Read kumam Yokana 8 Bible Online

Yokana 8 - kumam bible

Yokana 8

²Odiko sek Yesu bobo oko ot i tempulo; jo dedede oko bino bute, di en eko bedo piny eko pwonyo gi.

³Jopwony me Iswil kede Iparisayon oko kelo dako kame oudo komako di tie timo adote, di kiko kete i dier jo.

⁴Gin kiko waco ne Yesu be, “Apwony, wan omako dako noni di tie timo adote.

⁵I Iswil wan, Musa ociko wa be poore odidipo epone me mon kame timo kamano kede kide tuno to. Nan in iwaco kop nyo iye?”

⁶Gin bin kiwaco kop noni pi kino kop ki dog Yesu, tetekeny kiud kop moro kame kiromo pide iye. Yesu oko luro piny di eko wandiko kop piny kede lwete.

⁷Kakame gin kimeede kede pepenyo Yesu, en eko kiar di eko waco ne gi be, “Wek ngatamoro kikom wu kalikame tie kede dub moro bed dano me agege me uco kidi i kom dako no.”

⁸Yesu bobo oko luro di eko wandiko kop piny kede lwete.

⁹Do kakame kiwinyo kede kop mere, kiko cako ot tenge acelacel, cako kibut joadongo. Yesu oko dong kene di dako nono cungo i nyime.

¹⁰Yesu oko tingo wange di eko waco ne dako nono be, “Ani gin? Benyo, likame tie ngatamoro kongolo ni kop?”

¹¹Dako nono oko dwoko be, “Rwot, likame tie.” Yesu oko waco ne be, “Akadi ada likame abino ngolo ni kop; oti, do kur bobo itim dub.”

¹²Yesu bobo oko waco ne gi be, “Ango en lero me piny; ngat kame luba likame bino ot di etie i colo, do ebino bedo kede lero me kuo.”

¹³Di do Iparisayon oko waco ne be, “In itie jurere keni, do ijura nin likame tie kop me ateni.”

¹⁴Yesu oko dwoko be, “Akadi bed bala ango ajurere kena, do ijura na tie kop me ateni, pien ango angeo kakame ango awok kiye kede kakame atie ot iye. Do wun likame ingeunu kakame ango awok kiye arabo kakame atie ot iye.

¹⁵Wun ingolunu kop iekite me dano, do ango likame angolo ne ngatamoro kop.

¹⁶Do akadi bed bala ango angolo kop, ngolo kop nango tie me ateni, pien udo likame ango kena en kame atie ngolo kop, do ango karacel kede ngat kame oora.

¹⁷Kowandiko i Iswil wu be ijura me jo are tie me ateni.

¹⁸Ango amio ijura i koma kena, doko da Papa ngat kame oora mio ijura i koma.”

¹⁹Pi mano, gin kiko waco ne Yesu be, “Ani bo Papa ni?” Yesu oko dwoko ne gi be, “Wun likame ingeanu, akadi ngeno kiton Papa na da. Koto di oudo ingeanu, oudo koto ingeunu kiton Papa na da.”

²⁰En ewaco kope nogi di oudo etie pwony i agola me kano lim i tempulo; do likame ngatamoro oko make, pien esawa mere oudo pwodi likame otuno.

²¹Yesu bobo oko waco ne gi be, “Ango ayaro ot tenge di wun ikounu donyo mona, do ibinunu to i dub wu, pien kakame ango atie ot iye wun likame itwerunu bino iye.”

²²Di do Iyudayan oko waco be, “Icuo ni mam bino nekere kene komio ewaco be, ‘Kakame ango atie ot iye wun likame itwerunu bino iye’?”

²³En eko waco ne gi be, “Wun iwokunu ki piny, do ango awok ki malo; wun ibedunu jo me piny kan, do ango likame dano me piny kan.

²⁴Ango oudo awaco ne wu be ibinunu to i dub wu, doko ibinunu to i dub wu, kwanyo ka iyeunu be ango inononi.”

²⁵Gin kiko penye be, “In en ngai?” Yesu oko waco ne gi be, “Man en gikame atieko waco ne wu cako ki agege.

²⁶Atie kede kope atot me ayama i komu, kede gi atot kame apoore waco ne wu raco iye; do ngat kame oora tie kede ateni, doko ango atie waco ne jo me piny gikame ango awinyo kibute.”

²⁷Gin oudo likame kiko niang be Yesu oudo owaco ne gi kop kame mako Papa.

²⁸Di do Yesu oko waco ne gi be, “Ka itiekunu kiarao Wot ka dano i kom musalaba, ibinunu ngeno be ango inononi, kede be likame ango atimo gimoro i akarunikin nango kena, do ayamo gikame Papa opwonya iye.

²⁹Doko ngat kame oora tie keda; likame eweka kena; pien ango nakanaka atimo gikame yomo cunye.”

³⁰Kakame ewaco kede kope nogi, jo atot oko yei en.

