Read kumam Tice 10 Bible Online

Tice 10 - kumam bible

Tice 10

¹Oudo icuo moro tie Sisiria kame nyinge Kolonerio, en oudo ebedo ngadwong me ekodet me isirikalen me Itali.

²En oudo ebedo icuo kame keto cunye woro Rubanga kede jo me i ode dedede. Doko en oudo emio jo kony kede cunye lung di elego Rubanga nakanaka.

³Ceng moro acel iesawa kanyangon me otieno, en eko neno i gianyuta di malaika ka Rubanga bino bute di oko lwonge be, “Kolonerio.”

⁴En eko ngino malaika nono kede lworo, di eko waco be, “Benyo bo Rwot?” Malaika nono oko waco ne be, “Ilega kede mic nin me konyo jocan otieko tuno but Rubanga, omio en eyutuno in.

⁵Nan do cwai jo mogo Jopa pi ot omo Simoni, kame kolwongo be Petero.

⁶En etie bedo paco ka Simoni nganyong launi, kame paco mere tie i dog nam.”

⁷Kakame malaika kame bin yamo kede nono oyai kede kibute, Kolonerio oko lwongo jotic mege are, kede sirikale mere acel kame genere kikom isirikalen mege kame dare.

⁸En eko tatamo ne gi gikame malaika nono owaco ne dedede, di eko cwano gi Jopa.

⁹Oru mere di pwodi kitie i yongayo, di do kinoko bomba me Jopa, Petero oko yai tetu esawa kanyape, di eko yito malo i wi ot pi lego.

¹⁰Kec bin oko neke di eko mito gimoro me acama; do di pwodi oudo kotie iiko ne cam, en eko neno gianyuta,

¹¹eneno malo di oyabere, di gimoro tie bino piny kame cal bala esuka alac kame komako lake ongwon di kotie yololo en piny.

¹²Egere me leini dedede, kede jame kame liao alia, kede winy kame por oudo tie i esuka nono.

¹³Dwan oko winyere di waco be, “Petero, yai, neki di iko camo.”

¹⁴Do Petero oko dwoko be, “Rwot, likame kamano; pien cako ango gira pwodi likame acamo gimoro me kwer arabo gikame omunaun.”

¹⁵Petero bobo oko winyo dwan nono tien me are di ewaco ne be, “Gikame Rubanga otieko lonyo, kur bobo in ilwongo be gi me kwer.”

¹⁶Man otimere tien adek, cucuto nono di oko tingo esuka nono kotero malo.

¹⁷Di pwodi Petero oudo wie ocungo pi dwong kop me gianyuta koneeno ne, cuo kame bin Kolonerio ocwao nogo oudo tie cungo i dog erute, pien oudo kitieko pepenyo tuai kame ot ka Simoni tie iye.

¹⁸Gin kiko lwongere di kipenyo ka Simoni kame kolwongo be Petero oudo bedo kanono.

¹⁹Di pwodi Petero oudo tie mito ngeno dwong me gianyuta nono, Tipo ka Rubanga oko waco ne be, “Neningo, cuo adek tie moni.

²⁰Yai iwok piny di iko upere kede gi, kur idagi, pien ango en kame aoro gi.”

²¹Petero oko wok piny but jo nogo, di en eko waco ne gi be, “Ango inononi kame wun itienu mono. Kop nyo kokelo wu kan?”

²²Gin kiko dwoko ne be, “Kolonerio en kame ooro wa; malaika kacil oudo owaco ne be ecwai jo buti pi lwongi ioti i ode, me wek ewiny kop kame iyaro waco ne. En ebedo ngadwong me isirikalen, dano me ateni kame lworo Rubanga, kame ateker me Iyudayan yamo kope abeco i kome.”

²³Di Petero oko lwongo gi i ode pi gin bedo wele mege. Oru mere en eko yai di eko ot kede gi. Imiegu mogo i Kirisito, kame oudo tie Jopa oko upere kede gi.

²⁴Ceng kame lubo mere kiko tuno Sisiria. Kolonerio oudo tie kuro gi, doko en oudo elwongo joawade kede awotino mege karacel.

²⁵Kakame Petero oudo tie donyo kede i ot, Kolonerio oko yai pi game, di eko riebere piny i tien Petero, di eko mine wor.

