Read kumam Yokana 1 Bible Online

Yokana 1 - kumam bible

Yokana 1

¹I agege, Kop oudo tie. Kop oudo tie kede Rubanga, doko Kop oudo en Rubanga.

²En oudo etie kede Rubanga cako ki agege.

³Jame dedede riki kocweo pi en, doko likame tie gimoro i cwec kame bin kocweo abongo en.

⁴Kuo oudo tie i en, doko kuo nono en kame oudo obedo lero me jo.

⁵Lero nono rieny i colo, do likame colo obwone.

⁶Riki tie icuo kame nyinge Yokana, kame Rubanga ooro.

⁷En oudo ebino pi bedo ijura me kop i kom lero nono, tetekeny jo dedede yei pi kop mere.

⁸En oudo likame ebedo lero, do en bin ebino pi mino ijura i kom lero.

⁹Lero me ateni kame caro jo dedede oudo tie bino i piny.

¹⁰En oudo etie i piny, doko oko cweno piny pi en, di jo me piny likame oko ngene.

¹¹En oudo ebino ture kikokome, do jo mege likame oko game.

¹²Do jo dedede kame bin ogame, di oko yei nyinge, en bin emio gi twer me doko idwe ka Rubanga,

¹³kalikame konywalo kede remo, doko likame pi mit me kom arabo mit ka dano, do pi mit ka Rubanga.

¹⁴Kop oko doko dano di eko bedo i diere wa di epong kede kisa ka Rubanga kede ateni. Wan oneno deyo mere, deyo ka Wod acel kenekene kame owok kibut Papa.

¹⁵Yokana bin omio ijura i kome di elelemo be, “Man en ngat kame bin awaco kop i kome be, ‘Ngat kame tie bino i cen ngea pire dwong loa, pien oudo en etie sek di pwodi ango ali.’ ”

¹⁶Wan dedede otieko udo kisa i wi kisa, kame wok ki kisa mere kopong.

¹⁷Pien bin komio Iswil di beo kibut Musa, do kisa kede ateni bin obino di beo kibut Yesu Kirisito.

¹⁸Likame tie dano kame otieko neno Rubanga, do kwanyo Rubanga Wod acel kenekene, kame bedo iyapiyapi kede Papa, en ngat kame omie engere.

¹⁹Man en kop me ijura kame Yokana bin omio i kare kame Iyudayan ocwao kede josaseredoti kede Jolebi ki Yerusalem pi penye be, “In en ngai?”

²⁰En likame eko dagi dwoko ne gi kop, do en eko tuco kakaler di ewaco be, “Ango likame Kirisito.”

²¹Gin kiko penye be, “In do ngai? Benyo, in en Elia?” En eko dwoko be, “Li.” Kiko bobo penye be, “In do enabi?” En eko dwoko be, “Li.”

²²Gin kiko penye be, “In do ngai? Niang wa wek oud kop kame otwero dwoko ne jo kame ooro wa. Kop nyo kame makin kame in iromo waco?”

²³En eko waco be, “Ango en dwan ngat kame lelemo i tim be, ‘Rieunu yongayo ka Rwot,’ ” bala kame bin enabi Isaya owaco.

²⁴Iparisayon en kame oudo bin ooro gi.

²⁵Gin kiko penye be, “Do pinyo komio in ibatiso jo ka in likame ibedo Kirisito, amoto Elia, arabo enabi?”

²⁶Yokana oko dwoko ne gi be, “Ango abatiso jo kede pii, do tie ngat kame nan tie cungo i diere wu, kame wun likame ingeunu,

²⁷en nono en kame etie bino ki cen ngea; ango likame apoore pi gonyo ausi me amuka mere.”

²⁸Man bin otimere i Betania, i loka tetuca me Yorodan, kakame Yokana oudo bin tie batiso kiye jo.

²⁹Oru mere, Yokana oko neno Yesu di tie bino tetu bute, di eko waco be, “Nenunu Katin Romo ka Rubanga kame kwanyo dub me piny!

