Read kumam Yokana 11 Bible Online

Yokana 11 - kumam bible

Yokana 11

¹Oudo bin tie icuo kame nyinge Lasaro, kame bedo Betania, tuwo oko make. Betania oudo obedo bomba kame Maria kede amin mere Marita bedo iye.

²Maria nono en kame bin oudo owiro Rwot kede mo angwe kur, di eko weweo tiene kede yer me wie; en nono kame omin mere Lasaro oudo tuwo.

³Amiegu nogo oko cwano kop but Yesu di kiwaco ne be, “Rwot, ngawoti kame imaro tuwo twatwal.”

⁴Do kakame Yesu owinyo kede kop noni, en eko waco be, “Tuwo no likame obino pi neko Lasaro, do pi kelo deyo kakame Rubanga tie iye, tetekeny mi deyo but Wot ka Rubanga pire.”

⁵Yesu oudo maro Marita kede amin mere Maria karacel kede Lasaro.

⁶Aso, kakame ewinyo kede be Lasaro oudo tuwo, en eko meede bedo kakame oudo etie iye pi ceng are.

⁷I cen mere, Yesu oko waco ne josiao mege be, “Odokunu ber bobo Yudea.”

⁸Josiao mege oko dwoko ne be, “Apwony, kom in nyoronyoro ni Iyudayan oudo mito didipo in kede kide, pinyo komio in imito bobo dok kuno?”

⁹Yesu oko dwoko be, “Mam ceng acelacel tie kede isawan tomon kiwie are? Jo kame tie ot iceng likame buo tien gi, pien udo kineno lero me piny kan.

¹⁰Do jo kame tie ot iwor di piny col, kitwomo tien gi, pien udo lero li.”

¹¹Yesu bin owaco kop noni di eko meede kede yamo be, “Ngawot wa Lasaro do otieko nino, do ango ayaro ot cene.”

¹²Josiao mege oko waco ne be, “Rwot, ka enino ebino cei.”

¹³Aso Yesu oudo tie waco kop i kom to ka Lasaro. Lasaro oudo otieko to, do josiao oudo paro be amoto etie yamo nino me wei.

¹⁴Di do Yesu oko kenyakino ne gi be, “Lasaro otieko to,

¹⁵do ango cunya yom piru, pien ango likame oudo atie kuno, manoni otimere tetekeny iyeunu. Do wan ootunu bute.”

¹⁶Tomasi (kame bin kolwongo be Bangi) oko waco ne josiao wad gi be, “Ootunu wada wek otounu karacel kede en.”

¹⁷Kakame Yesu otuno kede, en eko udo be Lasaro oudo otieko ceng ongwon i ates.

¹⁸Betania oudo iyapiyapi kede Yerusalem, bala mairo are.

¹⁹Iyudayan atot oudo obino pi cungo ne Marita kede Maria, pi kweno cuny gi pi to me omin gi.

²⁰Kakame Marita owinyo kede be Yesu oudo tie bino, en eko ot pi riamo kede en i yongayo; do Maria oko dong bedo i ot.

²¹Marita oko waco ne Yesu be, “Rwot, koto oudo in itie kan, kom koto omina likame oto.

²²Do ango angeo be akadi nan da, gimoroni dedede kame in ikwao kibut Rubanga, en ebino mini.”

²³Yesu oko dwoko ne be, “Omini bino kuo bobo.”

²⁴Marita oko dwoko ne be, “Ango angeo be en ebino yaruno i kuo bobo i ceng me ajikini.”

²⁵Do Yesu oko waco ne be, “Ango en iyarun kede kuo, ngat kame yei ango bino kuo akadi di eto;

²⁶doko ngatamoroni kame nan kuo di eyei ango, likame ebino to. Benyo, iyei kop noni?”

²⁷Marita oko dwoko be, “Ebo Rwot, ango ayei be in en kame Kirisito, Wot ka Rubanga, kame oudo poore bino i piny.”

²⁸Ingei Marita yamo kamano, en eko ot lwongo amin mere Maria di eko weweo ne be, “Apwony kara tie kan, etie lwongi.”

²⁹Kakame Maria owinyo kede kamano, en eko yai eonyaro ot pi riamo kede.

³⁰(Yesu oudo pwodi likame otuno i paco nono, do oudo pwodi etie kakame Marita oriamo kede iye noca.)

³¹Iyudayan kame bin tie bedo kede Maria i ot di kidio cunye oko neno Maria oyai malo awakawaka di eko donyo ooko; gida kiko lube di kiparo be oudo etie ot koko i ates.