²⁶Do Petero oko kiarao en di waco ne be, “Yai malo, ango da abedo dano bala in.”

²⁷Petero oko meede yamo kede Kolonerio di kitie donyo i ot. Kakame kidonyo kede i ot, kiko udo jo kame oudo ocokere kuno tot.

²⁸Petero oko waco ne gi be, “Wun kikomu ingeunu be Iswil likame yei ne Ngayudaya moro welao arabo nywako kede dano me ateker apat. Do Rubanga otieko nyuto nango be kur alwong ngatamoro be dano komunaun arabo kalikame cil.

²⁹Pi mano, i kare kame in icwao kede jo pi lwonga, ango ako bino abongo iyalongong. Nan do atie penyi gikame omio ilwonga.”

³⁰Kolonerio oko waco be, “Okato nan ceng ongwon, bala iesawa noni, ango oudo atie i oda ilega me esawa kanyangon me otieno. Kikano di icuo moro oko cungo i nyima di engapo igoen kame meny,

³¹di eko waco be, ‘Kolonerio, Rubanga otieko winyo ilega ni, doko etieko yutuno in pi kony kame in ibedo mino but jocan.

³²Pi mano, cwai jo mogo Jopa, kioti kilwong Simoni kame kolwongo be Petero. En etie ebedo i ot me icuo moro kame nyinge Simoni nganyong launi, kame ture tie i dog nam.’

³³Cucuto nono di do ango ako cwano jo pi lwongi. Aso ida iko timo ber iko nan bino. Nataman wan dedede otienu kan i nyim Rubanga, pi winyo gi dedede kame Rwot owaco ni.”

³⁴Petero oko cako yamo di ewaco be, “Atieko do nan niang kiber ateteni be Rubanga li kede apokapoka but jo.

³⁵Do i atekerin dedede, en egamo jo dedede kame wore kede kame timo gi kopoore.

³⁶Wun ingeunu kop kame riki en ecwao ne jo me Isirael, en Kop Aber me mulem, kame bin Yesu Kirisito, ngat kame obedo Rwot kame lo jo dedede en kokelo.

³⁷Kop nono en kame bin kopwonyo i piny me Yudea lung, cako ki Galilaya, ingei batisimu kame Yokana oudo owaco kop mere:

³⁸epone kame Rubanga bin oyero kede Yesu me Nasaret, di eko mine Tipo Kacil kede twer, kede da epone kame en eko ririmo kede piny di etimo bero ne jo, doko da di ecango jo dedede kame bin Sitani otweo, pien Rubanga oudo tie kede en.

³⁹Doko wan dedede otienu ijurak me gi dedede kame bin en etimo i piny me Iyudayan kede i Yerusalem. Gin bin kiko gure i kom yat di eko to.

⁴⁰Do Rubanga oko yaruno en ingei ceng adek di oko mine eneeno;

⁴¹likame but jo dedede, do but wan jo kame Rubanga oudo otieko yero pi bedo ijurak, wan jo kame bin ocamo di okounu mato kede en ingei en yaruno kikom jo oto.

⁴²Doko Yesu bin oko ciko wan pi ot tuco ejiri but jo, kede mino ijura i kome be, en nono kame riki Rubanga oyere pi bedo ngangolkop me jo akuo kede jo oto.

⁴³Inabin dedede bin omio ijura i kome be ngat acelacel kame yei en, kobino sasiro en ki dub mege pi nyinge.”

⁴⁴Di pwodi Petero oudo tie yamo, Tipo Kacil oko bino i kom jo dedede kame oudo tie winyo kop mere.

⁴⁵Jo kame kokepo, kame oudo oyei Yesu, kame oudo oupere kede Petero yai ki Jopa oko uro twatwal, pien oudo komio jo kalikame Iyudayan da giamia me Tipo Kacil.

⁴⁶Pien oudo kiwinyo di jo nogo tie yamo i leb anyen, di kimio dwongo but Rubanga.

⁴⁷Di do Petero oko waco be, “Ngai kame twero gengo jogi udo batisimu me pii, do di gida kitieko udo Tipo Kacil bala wan?”

⁴⁸Petero oko ciko be poore batiso gi i nying Yesu Kirisito. Di do kiko kwane be ber ebed kede gi pi kare moro acecek.