Read kumam Yokana 7 Bible Online

Yokana 7 - kumam bible

Yokana 7

¹Ingei man, Yesu oko ririmo Galilaya, likame oudo ekaruno ririmo Yudea pien Iyudayan oudo mito neke.

²Kare me ebaga me kimere[2] oudo iyapiyapi.

³Di do imiegu mege oko waco ne be, “Yai ki kan ioti i Yudea, tetekeny jo kame lubi nen tice kame itie timo.

⁴Pien likame tie dano kame timo tice mege i mung ka emito be engere kakaler. Ka itie timo gigi, nyutere wek piny lung ngei.”

⁵Pien akadi imiegu ka Yesu da oudo likame oyei en.

⁶Yesu oko waco ne gi be, “Kare nango pwodi likame otuno, do wun itienu kede kare nakanaka.

⁷Jo me piny likame sobolo dagi wun, do kidagi ango pien ango abedo waco ne gi be tice gi reco.

⁸Wun otunu i ebaga; ango likame ayaro ot i ebaga no, pien kare na pwodi likame otuno.”

⁹Ewaco kaman di eko dong Galilaya.

¹⁰Do i cen mere di imiegu mege oudo otieko ot i ebaga, Yesu da oko kwalere ooto kuno i mung.

¹¹Iyudayan oudo tie mone ki kakame ebaga oudo tie iye di kipenyere be, “Ani en?”

¹²Jo oudo tie kede ingungur adwong i kome. Jo mogo oudo waco be, “En dano aber,” do jo ace waco be, “Li, en kom etie rwenyo jo.”

¹³Do likame tie ngatamoro oko yamo kop obe i kome, pien oudo kilworo Iyudayan.

¹⁴Kakame ebaga otuno kede diere, Yesu oko ot i tempulo di eko pwonyo jo.

¹⁵Iyudayan oko uro di kiwaco be, “Benyo benyo komio icuo ni tie kede rieko kame rom kaman do di likame esomo?”

¹⁶Yesu oko dwoko ne gi be, “Pwony na likame mega kikoma, do me ka ngat kame oora.

¹⁷Ka ngatamoro tie kede mit me timo gikame Rubanga mito, ebino ngeno ka pwony na owok kibut Rubanga arabo ka ango atie yamo i akarunikin nango kena.

¹⁸Ngat kame yamo i akarunikin mere kene mo deyo mere kene; do ngat kame mo deyo pi ngat kame oore, en dano me ateni, bobo eli kede angalo moro i kuo mere.

¹⁹Mam bin Musa omio wu Iswilia? Do likame tie ngatamoro kibutu kame gwoko Iswilia nogo. Pinyo bo komio imounu neka?”

²⁰Jo oko dwoko be, “In itie kede jwogi! Ngai kame tie mono neki?”

²¹Yesu oko dwoko ne gi be, “Ango bin atimo gi acel di wun dedede ikounu uro.

²²Musa bin ociko wu pi kepere (likame pien kop noni oudo wok kibut Musa, do oudo ewok kibut joakwari), di wun ikounu donyo kepo awobe i Ceng Sabato.

²³Ka wun ikepunu dano Ceng Sabato be tetekeny kur iturunu Iswil ka Musa, pinyo komio idokunu ger keda, be pien ango amio kom dano lung ocango Ceng Sabato?

²⁴Kur ingolunu kop di lubere kede gikame wangu neno, do ngolunu kop kede ateni.”

²⁵Pi mano, jo mogo me Yerusalem oko waco be, “Mam icuo kame kitie mono neko nono ine?

²⁶Aso en ine etie yamo obe i dier jo, do di likame kiromo yamo ne kop moro da! Benyo, karuno bedo di jotel ngeo ateteni be Kirisito en ine?

²⁷Wan ongeo kakame icuo ni owok kiye; do kame Kirisito obino, likame tie dano kame bino ngeno kakame ewok kiye.”

