Read kumam Yokana 18 Bible Online

Yokana 18 - kumam bible

Yokana 18

¹Di Yesu otieko waco kope nogi, en eko ot kede josiao mege, di kiko ngolo aditot me Kideron, kakame oudo poto tie iye, di en eko donyo iye karacel kede gi.

²Yuda ngat kame bin orupao en da oudo ngeo kuno, pien Yesu oudo maro ot riamo karacel kede josiao mege kuno.

³Di do Yuda oko tero ekodet me isirikalen kede jotic mogo adongodongo kuno, kame owok kibut jodongo me josaseredoti kede kibut Iparisayon. Gin kioto kunono di oudo kimako italan kede mac acal bala me rau kede jame me yi.

⁴Yesu oudo ngeo gi dedede kame bino timere i kome, omio en eko wokun anyim di eko penyo gi be, “Imounu ngai?”

⁵Gin kiko dwoko ne be, “Yesu me Nasaret.” Yesu oko waco ne gi be, “Ango inononi.” Yuda, ngat kame oudo orupao en, oudo tie cungo kede gi.

⁶Kakame Yesu owaco ne gi kede be, “Ango inononi,” gin kiko riangar cen, di kiko popoto piny.

⁷Yesu oko bobo penyo gi be, “Kara ber wun imounu ngai?” Gin kiko dwoko be, “Yesu me Nasaret.”

⁸Yesu oko dwoko ne gi be, “Atieko waco ne wu be ango inononi. Pi mano ka itienu mona, wekunu jogi oti.”

⁹Man otimere pi cobo kop kame oudo Yesu owaco be, “Likame tie ngatamoro korwenyo kikom jo kame oudo imia.”

¹⁰Di do Simoni Petero, bala kame oudo etie kede epima, oko kwanyo epima mere di eko tongo kede yit epasoit me Ngatel Josaseredoti teletel. Nying epasoit nono oudo Maliko.

¹¹Yesu oko waco ne Petero be, “Dwok epima ni i akularu mere. Mam ango apoore pi mato ikopo me can kame Papa na otieko mina?”

¹²Kikano, ekodet me isirikalen kede ngadwong gi, kede ipolisin me Iyudayan oko mako Yesu di kiko twene.

¹³Gin kiko ber cako tere but Anas, ngat kame oudo obedo papa me dako ka Kayapa, kame oudo obedo Ngatel Josaseredoti i mwaka nono.

¹⁴Kayapa nono en kame oudo bin omio Iyudayan tam be, eber ka dano acel oto pi jo.

¹⁵Simoni Petero kede ngasiao ace oko lubo Yesu. Kite kame ngasiao nono oudo ngere kede but Ngatel Josaseredoti, omio en eko donyo i diakal me Ngatel Josaseredoti karacel kede Yesu,

¹⁶do Petero oko dong cungo i dog erute. Ngasiao nono, kame oudo ngere but Ngatel Josaseredoti, oko dok ooko, di eko yamo kede nyako kame oudo daro dog erute, di eko kelo Petero da i diakal.

¹⁷Nyako kame oudo daro dog erute oko penyo Petero be, “Mam ida ibedo ngat acel kikom josiao me icuo noni?” Petero oko dwoko be, “Likame ango.”

¹⁸Ipasoi kede isirikalen oudo odopo mac kitie cungo di kiyo, pien piny oudo ngic. Petero da oudo tie cungo kede gi di eyo mac.

¹⁹Ngatel Josaseredoti oko penyo Yesu kop i kom josiao mege kede pwony mere.

²⁰Yesu oko dwoko ne be, “Ango atieko waco ne piny kop kakaler; doko abedo pwonyo jo i sinagogan kede i tempulo, kakame Iyudayan dedede cokere iye. Likame tie gimoro kame ango awaco i mung.

²¹Pinyo komio ipenyanu? Penyunu jo kame oudo owinyo kop kame awaco ne gi; gin kingeo gikame ango oudo awaco.”

²²Kakame Yesu otieko waco kede kop noni, sirikale acel kame oudo tie cungo kuno oko bape di waco ne be, “Mam epone kame in idwoko kede kop ne Ngatel Josaseredoti ino?”

²³Yesu oko dwoko be, “Ka awaco kop arac, nyut gikarac nono, do ka awaco kop aber, pinyo komio ibapa?”

²⁴Anas oko mino kotere but Kayapa di kotwee, ngat kame oudo obedo Ngatel Josaseredoti.

²⁵Simoni Petero oudo tie cungo di eyo mac. Gin kiko waco ne be, “Mam ida ngat acel kikom josiao mege?” En eko dagi di ewaco be, “Likame ango.”

²⁶Ngat acel kikom ipasoi me Ngatel Josaseredoti, wad gi icuo kame Petero oudo otongo yite, oko penye be, “Mam oudo aneni di itienu kede Yesu i poto?”

²⁷Petero oko bobo dagi; cucuto di do tongweno oko kok.

²⁸Di do kiko kwanyo Yesu ki ot ka Kayapa kiko tere i ot me ngapug. Piny oudo pwodi odiko sek. Gin likame kiko donyo i ot me ngapug, pien likame oudo kimito be kimunaun, me wek kitwer camo ebaga me Bwot.

²⁹Pilato oko donyo ooko but gi, di eko waco ne gi be, “Kop nyo kame itienu pido iye dano ni?”

³⁰Gin kiko dwoko ne be, “Koto oudo dano ni likame obedo ngatim tim areco, koto wan likame okele buti.”

³¹Pilato oko waco ne gi be, “Wun terenu kikomu, ikounu ngolo ne kop di lubere kede Iswil wu.” Iyudayan oko waco ne be, “Iswil likame yei ne wan neko ngatamoro.”

³²(Man otimere pi mino kop kame Yesu oudo owaco cobere kakare, pi nyuto epone kame eyaro to kede.)

³³Pilato oko bobo donyo i ot me ngapug, di eko lwongo Yesu, eko penye be, “In en abaka me Iyudayan?”

³⁴Yesu oko dwoko ne kede peny be, “Kop no owok kibuti, arabo jo apat en kame owaco ni i koma?”

³⁵Pilato oko penye be, “Do oudo ango abedo Ngayudaya? Ateker ni kede jodongo me josaseredoti en kame okeli buta; nyo kame oudo in itimo?”

³⁶Yesu oko dwoko be, “Ajakanut na likame obedo me piny kan, ka koto di ajakanut na obedo me piny kan, oudo koto jotic na oyi tetekeny kur mia i cing Iyudayan; do ajakanut na likame wok ki piny kan.”

³⁷Pilato oko penye be, “Mam in do abaka?” Yesu oko dwoko be, “In iwaco be ango abaka, ango oudo konywala pi kop noni, doko kop noni da en komio ango abino i piny, me wek abed ijura i kom gi me ateni. Ngat acelacel kame tie i ateni winyo dwana.”

³⁸Pilato oko penye be, “Ateni en nyo?” Di do Pilato bobo oko donyo ooko but Iyudayan, eko waco ne gi be, “Likame ango audo raco moro kame en etimo.

³⁹Do wun itienu kede itok wu be miero agony ne wu mabus acel i kare me Ebaga me Kalamo; benyo, imitunu be agony ne wu Abaka me Iyudayan?”

⁴⁰Gin kiko lelemo be, “Likame icuo no, do gony ne wan Baraba!” Baraba oudo obedo ngayak.