Read kumam Yokana 3 Bible Online

Yokana 3 - kumam bible

Yokana 3

¹Oudo bin tie icuo moro kame nyinge Nikodemu, kame oudo obedo ngat acel kikom Iparisayon, en oudo ngapug me Iyudayan.

²Icuo noni bin obino but Yesu iwor di eko waco ne be, “Rabi, wan ongeo be in ngapwony kame owok kibut Rubanga, pien likame tie dano moro kame twero timo gianena kame in itimo gi, kwanyo kame di Rubanga tie kede en.”

³Yesu oko dwoko ne be, “Ateteni, ateteni ango awaco ni be, likame tie ngat kame twero neno Ajakanut ka Rubanga, kwanyo ka konywale tien me are.”

⁴Nikodemu oko penye be, “Ka dano otieko doko dwong, kotwero nywale bobo benyo? Etwero bobo donyo i yi toto mere tien me are di oko nywale benyo?”

⁵Yesu oko dwoko be, “Ateteni, ateteni awaco ni be, likame tie ngat kame twero donyo i Ajakanut ka Rubanga kwanyo di konywale nywal me pii kede me Tipo Kacil.

⁶Gikame kom nywalo udo en kom, doko gikame Tipo nywalo udo en tipo.

⁷Kur ibed kede ur be pien ango awaco ni be, kopoore nywali tien me are.

⁸Yamo buko kakame en emito; in itwero winyo buko mere, do likame ingeo kakame ewok kiye, akadi kakame etie ot iye; etie kamanono da kede dano acelacel kame konywalo nywal me Tipo Kacil.”

⁹Nikodemu oko penye be, “Man karuno timere benyo?”

¹⁰Yesu oko dwoko ne be, “In kom ibedo ngapwony me Isirael do di likame iniang gini?

¹¹Ateteni, ateteni awaco ni be, wan oyamo kop i kom gikame ongeo, kede gikame oneno; do in idagi yei ijura kame wan omio.

¹²Ka awaco ni kop i kom gi me piny di iko dagi yei, ikaruno do yei benyo ka ayamo ni kop i kom jame me malo?

¹³Likame tie ngatamoro kotieko ot malo, kwanyo kenekene ngat koyai ki malo bino piny, en Wot ka dano.

¹⁴“Bala kite kame bin Musa okiarao kede twol i tim, kobino kiarao Wot ka dano da malo kamanono,

¹⁵tetekeny ngat kame yei en ud kuo kame bedo nakanaka.

¹⁶Pien Rubanga bin omaro piny, omio eko cwano iye Wode acel kenekene, tetekeny ngat kame yei en kur toi, do eud kuo kame bedo nakanaka.

¹⁷Pien Rubanga likame ocwao wode i piny pi ngolo ne piny kop, do en ecwae tetekeny piny ud alako pi en.

¹⁸“Ngat kame yei en likame kobino ngolo kop loe; do ngat kalikame yei en kotieko ngolo kop oloe cuto, pien likame eyei nying Wot ka Rubanga acel kenekene.

¹⁹Ngolo kop en ine be, lero otieko bino i piny, do jo oko maro colo akaka lero, pien tice gi oudo reco.

²⁰Pien ngat acelacel kame timo gikarac dagi lero, doko likame ebino i lero, tetekeny tice mege kur ngere.

²¹Do ngat kame timo gi me ateni bino i lero, tetekeny enyutere kakaler be tice mege obedo tice me woro Rubanga.”

²²Ingei man, Yesu kede josiao mege oko ot i piny me Yudea, di en eko dong kede gi kuno di ebatiso jo.

²³Yokana da oudo tie batiso jo i adul me Aenon, i nget Salim, pien oudo pii tie tot kuno. Oudo bin jo bino kuno di oko batiso gi,

²⁴pien oudo pwodi likame koketo Yokana i otkol.

²⁵Piem oko gere i dierediere me josiao ka Yokana kede Ngayudaya acel i kom kop kame mako lonyere.

²⁶Gin kiko bino but Yokana di kiko waco ne be, “Apwony, ngat kame oudo in itie kede loka tetuca me Yorodan, kame in bin imio ijura i kome nono, en ine etie batiso jo; doko jo dedede tie ot bute.”

²⁷Yokana oko dwoko ne gi be, “Likame tie dano kame twero udo gimoro kwanyo di komie ki malo.

²⁸Wuda kikomu ijuraunu ango be awaco be, ango likame Kirisito, do kocwao ango pi telo ne en yongayo.

²⁹Icuo eteran en kame won ateran; do adieru me eteran, kame cungo i ngete di ewinyo yamo mere lelo twatwal pi winyo dwan eteran. Pi mano, ango nan atie kede yomcuny adwong.

³⁰En miero emeede, do ango miero adok piny.”

³¹“Ngat kame obino ki malo kalamo jo dedede. Ngat kame tie i piny udo en me piny, doko da eyamo kope kame mako jamini me piny; ngat kame obino ki malo kalamo jo dedede.

³²En ejurao gikame eneno kede kame ewinyo, do likame tie ngatamoro kame yei ijura kame en emio.

³³Ngat kame yei kop me ijura mere, udo ngat nono otieko moko be Rubanga en ateni.

³⁴Pien ngat kame Rubanga ocwao, en eyamo kop ka Rubanga, pien likame Rubanga mio Tipo Kacil di epimo apima;

³⁵Papa maro Wod, doko etieko mino jame dedede i cinge.

³⁶Ngat kame yei Wod tie kede kuo kame bedo nakanaka; ngat kalikame yei Wod likame ebino udo kuo, do lilo ka Rubanga bino poto i kome.”