Read kumam Yokana 5 Bible Online

Yokana 5 - kumam bible

Yokana 5

¹Ingei man, ebaga me Iyudayan oko bedo, Yesu oko ot paka Yerusalem.

²Oudo bin atapar tie Yerusalem i nget Erute me Romini, kame oudo tie kede ikekon kany kame kogero wi gi. Oudo kolwongo atapar nono kede leb Eburania be Betesaida.

³Ekodet me jo kame bin tuwo obwono oudo buto i dog ikekon nogo. Oudo gin kibedo imuduka, ingwalasa, kede jo kame tuwo oneko adulion me kom gi. Gin bin oudo kidaro rubere me pii;

⁴pien malaika ka Rwot oudo bino kuno i kare mogo di eko rubo pii. Ngat kame oudo geo donyo i yi pii ingei rubere mere, oudo cango ki tuwo kame etie kede.

⁵Icuo acel bin tie kuno kame oudo obedo kede tuwo pi mwakini ot adek kiwie kanyauni.

⁶Kakame Yesu oneno kede icuo nono di eko ngeno be oudo etieko kare alac di ebuto kuno, en eko penye be, “Imito be icangi?”

⁷Icuo kame oudo tuwo nono oko dwoko ne Yesu be, “Adwong, ango ali kede ngat kame keta i pii kame korubo pii. Doko kame ango atie ot iye, dano ace en kame geo donyo na iye.”

⁸Yesu oko waco ne be, “Yai malo, kwany gibuto ni ioti.”

⁹Cucuto icuo nono oko cango, en eko kwanyo gibuto mere di eko ot. Ceng nono oudo obedo Ceng Sabato.

¹⁰Iyudayan oko waco ne icuo kame kocango nono be, “Tin Ceng Sabato, Iswil wa likame yei ni yeno gibuto ni.”

¹¹Do icuo nono oko dwoko ne gi be, “Icuo kame omia acango en kame owaco na be, ‘Kwany gibuto ni ioti.’ ”

¹²Gin kiko penye be, “Icuo mene en kame owaco ni be, ‘Kwany gibuto ni ioti?’ ”

¹³Icuo kame oudo kocango nono likame oudo ngeo be ngai inonono, Yesu oudo orwenyo ne pien jo oudo tot kuno.

¹⁴I cen mere, Yesu oko ude i tempulo di oko waco ne be, “Neni, itieko do doko ber! Kur imed bobo dubo, tetekeny gimoro arac kalamo mano kur doko timere ni.”

¹⁵Icuo nono oko ot di eko waco ne Iyudayan be Yesu en kocange.

¹⁶Man en gikomio Iyudayan oko tidilo Yesu, piento oudo etimo gini i Ceng Sabato.

¹⁷Do Yesu oko dwoko ne gi be, “Papa na pwodi tie tic, ango da atie tic.”

¹⁸Man en gikame omio Iyudayan oko meede mono neke, pien likame eturo Iswil me Sabato kenekene, do doko da elwongo Rubanga be Papa mere kikokome, iepone noni en udo eporere kede Rubanga.

¹⁹Yesu oko waco ne gi be, “Ateteni, ateteni ango awaco ne wu be, Wod likame timo gimoro kede mit mere kene, do etimo gikame eneno di Papa mere timo kenekene; pien gikame Papa timo dedede, etimo tetekeny Wode da tim kamanono.

²⁰Pien Papa maro Wod, bobo enyuto ne gi dedede kame en kikome etie timo. Doko da ebino nyuto ne tice adongodongo kalamo magi, di wun ikounu bino uro.

²¹Pien bala kite kame Papa yaruno kede jo oto di eko mino gi kuo, kamanono da Wod mio kuo but jo kame cunye mito.

²²Papa likame ngolo ne ngatamoro kop, do etieko mino ngolo kop i cing Wod,

²³tetekeny jo dedede bed kede wor but Wod bala kite kame kibedo kede wor but Papa. Ngat kalikame tie kede wor but Wod, udo likame etie kede wor but Papa ngat kocwao Wod.

²⁴“Ateteni, ateteni awaco ne wu be, ngat kame winyo kop na di eko yei ngat kame oora, etie kede kuo kame bedo nakanaka; likame kobino ngolo ne kop, do etieko yai ki to etuno i kuo

²⁵Ateteni, ateteni awaco ne wu be, esawa oyaro tuno, doko nataman en inononi da, kame jo oto bino winyo kede dwan Wot ka Rubanga, di jo kame winyo ko bino bedo kuo.

²⁶Pien bala kite kame Papa kikome en kame kuo wok kibute, kamanono da etieko mino Wod bedo ngat kame kuo wok kibute.

²⁷Doko etieko mino Wod akarunikin me ngolo ne jo kop, piento en ebedo Wot ka dano.

²⁸Kur iurunu kop noni; pien esawa bino tuno kame jo dedede kame tie i atesin bino winyo kede dwane,

²⁹di kiko wok. Jo kotimo gikame beco bino yaruno i kuo, do jo kame otimo gikareco bino yaruno di oko ngolo ne gi kop.

³⁰“Likame tie gikame atwero timo i akarunikin nango kena. Ango angolo kop bala kame kowaco na kede; ngolo kop nango tie me ateni; pien likame udo ango alubo mit na, do ango alubo mit me ngat kame oora.

³¹“Ka ango amio ijura i koma kena, udo kop me ijura na likame tie me ateni;

³²do tie dano ace kame mio ijura akaka ango, doko ango angeo be ijura kame en emio i koma tie me ateni.

³³Wun icwaunu jo but Yokana di en eko mino ijura me ateni.

³⁴Likame pien ango audo ijura noni kibut dano, do ango ayamo kamano me wek iudunu alako.

³⁵Yokana oudo tie bala etala kame liel di erieny, doko wuda oudo itienu kede mit me kilel tunutunu i lero mere.

³⁶Do kop me ijura kame ango atie kede pire tek kalamo me ka Yokana; pien tice kame Papa omia pi timo, tice nogo en kame nataman atie timo, gin en kame kijurao ango be Papa en kame oora.

³⁷Doko Papa da ngat kame oora otieko mino kop kame jurao ango. Pwodi likame iwinyunu dwane akadi neno cal mere da.

³⁸Doko likame kop mere odong i cunyu, pien likame iyeunu ngat kame en eoro.

³⁹Wun imounu gikame tie i iwandik kacil, pien iparunu be ibinunu udo kuo kame bedo nakanaka ki yi gi, do di gin nogo en kame kimio kop kame jurao ango.

⁴⁰Do di idagunu bino buta tetekeny ibedunu kede kuo kame bedo nakanaka.

⁴¹“Ango likame amo deyo kibut jo.

⁴²Do angeo be cunyu likame tie kede amara i kom Rubanga.

⁴³Ango nan abino i nying Papa na di ikounu dagi gama; do ka ngatamoro obino i akarunikin mere kene, ibinunu game.

⁴⁴Itwerunu yei benyo benyo wun jo kame iudunu deyo kibut jo icegun, do di likame imounu deyo kame wok kibut Rubanga acel kenekene?

⁴⁵Kur iparunu be ango abino pido wu but Papa; Musa en kame pido wu, en ngat kame wun iketunu gen wu i kome.

⁴⁶Ka koto oudo iyeunu Musa, koto oudo iyeunu ada, pien Musa oudo owandiko kop i koma.

⁴⁷Do ka likame iyeunu kop kame ewandiko, ibinunu yei kop na benyo benyo?”