Read kumam Yokana 6 Bible Online

Yokana 6 - kumam bible

Yokana 6

¹Ingei man, Yesu oko ngolo loka tetuca me nam me Galilaya, kame kolwongo da be nam me Tiberia.

²Ekodet adwong me jo oko lube, pien oudo gin kineno gianena kame en etimo ne jo kame oudo tuwo.

³Yesu oko yito malo i wi moru, en eko bedo piny kuno kede josiao mege.

⁴Ebaga me Kalamo, kame obedo ebaga me Iyudayan, oudo onoko.

⁵Kakame Yesu otingo kede wange malo, en eko neno ekodet me jo di kitie bino bute, di eko waco ne Pilipo be, “Obino wilo mugati kituai, tetekeny omi jogi cami?”

⁶En ewaco man pi tamo Pilipo, pien Yesu kikome oudo ngeo gikame en ebino timo.

⁷Pilipo oko dwoko ne be, “Denari tol are likame twero wilo mugati kame romo gi di ngat acelacel kikom gi ko twero udo atitidi moro.”

⁸Ngat acel kikom josiao mege kame nyinge Anderia, omin me Simoni Petero, oko waco ne Yesu be,

⁹“Awobi tie kan kame tie kede mugati kany kede deknam are; do mago kenekene timo ne twon jogi nyo?”

¹⁰Yesu oko waco be, “Miunu jo bed piny.” Oudo lum tot kanono; di jo kame wel gi romo cuo tutumia kany oko bedo piny.

¹¹Yesu oko kwanyo mugati; kakame etieko mino kede pwoc, en eko popoko gi ne jo kame oudo obedo piny. En eko timo kamanono da kede deknam, gin dedede kiko udo gikame romo gi.

¹²Kakame kitieko do yeng kede, Yesu oko waco ne josiao mege be, “Cokunu angidingidin kame odong tetekeny kur gimoro dubere aduba.”

¹³Gin kiko coko angidingidin me mugati kany me mawele, kame jo bin ocamo oko weko, di oko pongo ibukito tomon kiwie are.

¹⁴Kakame jo oneno kede gianena kame Yesu otimo, gin kiko waco be, “Ateteni man en enabi kame oudo poore bino i piny!”

¹⁵Di Yesu ongeo be oudo kiyapuno bino make tetek pi mine doko abaka, en bobo eko yai eoto tenge i moru en kene.

¹⁶Di bin piny oyuto, josiao mege oko ot i nam,

¹⁷kiko donyo i yi yee di kiko ngolo nam pi ot loka Kaperanaum. Piny oudo odoko col, do Yesu oudo pwodi likame obino but gi.

¹⁸Yamo atek oudo tie buko, oko mino nam otingere.

¹⁹Kakame kitieko kwang kede pi mairo kame romo bala adek arabo ongwon, gin kiko neno Yesu di etie ot ki wi pii kede tiene, di oudo etie nyiko doko iyapiyapi kede yee. Lworo atek oko mako gi,

²⁰do Yesu oko waco ne gi be, “Ango inononi, kur lworo maku.”

²¹Cuny gi oko bedo yom pi mine donyo i yi yee. Cucuto yee oko tuno ooko kakame oudo kitie ot iye.

²²Oru mere, jo kame oudo odong loka tetuca oko niang be yee oudo tie kuno acel kenekene; doko da be Yesu oudo likame odonyo iye kede josiao mege, do be josiao mege oudo ooto tenge gin ken gi.

²³Bed bala kamanono da, yede kame bin owok ki Tiberia oko bino tuno i nget kakame oudo gin kicamo kiye mugati ingei Rwot mino pwoc.

²⁴Kakame do jo oneno kede be Yesu oudo li ki kuno, akadi kiton josiao mege da, gida kiko donyo i yi yede kiko ot Kaperanaum di kimoo Yesu.

²⁵Kakame kiudo kede Yesu loka tetuca me nam, kiko waco ne be, “Apwony, in ibino kan awene?”

²⁶Yesu oko dwoko ne gi be, “Ateteni, ateteni awaco ne wu be, wun likame itienu mona pien inenunu gianena, do pien icamunu mugati ikounu yeng.

²⁷Kur icanenu pi cam kame dubere, do canenu pi cam kame kanyakino tuno i kuo kame bedo nakanaka, kame Wot ka dano bino mino wu, pien Rubanga Papa otieko keto alama mere i kome.”

²⁸Gin kiko penye be, “Otim nyo, en kame mio udo otie timo tic ka Rubanga?”

²⁹Yesu oko dwoko ne gi be, “Tic ka Rubanga en ine be, wun miero iyeunu ngat kame en eoro.”

³⁰Aso gin kiko waco ne Yesu be, “Gianena nyo kame ikaruno timo, me wek wan onen di oko yei in? Ibino timo nyo?

³¹Joakwari wa bin ocamo emana i tim; bala kite kame bin kowandiko kede be, ‘Emio gi mugati kowok ki malo pi camo.’ ”

³²Yesu di do oko waco ne gi be, “Ateteni, ateteni awaco ne wu be, likame Musa en kame bin omio wu mugati kame owok ki malo; Papa na en kame bin omio wu mugati me ateni kame owok ki malo.

³³Pien mugati ka Rubanga en maca kame wok ki malo di eko mino kuo i piny.”

³⁴Gin kiko waco ne be, “Rwot, dony mino wa do mugati nono nakanaka.”

³⁵Yesu oko waco ne gi be, “Ango en mugati me kuo; ngat kame bino buta kec likame bino neke, doko ngat kame yei ango orio likame bino neke.