³²Di bin Maria otuno kakame Yesu oudo tie iye, eneno Yesu di eko riebere piny i tiene kanono di eko waco ne be, “Rwot, koto oudo ibino kan sek, koto omina likame oto!”

³³Kakame Yesu onene kede di etie koko, karacel kede Iyudayan kame bin en eupere kede da di tie koko, apil oko make, cunye oko dubere adikinicel.

³⁴En eko penyo gi be, “Iyikenu tuai?” Gin kiko dwoko ne be, “Rwot bia ineni.”

³⁵Yesu oko kok.

³⁶Di Iyudayan oko waco be, “Nenunu kite kame oudo emaro kede Lasaro.”

³⁷Do mogo kikom gi oko donyo yamo ken gi ken gi be, “En ngat kame bin eyabo wang emuduk, mam oudo etwero gengo icuo ni kur toi?”

³⁸Cwercuny atek bobo oko mako Yesu, di eko ot i ates kame oudo tie i abo kame koumo doge kede kidi ati.

³⁹Yesu oko waco be, “Kwanyunu kidi no tenge.” Do Marita, amin me icuo kame oudo oto oko dwoko ne be, “Rwot, nan eromo do doko ngwe, pien etieko do nan ceng ongwon i ates.”

⁴⁰Yesu oko dwoko ne be, “Mam oudo awaco ni be ka iyei ibino neno deyo ka Rubanga?”

⁴¹Jo mogo kikom gi oko kwanyo kidi tenge ki dog ates, Yesu oko neno malo di eko waco be, “Apwoyi Papa, pien in itieko winya.

⁴²Ango oudo angeo be in nakanaka iwinya, do ango atie yamo man pi jo kame nan tie cungo kan gi, tetekeny gin kiyei be in en kame iora.”

⁴³Ingei waco kope nogi, en eko redo kede dwane amalo be, “Lasaro, wok ooko.”

⁴⁴Lasaro oko wok ooko di kotweo cinge kede tiene kede egoe kame koyiko kede jo oto, di koboo kiton wange da kede egoe. Yesu oko waco ne gi be, “Gonyenu iwekenu eoti.”

⁴⁵Iyudayan atot kame oudo obino kede Maria oko neno gikame Yesu oudo otimo, di do kiko yei en.

⁴⁶Do mogo kikom gi oko ot but Iparisayon, di kiko tatamo ne gi gikame Yesu otimo.

⁴⁷Di do Iparisayon kede jodongo me josaseredoti oko lwongo kansulo, di kiko waco be, “Nyo kame wan poore otimunu? Nenunu do twon gianena kame icuo ni tie timo.

⁴⁸Ka wan oyei ne meede anyim kede timo gigi, jo dedede bino yei en, di do Joroma ko bino tuturo tempulo wa kede ateker wa da!”

⁴⁹Do ngat acel kikom gi, kame oudo nyinge Kayapa, kame bin oudo obedo Ngatel Josaseredoti i mwaka nono, oko waco be, “Wun kom likame ingeunu gimoro akadi acel.

⁵⁰Benyo, likame iniangunu be eber ne dano acel to pi jo akaka weko piny dedede to?”

⁵¹En likame oudo etie yamo kamano pi wie kene; do bala kite kame en oudo etie Ngatel Josaseredoti i mwaka nono, oudo en etie do murao be Yesu oyaro to pi Iyudayan,

⁵²do likame pi gin kenekene, do pi coko idwe ka Rubanga kame osarakin obukui pi doko jo acel.

⁵³Cako cenge no, di do jotel me Iyudayan oko donyo mono epone me neko Yesu.

⁵⁴Pi mano, Yesu likame oko meede ot i kakaler i dier Iyudayan, do en eyai eko ot i adul moro kame bin iyapiyapi kede tim, i bomba kame kolwongo be Epuraimu, kakame en eko bedo iye kede josiao mege.

⁵⁵Ceng me camo Ebaga me Kalamo oudo odoko do iyapiyapi, jo atot oudo oyai ki miere ooto Yerusalem pi lonyere di ebaga pwodi likame otuno.

⁵⁶Gin oudo kitie mono Yesu. Kakame bin gin kicokere kede i tempulo, kiko donyo penyere ken gi ken gi be, “Nan wun iparunu benyo, ateteni icuo ni oyaro bino i ebaga noni?”

⁵⁷Jodongo me josaseredoti karacel kede Iparisayon oudo otieko ciko jo be, ka ngatamoro ongeo kakame Yesu tie iye, poore eter kop but gi awakawaka, tetekeny kimake.