Read kumam Yokana 16 Bible Online

Yokana 16 - kumam bible

Yokana 16

¹“Ango atieko waco ne wu gi nogi dedede pi mino kur ipotunu ki yei wu.

²Kibino riamo wu tenge ki sinagogan. Ateteni esawa bino tuno kame ngat kame neko wu bino paro kede be etie timo ne Rubanga tic.

³Kibino timo man pien likame kingeo Papa arabo ango.

⁴Do ango atieko waco ne wu gi nogi, tetekeny kame esawa gin otuno, wek iyutununu gikame atieko waco ne wu i kom gi. “Likame oudo awaco ne wu gi nogi cako ki agege, pien oudo ango atie kede wu.

⁵Ango nan atie ot but ngat kame bin oora, do di likame tie ngatamoro kikom wu kame penya be, ‘Itie ot tuai?’

⁶Wun nan itienu kede cwercuny pien ango awaco ne wu kope nogi.

⁷Bed bala kamano da, atie waco ne wu kop me ateni be, eber ne wu ka ango aoto; pien ka likame aoto, Ngakony likame oyaro bino butu, do ka ango aoto, abino cwane butu.

⁸Kame etuno, en ebino mino jo me piny kan bedo kede niang aber i kom kop kame mako dub kede poore kede ngolo kop:

⁹i kom kop kame mako dub, pien gin likame kiyei ango;

¹⁰i kom kop kame mako poore, pien ango atie ot but Papa, doko likame ibinunu medo nena;

¹¹i kom kop kame mako ngolo kop, pien kotieko ngolo ne ngapug me piny ni kop.

¹²“Ango oudo pwodi atie kede kope atot kame apoore waco ne wu, do nan likame itwerunu mako gi.

¹³Kame Tipo kame nyuto ateni obino, en ebino telo wu i gi dedede me ateni, pien likame ebino yamo kede akarunikin mere kene, do en ebino tuco ne wu kop me anyim.

¹⁴En ebino mina deyo, pien ebino kwanyo kop na di eko waco ne wu.

¹⁵Gi dedede kame Papa tie kede gin mega; en komio ango awaco ne wu be, ebino kwanyo kop na di eko waco ne wu.

¹⁶“Odong kare acecek di likame ikounu nena bobo, doko ikounu bino nena ingei kare acecek.”

¹⁷Mogo kikom josiao mege oko donyo waco ken gi ken gi be, “Dwong me kop ni en nyo, kame en ewaco ne wa be, ‘Odong kare acecek di likame ikounu bino nena, di bobo ikounu bino nena ingei kare acecek’; kede bobo be, ‘Pien ango atie ot but Papa’?”

¹⁸Gin kiko penyere be, “Dwong me ‘Ingei kare acecek’ en nyo? Wan likame ongeo dwong kop kame en etie waco.”

¹⁹Yesu oudo ngeo be gin kimito penye, omio en eko penyo gi be, “Mam itienu penyere kenu kenu pi dwong me gikame oudo ango awaco be, ‘Odong kare acecek di likame ikounu bino nena, doko ikounu bino nena ingei kare acecek’?

²⁰Ateteni, awaco ne wu be, ibinunu koko kede iturur, do piny bino lelo; ibinunu bedo kede cwercuny, do cwercunyu bino lokere doko kilel.

²¹Kame dako tie ramere me nywal, ebedo kede cwercuny, pien esawa mere udo otuno; do kame etieko nywalo atin, likame eyutuno bobo can kame ebeo iye nono, pien udo etie kede yomcuny pi nywalo atin i piny.

²²Aso nan wuda itienu kede cwercuny, do ango abino bobo neno wu di cunyu ko bino doko yom; doko likame tie ngatamoro kame bino kwanyo kilel wu kibutu.

²³“Kame ceng nono otuno, likame ibinunu penya gimoro. Ateteni awaco ne wu be, ka ikwaunu gimoroni kibut Papa i nyinga, en ebino mino wu.

²⁴Tuno nan pwodi likame ikwaunu gimoro i nyinga; kwaunu, ibinunu udo, me wek ibedunu kede kilel kame romo.

²⁵“Ango nan atieko waco ne wu gi nogi i agole; do esawa bino tuno kalikame doko ango abino yamo kede wu i agole, do abino yamo ne wu gi dedede i kom Papa kakaler.

²⁶I ceng nono ibinunu kwano Papa i nyinga; do likame awaco ne wu be abino kwano Papa akaka wun;

²⁷pien Papa kikome maro wu gire, en emaro wu pien wun imaranu, doko iyeunu da be ango awok kibut Papa.

²⁸Ango bin awok kibut Papa di ako bino i piny; nan bobo atie weko piny di ako dok but Papa.”

²⁹Josiao mege oko waco be, “Neni, nan itie do waco gi dedede kakaler, likame i agole moro.

³⁰Wan nan ongeo be in do ingeo gi dedede, doko likame emitere ne ngatamoro pi penyi, man mio wan oyei be in iwok kibut Rubanga.”

³¹Yesu oko penyo gi be, “Nan iyeunu do?

³²Esawa tie bino, doko etieko tuno da, kame kobino sasaro wu kede, ngat acelacel tunge kene, di ikounu weka kena. Do di likame udo ango adong kena, pien Papa udo tie keda.

³³Ango atieko waco ne wu kop noni tetekeny ibedunu tie kede mulem i ango. Ibinunu bedo kede peko i piny kan, do diunu cunyu; ango atieko lono piny.”