³⁶Do ango atieko waco ne wu be wun itiekunu nena, do pwodi likame iyeunu.

³⁷Jo dedede kame Papa mia oyaro bino buta; doko ngat kame bino buta, likame abino riame tenge.

³⁸Pien ango abino ki malo, likame pi timo gikame ango amito, do pi timo gikame ngat kame oora mito.

³⁹Gikame ngat oora mito en ine be, likame apoore rwenyo ngatamoro kikom jo dedede kame en emia, do miero ayaruno gi i ceng me ajikini.

⁴⁰Pien gikame Papa na mito en ine be, ngat acelacel kame neno Wod di ko yei en poore udo kuo kame bedo nakanaka; doko ango ako bino yaruno en i ceng me ajikini.”

⁴¹Iyudayan oko cako ngunguro i kom Yesu pien oudo ewaco be, “Ango en mugati kame obino piny yai ki malo.”

⁴²Gin kiko waco be, “Mam icuo noni en Yesu wot ka Yosepu? Wan ongeo papa mere kede toto mere da. Benyo benyo doko komio en nan ewaco be, ‘Ango ayai ki malo abino piny?’ ”

⁴³Yesu oko dwoko ne gi be, “Kur ingungurunu kenu kenu.

⁴⁴Likame tie ngatamoro kame twero bino buta kwanyo kenekene ka Papa ngat kame oora en okele; doko abino yaruno en i ceng me ajikini.

⁴⁵Kowandiko i itabu me inabin be, ‘Doko Rubanga bino pwonyo gin dedede.’ Ngat acelacel kame winyo kop ka Papa na di eko udo pwonyere kibute, en ebino udo alako.

⁴⁶Likame dwong mere be tie ngatamoro kotieko neno Papa, do kwanyo ngat kowok kibut Rubanga en kame otieko neno Papa.

⁴⁷Ateteni, ateteni awaco ne wu be, ngat kame yei tie kede kuo kame bedo nakanaka.

⁴⁸Ango en mugati me kuo.

⁴⁹Joakwari wu bin ocamo emana i tim do kiko to.

⁵⁰Man en mugati kowok ki malo, tetekeny dano came di likame eko to.

⁵¹Ango en mugati me kuo kame owok ki malo; ngat kame camo mugati noni bino kuo ikar kede ikar. Mugati kame ango abino mino pi kuo me piny en ringokoma.”

⁵²Iyudayan oko donyo piem ken gi ken gi be, “Icuo ni karuno mino wan ocamo ringokome benyo benyo?”

⁵³Yesu oko waco ne gi be, “Ateteni, ateteni awaco ne wu be, ka likame icamo ringokom Wot ka dano kede imato remo mere, likame ibino bedo kuo.

⁵⁴Ngat kame camo ringokoma kede kame mato remo na, en etie kede kuo kame bedo nakanaka, doko abino yaruno en i ceng me ajikini,

⁵⁵pien ringokoma en cam me ateni, doko remo na da en giamata me ateni.

⁵⁶Ngat kame camo ringokoma kede mato remo na bedo i ango doko ada abedo i en.

⁵⁷Bala kame Papa kakuo oora kede, doko di ango akuo pi Papa, kamanono da ngat kame camo ringokoma bino bedo kuo pi ango.

⁵⁸Man en mugati kame bin owok piny ki malo, likame bala maca kame bin joakwari ocamo di kiko to; ngat kame camo mugati noni bino kuo ikar kede ikar.”

⁵⁹Yesu owaco kope nogi di oudo etie pwony i sinagoga i Kaperanaum.

⁶⁰Kakame josiao ka Yesu atot owinyo kede kop mere, gin kiko waco be, “Man kop atek; ngai kame karuno yei lube?”

⁶¹Do Yesu oko ngeno i cunye kene be josiao mege oudo tie ngunguro pi gikame en ewaco, omio en eko penyo gi be, “Mam kop noni owango cunyu?

⁶²Do benyo ka koto oudo inenunu Wot ka dano di etie ot malo kakame oudo bin egeo bedo iye sek?

⁶³Tipo ka Rubanga en kame mio kuo, do kom dano likame tie kede kony moro; kope kame ango atieko waco ne wu tie Tipo ka Rubanga kede kuo da.

⁶⁴Do tie jo mogo ki komu kalikame yei.” Pien Yesu oudo ngeo cako ki agege jo kalikame yei kede da ngat kame oudo oyaro rupao en.

⁶⁵En eko waco be, “Gini en komio ango awaco ne wu be, likame tie ngatamoro kame sobolo bino buta, kwanyo di Papa na en oyei ne.”

⁶⁶Ingei man, jo atot kikom jo kame bin oudo lubo Yesu oko dok cen, likame bobo kiko meede upere kede.

⁶⁷Yesu oko penyo josiao mege tomon kiwie are be, “Wuda nan do imitunu weko luba?”

⁶⁸Simoni Petero oko dwoko ne be, “Rwot, wan bobo otwero ot but ngai? In en kame itie kede kope kame mio kuo kame bedo nakanaka;

⁶⁹doko wan otieko yei di oko ngeno da be in en Ngat Kacil ka Rubanga.”

⁷⁰Yesu oko dwoko ne gi be, “Mam ango en kame ayero wu, wun jo tomon kiwie are? Do di ngat acel kikom wu obedo Sitani.”

⁷¹Yesu oudo tie waco kop i kom Yuda wot ka Simoni Isikariot, pien bed bala en oudo ebedo ngat acel kikom josiao tomon kiwie are, en oudo eyaro rupao Yesu.