Read kumam Yokana 10 Bible Online

Yokana 10 - kumam bible

Yokana 10

¹“Ateteni, ateteni awaco ne wu be, ngat kalikame donyo i anok me romini di ebeo ki erute, do eko lokere yito i kakame pat, ngat nono udo obedo ngakuwo, doko en ngayak.

²Do ngat kame donyo di ebeo ki erute, udo en ngakwai romini;

³ngadar erute yabo ne erute, doko romini winyo dwane. En elwongo romini mege kede nying gi, di eko telo gi wok ooko.

⁴Ka etieko woto romini mege dedede ooko, en eoto i nyim gi, di romini ko lube, pien gin kingeo dwane.

⁵Ka ngat apat, gin likame kiyei lubo, do kiringo tenge kibute, pien likame gin kingeo dwan jo apat.”

⁶Yesu oyamo ne gi agole noni, do gin likame kiko niang gikame en oudo etie waco ne gi.

⁷Yesu bobo oko waco ne gi be, “Ateteni, ateteni awaco ne wu be, ango en erute kame romini donyo kiye.

⁸Jo dedede kame bin ogeo bino nango oudo obedo jokuwo kede joyak; do romini likame oko winyo dwan gi.

⁹Ango en erute, ka ngatamoro odonyo ki buta ebino udo alako, doko ebino donyo kede wok ooko, di eko udo lum kolot.

¹⁰Ngakuwo bino kenekene pi kwalo, neko kede pi dudubo. Do ango abino tetekeny jo ud kuo, kuo kopong.

¹¹“Ango ngakwat aber, ngakwat aber yei rwenyo kuo mere pi romini mege.

¹²Do dano kame kopango apanga, kalikame obedo ngakwat kikome, kalikame obedo won romini, ka oneno ipeon di tie bino, en eweko romini di eko ringo tenge; ipeon ko mako romini, di romini apat ko sarakin.

¹³En eringo piento en dano kame kopango apanga, doko likame eparo pi romini.

¹⁴Ango en ngakwat aber; ango angeo romini na, doko romini na da ngea,

¹⁵bala kite kame Papa ngea kede, doko ada angeo Papa. Ango ayei rwenyo kuo na pi romini.

¹⁶Doko atie kede romini ace kame li ki anok noni; miero akel gida, di gin kiko bino winyo dwana. Gin kiko bino bedo romini me anok acel kame tie kede ngakwat acel.

¹⁷“Pi mano, Papa mara pien ango ayei rwenyo kuo na, di bobo ako bino ude.

¹⁸Likame tie ngat kame bino kwanyo kuo nango, do ango abino mino kuo na i mit na. Ango atie kede twer me yei rwenyo kuo na kede me ude; Papa na en kame omia cik noni.”

¹⁹Kope nogi bobo oko mino tam me Iyudayan opokere.

²⁰Jo atot kikom gi owaco be, “Lono tie kede jwogi, doko epoi da; pinyo komio iwinyunu kop mere?”

²¹Apat mege oko waco be, “Mage likame kope me dano kame tie kede jwogi. Jwogi twero yabo wang emuduk benyo?”

²²Oudo manono obedo kare me ebaga me kwero ceng kame komio kede tempulo but Rubanga i Yerusalem; kare me ngico oudo inonono.

²³Yesu oudo tie ot ki balasa ka Sulumani kame oudo tie i tempulo.

²⁴Iyudayan oko cokere oluke di kiko waco ne be, “Ibino mino tam wa bedo abongo kacungo pi kare arom amene? Ka in en kame Kirisito, wac ne wa kakaler.”

²⁵Yesu oko dwoko ne gi be, “Ango atieko waco ne wu, do wun ikounu dagi yei. Tice kame ango atimo i nying Papa na jura,

²⁶do wun likame iyeunu pien likame wun itienu i kom romini na.

²⁷Romini na winyo dwana, ango da angeo gi, doko gida kiluba.

²⁸Ango atieko mino gi kuo kame bedo nakanaka, doko likame kibino to. Likame tie ngat kame bino waraso gi ki cinga.

²⁹Papa na ngat kame omio gi buta pire dwong kalamo jo dedede, doko likame tie ngat kame sobolo waraso gi ki cing Papa.

³⁰Ango kede Papa otie acel.”

³¹Iyudayan bobo oko kwanyo kide pi mito didipo en kede.

³²Yesu oko waco ne gi be, “Ango atieko nyuto ne wu tice atot adongodongo kame owok kibut Papa; mene kikom gi en kame imitunu didipo ango pire?”

³³Iyudayan oko dwoko ne be, “Likame wan omito didipo in pi tic aber, do pi acae; pien in dano adana imito be idok Rubanga.”

³⁴Yesu oko dwoko ne gi be, “Mam kowandiko i Iswil wu be Rubanga owaco be, ‘Wun ibedunu rubangan?’

³⁵Do ka Rubanga olwongo jo kame bin komio kop mere be rubangan (doko di iwandik kacil likame kotwero turo),

³⁶benyo, itwerunu waco ne ngat kame Rubanga opoko tenge di eko ooro i piny be, ‘In itie cano Rubanga,’ be pien ango awaco be, ‘Ango Wot ka Rubanga?’

³⁷Ka likame atie timo tice ka Papa na, kur do iyeunu ango.

³⁸Do ka atimo gi, akadi bed bala idagunu yei ango, yeunu do tice nogo, tetekeny ingeunu di ikounu niang be Papa tie i ango, doko ada atie i en.”

³⁹Gin bobo kiko mono mako Yesu, do en eko lwi ne gi.

⁴⁰Yesu oko bobo ngolo nam me Yorodan tuno kakame bin Yokana ogeo batiso kiye jo, di eko dong bedo kuno.

⁴¹Jo atot oko ot bute di kiko waco ne be, “Yokana bin likame otimo gianena moro, do kope dedede kame Yokana owaco i kom icuo ni tie gi me ateni.”

⁴²Jo atot kame oudo tie kuno oko yei en.