Read kumam Tice 11 Bible Online

Tice 11 - kumam bible

Tice 11

¹Joor karacel kede jokirisito kame oudo tie Yudea, oko winyo be jo kalikame Iyudayan da oudo oyei kop ka Rubanga.

²Kakame Petero ooto kede Yerusalem, jo kame bin tie i ekodet kame gango kop me akepo oko bunano en di kiwaco be,

³“Pinyo ber komio in iko ot bedo kede jo kalikame kokepo, di bobo iribo kede gi cam?”

⁴Do Petero oko cako tatamo ne gi gikame otimere dedede i yore i yore di ewaco be,

⁵“Ango oudo atie ilega i bomba me Jopa, gianyuta oko neeno na, di ako neno gimoro kame cal bala esuka kame lac, di kotie yololo en piny kede lake ongwon, di eko tuno piny buta.

⁶Ango ako ngice kiber ako neno leini apapat kame kopito i paco kede me obar, kede leini kame liao alia, kede winy kame por da di tie iye.

⁷Di ako winyo dwan di waco na be, ‘Petero, yai; neki iko camo.’

⁸Do ango ako waco be, ‘Rwot, likame kamano; pien cako ango gira likame pwodi acamo gimoro me kwer arabo gikame omunaun.’

⁹Do dwan nono oko dwoko nango tien me are ki malo be, ‘Gikame Rubanga otieko lonyo kur bobo ilwongo be gi me kwer.’

¹⁰Man otimere tien adek, di bobo oko dwoko ginogo dedede malo.

¹¹Iesawa nono cuo adek kame bin kocwao buta ki Sisiria oko tuno i ot kame wan oudo obedo iye.

¹²Di Tipo ka Rubanga oko waco na be aupere kede gi abongo cuny me apokapoka. Jo kanyape kame obedo jo koyei Kirisito nogi da oko upere keda, di oko ot oko donyo i ot ka Kolonerio.

¹³En eko tatamo ne wa epone kame en oudo eneno kede malaika di tie cungo i ode di ewaco be, ‘Cwai ngatamoro Jopa, eoti ekel Simoni kame kolwongo be Petero;

¹⁴en ebino waco ni kop kame bino mini iudo alako, in karacel kede jo me i odi.’

¹⁵Kakame ango ako cako kede yamo, Tipo Kacil oko bino i kom gida bala kite kame bin ebino kede i kom wada i agege.

¹⁶Ango di do ako yutuno kop kame bin Rwot owaco be, ‘Yokana bin batiso jo kede pii, do wun kobino batiso wu kede Tipo Kacil.’

¹⁷Aso, ka Rubanga oko mino giamia acel nono but jo kalikame Iyudayan, bala kite kame bin emio kede but wada i kare kame wan bin oyei kede Rwot Yesu Kirisito, ango do oudo abedo ngai kame koto ako twero gengo Rubanga?”

¹⁸Kakame kiwinyo kede kop no, kiko do ling atwal. Di kiko donyo do pako Rubanga di kiwaco be, “Rubanga do otieko mino iswilar me donyo i kuo kiton but jo kalikame Iyudayan da.”

¹⁹Kikano jo kame bin osarakin pi itidil kame oudo otimere i kare kame koneko kede Sitepano oko ot paka Poenisia, Sipuro kede Antiokia; di kitatamo kop i kom Rwot Yesu ne Iyudayan kenekene.

²⁰Do oudo tie jo mogo kikom gi kame bin oyai ki Sipuro kede ki Sirene, kame oko yamo kede Jogurik da, di kitatamo kop i kom Rwot Yesu i kare kame kituno kede Antiokia.

²¹Twer ka Rwot oudo tie kede gi, di jo atot oko yei di kiko lokere but Rwot.

²²Rwonge me gikame otimere noni oko winyere but ekodet me jokirisito i Yerusalem, di gin kiko cwano Baranaba Antiokia kunono.

²³Kakame bin Baranaba otuno kede kuno di eko neno epone kame Rubanga onyuto kede kisa mere but jo, cunye oko bedo yom di eko kwano cuny gi pi gin dong jo kame genere i Rwot kede tam kosipakin.

²⁴Pien Baranaba oudo obedo dano aber, kame opong kede Tipo Kacil doko di etie kede yei. Jo atot oko meede i kom jo koyei Rwot.

²⁵Di do Baranaba oko yai ot Taruso pi mono Saulo;

²⁶kakame eude kede, en eko kele Antiokia. Saulo kede Baranaba oko bedo kuno pi mwaka acel lung, di kiriamakin kede ekodet me jokirisito, kiko pwonyo ekodet me jo atot. Antiokia kanono en kame oko cako lwongo kiye josiao be jokirisito.

²⁷I kare nono, inabin oko wok ki Yerusalem oko bino Antiokia.

²⁸Ngat acel kikom gi, kame oudo nyinge Agaba oko yai malo, Tipo Kacil oko tele, di eko tuco be kec adwong bino poto i piny lung; man oko timere i kare ka Kulaudio.

²⁹Di do ngat acelacel kikom josiao oko keto cunye cwano giamia me kony but jo koyei Kirisito kame oudo tie Yudea, di lubo kede kite kame ngat acelacel oudo twero kede.

³⁰Gin bin kiko timo kamanono, kiko cwano kony but joadongo di beo i cing Baranaba kede Saulo.