²⁸Yesu oko waco ne gi bala kite kame oudo epwonyo gi kede i tempulo be, “Benyo, ateteni iparunu be ingeanu, doko ingeunu kakame ango awok kiye? Do ango likame abino pi mit na kena; ngat kame oora tie kede ateni, doko wun likame ingeenu.

²⁹Ango angee, pien awok kibute, doko en kame eora.”

³⁰Kikano, gin kiko mono make; do likame tie ngatamoro kame oko keto cinge i kome, pien esawa mere oudo pwodi likame otuno.

³¹Do jo atot i ekodet oko yei en di kiwaco be, “Kame Kirisito obino, iparunu be ebino timo gianena kame kalamo kame icuo ni otimo?”

³²Iparisayon oko winyo di ekodet ngunguro i kom Yesu. Jodongo me josaseredoti kede Iparisayon oko cwano isirikalen me tempulo pi make.

³³Yesu oko waco be, “Abino medo bedo kede wu pi kare moro acecek, di do ako ot but ngat kame oora.

³⁴Ibinunu mona do likame ikounu wuda; pien kakame ango ayaro bedo iye, wun likame itwerunu bino iye.”

³⁵Iyudayan oko donyo yamo ken gi ken gi be, “Tuai inonono kame icuo ni mito ot iye, kame mio wan likame otwero ude? Mam nat emito ot but joe wa kame osarakin i dier Jogurik di eko donyo pwonyo Jogurik?

³⁶Pinyo komio en ewaco be, ‘Ibinunu mona do likame ikounu wuda,’ kede be, ‘Kakame ango abino bedo iye, wun likame itwerunu bino iye’?”

³⁷I ceng kame jiko ebaga, en ceng kame pire dwong, Yesu oko cungo di eko waco kede dwane amalo be, “Ngat kame orio oneko, ebin buta,

³⁸doko ngat kame yei ango wek emat pii. Bala kite kame iwandik kacil waco kede be, ‘Icileta me pii me kuo bino mol wok ki cuny ngat kame yei ango.’ ”

³⁹Yesu bin owaco kop noni i kom Tipo Kacil kame jo kame yei en bino udo. I kare nono oudo pwodi likame komio Tipo Kacil, pien oudo pwodi likame komio Yesu deyo.

⁴⁰Kakame kiwinyo kede kope go, jo mogo oko waco be, “Ateteni dano ni obedo enabi.”

⁴¹Jo mogo oko waco be, “Man en Kirisito.” Do jo mogo oko waco be, “Kirisito likame bino wok ki Galilaya.

⁴²Mam iwandik kacil waco be Kirisito en akwar Daudi, doko ebino wok ki Betelem, en paco kame Daudi bin bedo iye?”

⁴³Jo oko bedo kede tam opopokun i kom Yesu.

⁴⁴Jo mogo kikom gi oudo mito make, do likame tie ngatamoro kame oko keto cinge i kome.

⁴⁵Isirikalen me tempulo oko dok, di jodongo me josaseredoti kede Iparisayon oko penyo gi be, “Pinyo komio likame ikelenu?”

⁴⁶Isirikalen oko dwoko be, “Cako lem pwodi likame tie ngatamoro kame oyamo bala icuo ni!”

⁴⁷Iparisayon oko penyo gi be, “Mam kotieko rwenyo wuda?

⁴⁸Itiekunu neno ngat acel moro kikom jotel arabo kikom Iparisayon kame oyei en?

⁴⁹Do ekodet ni kalikame ngeo Iswil ka Musa, Rubanga olamo gi.”

⁵⁰Nikodemu, ngat kame oudo obedo ngat acel kikom Iparisayon, kame bin oudo ocako ot but Yesu, oko waco ne gi be,

⁵¹“Iswil wa likame yei ngolo ne dano kop di pwodi likame ber kogeo winyo yamo mere, di oko niang gikame etimo.”

⁵²Gin kiko penye be, “Ida iwok ki Galilaya? Aso somi iwandik kacil di iko bino ngeno be, likame tie enabi moro kame bino wok ki Galilaya.”

⁵³Di do ngat acelacel kikom gi oko dok paco.