Read kumam Yokana 20 Bible Online

Yokana 20 - kumam bible

Yokana 20

¹Ceng Sande odiko sek, Maria Magadalina oko dilo di pwodi piny col, di eko ot i ates. En eko neno be oudo kokwanyo kidi tenge ki dog ates.

²Di do en eko ringo eoto but Simoni Petero gini kede ngasiao ocelu kame bin Yesu maro nono, di eko waco ne gi be, “Kikwanyo kom Rwot tenge ki ates, likame ongeo kakame kikete iye.”

³Di Petero oko yai, en karacel kede ngasiao ocelu nono pi ot i ates.

⁴Kiko donyo ringo aringa, do ngasiao ocelu nono oko ringo olanyo Petero, di en eko cako tuno i ates.

⁵En eko gungo pi neno yi ates, di eko neno isukan kenekene di tie kuno, do likame eko donyo i yie.

⁶Di do Simoni Petero da oko tuno di lube ki cen, di eko pororo aporor edonyo i yi ates; en eko neno isukan di tie kuno,

⁷kede itambala kame bin tie i wie, di likame oudo etie karacel kede isukan nogo, do oudo kodole etie kare kene.

⁸Di do ngasiao ocelu kame oudo ogeo tuno i ates nono oko eda donyo i yie, en eko neno di eko yei;

⁹pien pwodi gin oudo likame kiniang iwandik kacil kame waco be poore eyaruno kikom jo oto.

¹⁰Di do josiao oko dok i miere gi.

¹¹Do Maria oko dong koko ooko me ates. Di pwodi oudo etie koko, en eko gungo pi neno yi ates;

¹²di en eko neno imalaikan are kame angapito gi tar, di kibedo kakame oudo kopielo kom Yesu iye, acel i katiene kede ocelu i kawie.

¹³Gin kiko waco ne be, “Dako ni, itie kok pinyo?” En eko dwoko ne gi be, “Pien kitero kom Rwot na tenge, likame angeo kakame kikete iye.”

¹⁴Ingei waco kamano, en eko lokere di eko neno Yesu di tie cungo, do oudo likame engeo be Yesu inonono.

¹⁵Yesu oko penye be, “Itie kok pinyo? Imo ngai?” Maria oko paro be amoto nat ngat koudo tie puro poto oudo inonono, omio en eko waco ne be, “Adwong, ka in en itere tenge, nyuta kakame ikete iye, me wek aot akwanye atere.”

¹⁶Yesu oko lwonge be, “Maria!” Di Maria oko lokere oko waco ne kede leb Eburania be, “Raboni!” (Man dwong mere be Apwony).

¹⁷Yesu oko waco ne be, “Kur imaka, pien pwodi likame aoto malo but Papa; do ot but imiegu na iko waco ne gi be ango atie ot malo but Papa na, en Papa wu da; but Rubanga na, en Rubanga wu da.”

¹⁸Maria Magadalina oko ot di eko waco ne josiao be, “Ango aneno Rwot”; di eko tatamo ne gi gikame Rwot owaco ne.

¹⁹Otieno me Ceng Sabiti nono, josiao oudo tie i ot, di kicego ikekon pi lworo Iyudayan. Yesu oko bino di eko cungo i diere gi di ewaco be, “Mulem bed butu.”

²⁰Ingei waco kamano, en eko nyuto ne gi cinge kede ngete. Di do cuny josiao oko bedo yom kakame kineno kede Rwot.

²¹Yesu bobo oko medo waco ne gi be, “Mulem bed butu. Bala kite kame Papa na oora kede, kamanono ada aoro wu.”

²²Di etieko waco kamano, en eko kuto wei mere i kom gi di ewaco ne gi be, “Gamunu Tipo Kacil.

²³Ka isasirunu ngatamoro ki dub mege, kobino sasiro en; ka idagunu sasiro ngatamoro ki dub mege, likame kobino sasiro en.”

²⁴Kakame Yesu obino kede, Tomasi (kame oudo kolwongo be Bangi), kame bin obedo ngat acel kikom josiao tomon kiwie are oudo likame tie kede gi.

²⁵Josiao apat oko waco ne be, “Wan oneno Rwot.” Do en eko waco ne gi be, “Likame abino yei tuno kede di aneno aporeso me sumalin i cinge, di ako keto iye lweta, doko di ako keto cinga i ngete.”

²⁶Ingei ceng kanyauni, josiao mege oudo bobo tie i ot, Tomasi da oudo tie kede gi, ikekon oudo ocegere, do Yesu oko bino di eko cungo i diere gi, di eko waco be, “Mulem bed butu.”

²⁷En eko waco ne Tomasi be, “Ket lweti kan, doko iko neno cinga; riei cingi iko keto i ngeta, kur ibed abongo yei, do bed ngat kame tie kede yei.”

²⁸Tomasi oko dwoko ne be, “In Rwot na kede Rubanga na!”

²⁹Yesu oko waco ne be, “Mam in iyei pien inena? Kitie kede winyo jo kame yei di likame kineno.”

³⁰Yesu bin otimo gianena atot i nyim josiao mege, kalikame kowandiko i itabu noni.

³¹Do kowandiko magi tetekeny iyeunu be Yesu en Kirisito, Wot ka Rubanga, kede da be wek iudunu kuo i nyinge pi yei kame itienu kede i kome.