³⁰Man en dano kame bin ango awaco kop i kome be, ‘Tie ngat kame tie bino ki cen ngea, kame pire dwong loa, piento en oudo etie sek di pwodi ango ali.’

³¹Ango da kikoma oudo likame angee, doko gi nono en komio ango abino di abatiso jo kede pii, tetekeny en engere but jo me Isirael.”

³²Yokana oko mino ijura be, “Ango aneno Tipo Kacil di bino piny ki malo bala awele di eko dong i kome.

³³Ango da kikoma oudo likame angee; do ngat kame oora pi batiso jo kede pii oko waco na be, ‘Ngat kame inenunu Tipo Kacil obino piny di oko dong i kome, manono en ngat kame batiso jo kede Tipo Kacil.’

³⁴Ango atieko neno doko ajurao be, man en Wot ka Rubanga.”

³⁵Oru mere, Yokana oudo bobo tie cungo kede jo are kikom josiao mege.

³⁶En eko neno Yesu di tie ot, di eko waco be, “Nenunu Katin Romo ka Rubanga!”

³⁷Josiao are nogo bin owinyo di en ewaco kop noni, di do gin kiko lubo Yesu.

³⁸Yesu oko lokere di eko neno gi di kitie lube, en eko penyo gi be, “Imounu nyo?” Gin kiko dwoko ne be, “Rabi” (kame dwong mere be ngapwony), “In ibedo tuai?”

³⁹En eko waco ne gi be, “Bianu inenunu.” Gin kiko ot neno kakame oudo Yesu bedo iye; cenge no gin kiko bedo kede en, pien esawa oudo iyapiyapi romo tomon.

⁴⁰Ngat acel kikom jo are kame bin owinyo yamo ka Yokana di eko lubo Yesu, oudo obedo Anderia omin me Simoni Petero.

⁴¹Me agege, en egeo udo omin mere Simoni, di eko waco ne be, “Wan otieko udo Mesia” (kame dwong mere be Kirisito).

⁴²En eko tere but Yesu. Yesu oko nene di oko waco ne be, “In en Simoni wot ka Yokana. Kobino donyo lwongi do be Kepa” (kame dwong mere be Petero).[1]

⁴³Oru mere Yesu oko moko tam mere pi ot Galilaya. En eko udo Pilipo di eko waco ne be, “Luba.”

⁴⁴Pilipo oudo obedo dano me Betesaida, bomba kame Anderia kede Petero oudo bedo iye.

⁴⁵Pilipo oko udo Natanael di eko waco ne be, “Wan otieko udo ngat kame bin Musa owandiko kop i kome i itabu me Iswil, kede kame inabin da owandiko kop i kome, en Yesu me Nasaret, wot ka Yosepu.”

⁴⁶Natanael oko penye be, “Gimoro aber twero wok ki Nasaret da?” Pilipo oko dwoko ne be, “Bia ineni.”

⁴⁷Yesu oko neno Natanael di tie bino bute, en eko waco kop i kome be, “Ateteni man en dano me Isirael kame li kede angalo.”

⁴⁸Natanael oko penye be, “In iko ngena benyo?” Yesu oko dwoko ne be, “Ango aneni di itie i dud yat epigi di pwodi Pilipo likame olwongi da.”

⁴⁹Natanael oko dwoko ne be, “Apwony, in en Wot ka Rubanga! In en abaka me Isirael!”

⁵⁰Yesu oko dwoko ne be, “Mam in iyei pi kop kame ango awaco ni be ango oudo aneni di itie i dud yat epigi? Ibino neno gi adongodongo kalamo magi.”

⁵¹Yesu oko waco ne be, “Ateteni, ateteni awaco ni be, ibino neno malo di oyabere, kede imalaikan ka Rubanga di tie ot malo kede di kitie bino piny i kom Wot ka dano.”