁵Rwot bino gwoko wu ki tuo dedede doko en likame ebino mino tuo areco kame bin wun inenunu i Misiri mako wu, do en ebino mino gi kimako jo dedede kame dagi wu.

¹⁶Poore imuducarunu atekerin dedede kame Rwot Rubanga wu mio i cingu, doko kur ibedunu kede cuny me kisa i kom gi. Likame ibinunu woro rubangan gin, pien manono bino bedo ne wu bala owic me mako wu.

¹⁷“Kur iwacunu i cunyu be, ‘Jo me atekerin nogi tot kalamo wa; epone mene kame wan okaruno riamo gi kede tenge?’

¹⁸Kur ilworunu gi; kenekene yutununu gikame bin Rwot Rubanga wu otimo ne Parao kede ne jo dedede me Misiri.

¹⁹Wun bin inenunu kede wangu can kotimere, gianena kede giaura, twer kede teko kame Rwot okwanyo wu kede ki kuno. Rwot Rubanga wu bino timo kamanono ne atekerin dedede kame nataman wun itienu kede lworo i kom gi nogo.

²⁰Bobo da Rwot Rubanga wu bino keto lworo i cuny gi tuno di otieko neneko kiton jo kame oudo obwot di kiko ringo ot pwono.

²¹Aso, kur ilworunu gin, pien Rwot Rubanga wu tie kede wu; en obedo Rubanga kame dwong doko epoore alwora.

²²Rwot Rubanga wu bino riamo atekerin nogi tenge ki nyimu momot momot; likame ibinunu karuno tieko gi awakawaka, pien ka itimunu kamanono, leini me obar bino doko tot twatwal di kiko donyo lolo wu.

²³Do Rwot Rubanga wu bino mino atekerin nogo i cingu; en ebino keto lworo atek i cuny gi tuno gin tiek.

²⁴En ebino mino abakai gi i cingu di wun ikounu mino nying gi rwenyo ki wi lobo. Likame tie ngatamoro kame bino karuno yi kede wu; wun ibinunu muducaro gi.

²⁵Poore iwangunu cal me rubangan gi. Kur ingobelunu siliba arabo saabu kame tie i kom rubangan nogo di ikounu tero gi pi doko megu, pien kikaruno bedo bala owic me ciko wu; pien Rwot Rubanga wu dagi tim nono.

²⁶Kur iterunu caljwogi moro i ude wu, pien ebino mino Rubanga muducaro wuda bala gin. Poore wun idagunu gi, pien gin kibedo jamini kame kopoore muducaro.