Read kumam Yokana 14 Bible Online

Yokana 14 - kumam bible

Yokana 14

¹Yesu oko waco ne josiao mege be, “Cunyu kur poti, yeunu Rubanga, di ikounu yei ango da.

²I ot ka Papa na, tie iye agolai atot; ka koto di oudo likame kamanono, koto likame awaco ne wu be atie ot iiko ne wu kabedo.

³Ka ango aoto ako iiko ne wu kabedo, abino dwogo ako omo wu atero wu kakame ango atie iye, di wuda ikounu bedo kuno.

⁴Wun ingeunu yongayo me kakame ango atie ot iye.”

⁵Tomasi oko waco ne be, “Rwot, ka do ber wan likame ongeo kakame in itie ot iye, otwero do ngeno yongayo mere benyo?”

⁶Yesu oko dwoko ne gi be, “Ango en yongayo, ateni kede kuo; likame tie ngatamoro kame bino but Papa di likame ebeo kibuta.

⁷Koto di ingeanu, oudo koto ingeunu kiton Papa da; cako nan itiekunu do ngene, doko itiekunu nene da.”

⁸Pilipo oko waco ne be, “Rwot, nyut ne wa Papa, gikame wan omito inonono erume.”

⁹Yesu oko dwoko ne be, “Pilipo, ango abedo kede wu kan pi kare go dedede, benyo, ida likame ingea? Ngat konenango udo eneno Papa; pinyo doko komio iwacunu be anyut ne wu Papa?

¹⁰Benyo, in likame iyei be ango atie i Papa doko Papa da tie i ango? Kope kame ango awaco ne wu likame ango awaco ne wu i akarunikin nango kena, do Papa kame tie i ango en kame timo tice mege.

¹¹Wun poore iyeunu kop kame ango awaco ne wu be, ango atie i Papa, doko Papa da tie i ango; aso ka li, yeunu ango pi tice kame ango atie timo.

¹²“Ateteni, ateteni awaco ne wu be, ngat kame yei ango ebino eda timo tice kame ango atimo; doko en ebino timo tice kame dongodongo kalamo mago, piento ango ayaro ot but Papa na.

¹³Gimoroni kame ibinunu kwano i nyinga, ango abino timo tetekeny jo mi Papa deyo pi Wode.

¹⁴Ka ikwaunu gimoro i nyinga, abino timo.

¹⁵“Ka imaranu, ibinunu gwoko cik na.

¹⁶Ango abino kwano Papa, di en eko mino wu ngakony ace, kame bino bedo kede wu nakanaka.

¹⁷En ebedo Tipo me ateni, kame jo me piny ni likame twero udo, pien likame kitwero nene arabo ngene. Do wun ingeunu en, piento en etie i diere wu.

¹⁸“Ango likame abino weko wu kenu, do abino dwogo butu.

¹⁹Odong kare acecek di jo me piny ni likame bobo ko bino nena, do wun ibinunu nena; pi kite kame ango akuo kede, wuda ibinunu bedo kuo.

²⁰Ka ceng no otuno, wun ibinunu ngeno be ango atie i Papa na, doko wuda itienu i ango, kede ango da atie i wun.

²¹“Ngat kame mako cik na di eko lubo, en ngat kame mara. Ngat kame mara, Papa na da bino mare, ango da kikoma abino mare di ako bino nyutere bute.”

²²Yuda (weko Isikariot) oko waco ne be, “Rwot, in ibino nyutere but wan kenwa benyo benyo di likame iko nyutere ne jo me piny?”

²³Yesu oko dwoko ne be, “Jo kame mara bino lubo kop na. Papa na bino maro gi, di ango kede Papa oko bino but gi, di oko bedo kede gi.

²⁴Ngat kalikame mara, udo likame elubo kope na; doko kope kame wun iwinyunu go likame gin mega, do gin kiwok kibut Papa ngat kame oora.

²⁵“Ango awaco ne wu kope gi di pwodi atie kede wu.

²⁶Do Ngakony, kame obedo Tipo Kacil kame Papa bino cwano i nyinga, bino pwonyo wu i gi dedede di eko mino wu iyutununu gi dedede kame ango atieko waco ne wu.

²⁷“Ango atie weko wu kede mulem, amio wu mulem na, likame bala kite kame piny mio kede. Cunyu kur poti, doko kur ibedunu kede lworo.

²⁸Pien wun itiekunu winyo di ango awaco ne wu be, ‘Ango atie ot, do abino dwogo butu.’ Ka koto oudo imaranu, koto nan wun itienu kilel pi kite kame ango atie ot kede but Papa; pien Papa dwong loa.

²⁹Ango nan awaco ne wu gi nogi di pwodi likame kitimere, tetekeny kame kitimere, ibinunu yei.

³⁰Ango likame doko nan abino duro kope, pien ngapug piny ni do tie bino. En eli kede twer moro i koma,

³¹do ango gira atimo gikame Papa na ocika be atimi, tetekeny jo me piny ni ngei be ango amaro Papa. “Aso yaunu do ootunu.