³¹Yesu oko waco ne Iyudayan kame oyei en be, “Ka imeedenu kede lubo kop na, udo wun ibedunu jo kame luba me ateni,

³²doko ibinunu ngeno ateni, di ateni ko bino gonyo wu.”

³³Gin kiko dwoko ne be, “Wan ikwae ka Aburaam, doko pwodi wan likame obedo ipasoi ka ngatamoro. Dwong kop nyo komio in iwaco be, ‘Kobino gonyo wu’?”

³⁴Yesu oko dwoko ne gi be, “Ateteni, ateteni awaco ne wu be, ngat acelacel kame dubo, en edoko epasoit me dub.

³⁵Epasoit likame dong bedo i paco atwal, do awobi kame konywalo i paco dong bedo i paco atwal.

³⁶Aso, ka Wod gonyo wu, ibinunu bedo jo kogonyere ateteni.

³⁷Ango angeo be wun ibedunu ikwae ka Aburaam, do di doko imounu neka, pien idagunu kop na.

³⁸Ango awaco ne wu gikame aneno kibut Papa na, do wun itimunu gikame iwinyunu kibut papa wu.”

³⁹Gin kiko dwoko ne be, “Papa wan en Aburaam.” Yesu oko waco ne gi be, “Koto wun idwe ka Aburaam, oudo koto itimunu gikame Aburaam bin otimo.

⁴⁰Do wun nan itienu mono neka, ango dano kame awaco ne wu kop me ateni kame awinyo kibut Rubanga; likame man en gikame bin Aburaam otimo.

⁴¹Wun itienu timo gikame papa wu bin otimo.” Gin kiko waco ne be, “Wan likame nywal me epae; wan otie kede Papa wa acel, en Rubanga.”

⁴²Yesu oko waco ne gi be, “Koto Rubanga en Papa wu, oudo koto imaranu, pien ango awok kibut Rubanga; likame ango abino i mit na kena, do en kame eora.

⁴³Pinyo komio likame itienu niang gikame ango awaco? Etie kamanoni pien wun likame iyeunu kop na.

⁴⁴Papa wu en Sitani, doko cunyu mito timo gikame papa wu mito. Cako i kare me agege en ebedo nganek, doko likame ecungo i ateni, piento en eli kede ateni. Kame etie ngalo, udo etie waco gikame enao timo, piento en ebedo ngat kame ngaangalo, doko en won angalo.

⁴⁵Do wun idagunu yei ango, pien ango atie waco ne wu gi me ateni.

⁴⁶Ngai kikom wu kame karuno nyuto dub kame ango atimo? Do pinyo komio ka ango awaco ne wu kop me ateni likame iromunu yei ango?

⁴⁷Ngat kowok kibut Rubanga winyo kope ka Rubanga; wun likame iwinyunu kope kame ango awaco ne wu, pien wun likame iwokunu kibut Rubanga.”

⁴⁸Iyudayan oko dwoko ne Yesu be, “Mam etie gi me ateni ka wan owaco be in Ngasamaria, doko itie kede jwogi?”

⁴⁹Yesu oko dwoko be, “Ango ali kede jwogi; ango aworo Papa na, do wun likame iworanu.

⁵⁰Do di ango likame amo deyo pira kena, do tie ngat kame tie mono, doko en kame ebino bedo ngangolkop.

⁵¹Ateteni, ateteni awaco ne wu be, ngat kame yei kop na likame ebino bilo to atwal.”

⁵²Iyudayan oko waco ne be, “Nan wan otieko ngeno do be, ateteni in itie kede jwogi. Aburaam oto bala bin inabin da, do doko di in itie waco be, ‘Ngat kame yei kop na likame ebino bilo to.’

⁵³Iparo be in piri dwong kalamo Aburaam, kame da bin oto? Akadi inabin da oto. Iparo be in do ngai?”

⁵⁴Yesu oko dwoko be, “Ka ango amio deyo i koma kena, deyo na udo kony mere li. Ngat kame miango deyo en Papa na, en nono kame wun iwacunu be Rubanga wu.

⁵⁵Wun likame ingeunu en, do ango angee. Ka koto oudo awaco be likame angee, koto abedo ngat kame ngalo bala wun. Do ango angee doko alubo kop mere da.

⁵⁶Papa wun Aburaam bin olelo be ebino neno kare me bino na; da en eko neno di cunye oko bedo yom.”

⁵⁷Iyudayan oko waco ne be, “Pwodi likame ber mwaka nin oromo ot kany da, in do kong ineno Aburaam ki tuai?”

⁵⁸Yesu oko waco ne gi be, “Ateteni, ateteni awaco ne wu be, di pwodi Aburaam oudo li, ango oudo atie.”

⁵⁹Kikano, gin kiko kwanyo kide di kimito didipo en kede; do Yesu gire oko pwono, di eko yai tenge ki tempulo.