Read kumam Tice 16 Bible Online

Tice 16 - kumam bible

Tice 16

¹Paulo oko ot Derube kede Lisitura. Ngat acel kame oudo lubo pwony ka Yesu, kame nyinge Temeseo, oudo tie kuno. Toto me Temeseo oudo obedo Ayudayat koyei Kirisito; do papa mere oudo obedo Ngagurik.

²Imiegu kede amiegu i Kirisito, kame oudo tie Lisitura kede Ikoniam oudo pwoyo be en eber.

³Paulo oudo mito upere kede Temeseo, omio en eko tere eko mino kokepe; pien Iyudayan kame tie i kabedo nogo oudo ngeo be papa me Temeseo obedo Ngagurik.

⁴I kare kame gin bin kioto kede di kibebeo i bomban, oudo kimio jo koyei Kirisito ngeno kope kame joor kede joadongo kame bin tie Yerusalem omoko, kame poore ne gi lubo.

⁵Mano oko mino ikodeta me jokirisito oko doko tek i yei, di wel gi oko donyo meede ceng acelacel.

⁶Paulo gini oko ot di kibeo i adul me Purigia kede Galatia, pien Tipo Kacil oudo likame oyei ne gi tuco ejiri i Esia.

⁷Kakame kituno kede kabedo kame pimaun kede Musia, kiko tamo bala koto kioto Bisinia, do Tipo ka Yesu oko gengo gi.

⁸Omio kiko beo ki Musia, di kiko lor Turoa.

⁹Di do gianyuta ka Rubanga oko nyutere ne Paulo iwor: en eko neno dano me Makedonia di cungo, di bako ne doge be, “Okwe bia Makedonia i kony wa.”

¹⁰Kakame Paulo otieko neno kede gianyuta ka Rubanga, cucuto nono wan oko mito meede kede ot Makedonia, pien wan oudo otieko niang kiber be Rubanga olwongo wa pi tuco ne gi ejiri.

¹¹Wan oko kwang yai ki Turoa, di oko tenaro yongayo ooto Samoturoke; oru mere di oko ot Neapoli.

¹²Oko yai ki kuno oko ot Pilipi, kame oudo obedo bomba adwong i Makedonia, kame bin Joroma oudo pugo. Wan ber oko do bedo kuno pi ceng mogo.

¹³Di do oko yai Ceng Sabato, oko donyo ooko me erute me bomba, di oko tuno i dog ecilet kakame wan oudo oparo be jo lego iye; oko bedo piny di oko donyo yamo kede mon mogo kame oudo ocokere kuno.

¹⁴Ngat acel kikom jo kame oudo tie winyo kop wa en dako kame nyinge Lidia. En oudo eyai ki bomba me Tuatira, tic mere bin obedo cato igoen akwakwar; en oudo eworo Rubanga. Rwot oko yabo cunye pi winyo gikame Paulo oudo owaco.

¹⁵Ingei batiso en karacel kede jo me i ode dedede, Lidia oko ngangao wa di ewaco be, “Ka wun itiekunu neno be ango atie kede yei i kom Rwot, bia ibedunu i oda.” Tam mere oko bwono merwa.

¹⁶Ceng moro acel di wan oudo otie ot kakame jo lego iye, oko riamo kede nyako apasoit moro kame oudo tie kede tipo kame mie tuco kop komungere, doko en oudo ekelo ne jodongo mege lim alac pi tic mere me tuco ne jo gikame bino timere ne gi.

¹⁷En eko donyo lubo Paulo karacel kede wan di elelemo be, “Jogi en jotic ka Rubanga Ngamalo Twal, kame tie tatamo ne wu epone me udo alako.”

¹⁸Etimo kaman pi ceng atot. Do Paulo cunye oko wang, eko lokere but nyako nono di eko waco ne tipo nono be, “Aciki i nying Yesu Kirisito, yai tenge ki kom nyako no.” Esawa nono di tipo nono yai ki kome.

¹⁹Do kakame bin jodongo mege oneno kede be gen gi me udo lim otieko jik, kiko mako Paulo kede Sila di kiko peno gi kitero gi i nyim jopug i atale.

²⁰Kakame kitieko tuno kede gi i nyim jongolkop, gin kiko waco be, “Cuo gi obedo Iyudayan, doko kitie lolo jo i bomba wa.

²¹Gin kikelo pwony kame mako itok mogo kame wan Joroma iswil dagi ne wa gamo arabo lubo.”

²²Ekodet da oko donyo i kop me suro gi, di do jongolkop oko nyinyilo igoen ki kom Paulo kede Sila, di kiko mino kobungo gi kede lilime.

²³Ingei bungo gi kitek, kiko rwako gi i otkol, di kiciko sirikale kame daro mabus pi daro gi kiber.

²⁴Kakame sirikale kame daro mabus owinyo kede cik noni, en eko rwako gi i agola me diere me otkol, di eko tweno tien gi i kom gikame pek.

²⁵Do i dier iwor me ceng nono, Paulo kede Sila oudo tie ilega kede wero were me pako Rubanga, di mabus icegun winyo.

²⁶Cucuto nono piny oko yangere, di otkol oko yangere kiton i dude piny; di do ikekon dedede oko yabere. Irikoi oko gony ki tien mabus dedede.

²⁷Kakame ngadar mabus ocei kede di eko neno be ikekon dedede me otkol oyabere, en eko woto epima mere be koto ecobere kede kene me wek etoi, pien oudo eparo be mabus otieko lwi.

²⁸Do Paulo oko redo kede dwan amalo be, “Kur icobere keni pien wan dedede otie kan.”

²⁹En eko lwongere be kel mac, di eko onyaro i yi ot di kome tie miel pi lworo, eko riebere piny i nyim Paulo kede Sila.

³⁰En eko kelo gi ooko di eko penyo gi be, “Jodongo na, atim nyo me wek aud alako?”

³¹Gin kiko dwoko ne be, “Yei Rwot Yesu, di iko bino udo alako, in karacel kede jo me i odi.”

³²Di kiko donyo tuco ne kop ka Rwot, en karacel kede jo dedede kame oudo tie i ode.

³³En eko tero gi iesawa me iwor nono, di eko donyo lwoko wang aporeso gi, di do oko batiso en esawa nono, en karacel kede jo me i ode dedede.

³⁴Kikano en eko tero Paulo kede Sila i ode, di eko mino gi cam. En karacel kede jo me i ode kiko bedo kede kilel adwong piento en eyei Rubanga.

³⁵Do kakame piny oru kede, jongolkop oko cwano isirikalen di kiwaco be, “Wekunu jogo oti.”

³⁶Di ngadar mabus oko tero ne Paulo kop be, “Jongolkop ocwao kop be wek wu iotunu; pi mano nan wokunu iotunu kede mulem.”

³⁷Do Paulo oko dwoko ne gi be, “Gin kibungo wan i dier jo abongo kop kame ongolo ne wa, wan Joroma, di kiko rwako wa i otkol; benyo, nan do kimito be gonyo wa i mung? Likame twerere! Wek gin ikom gi kibin igony wa.”

³⁸Isirikalen ka oko tero kope nogi ne jongolkop. Jongolkop oko bedo kede lworo kakame kiwinyo kede be Paulo gini obedo Joroma.

³⁹Omio kiko bino but Paulo gini di kiko kwano be sasiro gi. Kiko woto gi ooko ki otkol, di kiko waco ne gi be kiyai kiwek bomba.

⁴⁰Gin kiko wok ki otkol di kiko ot welao Lidia. Kakame kiriamo kede imiegu kede amiegu i Kirisito, kiko dino cuny gi, di do kiko yai.