Read kumam Tice 17 Bible Online

Tice 17 - kumam bible

Tice 17

¹Paulo gini oko ot di kibeo ki Amipipoli kede Apolonia, kiko tuno i bomba me Tesalonika, kakame oudo sinagoga tie iye.

²Paulo oko donyo i ot bala kite kame lem oudo enare timo kede, en eko piem kede gi pi Sabato adek di esomo ne gi iwandik kacil.

³En oudo egonyo ne gi dwong kop me iwandik kacil, di enyuto ne gi be Kirisito oudo miero nen can di eko yaruno kikom jo oto. Doko ewaco be, “Yesu kame ango apwonyo wu kop i kome noni en kame obedo Kirisito.”

⁴Jo mogo kikom gi oko yei kop noni, di kiko donyo but Paulo kede Sila, bala kite kame Jogurik atot kame bin woro Rubanga, karacel kede mon atot kame bin koworo otimo kede.

⁵Do nyeko oko mako Iyudayan, omio kiko ot raro jo kame kite gi reco, di kiko coko gi i ekodet. Di do kiko kelo woo atek i dier bomba. Kiko ot suro paco ka Yasoni di oudo kimito be kiwot Paulo kede Sila ooko but jo.

⁶Kakame likame kitwero udo gi kede, gin kiko pere kede Yasoni karacel kede jo mogo koyei, kiko tero gi i nyim jotel me bomba di kiwaco be, “Cuo kototolo piny ige, doko nan kibino kan da,

⁷di Yasoni oko gamo gi. Gin dedede kitie timo gi kalikame upere kede iswil ka Kaisari, pien gin kiwaco be abaka ace tie kame nyinge Yesu.”

⁸Jo karacel kede jotel me bomba wi gi oko dubere kakame kiwinyo kede kop no.

⁹Kiko mino Yasoni kede jo icegun oculo sente kame mitere pi gonyo gi, di kiko weko gi kioto.

¹⁰Iwor nono, jo koyei Kirisito oko cwano Paulo kede Sila Berea. Kakame kituno kede kuno, gin kiko ot kidonyo i sinagoga me Iyudayan.

¹¹Iyudayan me Berea nogi oudo obedo jo kame beco kalamo Iyudayan me Tesalonika, pien gin oudo kigamo kop ka Rwot kede cuny gi lung, di kingingico iwandik kacil ceng dedede pi mito neno ka gigi tie kop me ateni.

¹²Manono oko mino jo atot kikom gi oko yei, karacel kede mon atot me Jogurik kame pirgi tek kede cuo da.

¹³Do kakame bin Iyudayan me Tesalonika owinyo kede be Paulo doko oudo odonyo tuco kop ka Rubanga i Berea, kiko ot kuno da di kiko rubo wi jo di kisupo gi i kom gi.

¹⁴Cucuto nono di do jo koyei Kirisito oko cwano Paulo ooto i dog nam, do Sila kede Temeseo oko ber dong Berea.

¹⁵Jo kame bin onyamaro Paulo oko upere kede en paka tuno Asene. Paulo oko ciko gi be miero Sila kede Temeseo bin bute awakawaka, gin di do kiko dok.

¹⁶Kakame Paulo oudo tie kuro kede Sila kede Temeseo i Asene, cunye oko dubere pi neno be cal jwogi oudo opong i bomba nono.

¹⁷Omio Paulo oko donyo piem kede Iyudayan i sinagoga gi karacel kede jo ace kame oudo woro Rubanga. Doko ceng dedede en oudo epiemo i atale kede jo kame oudo tie kuno.

¹⁸Jorieko amalo kame bin tie i ekodet me Epikuria kede Sitoik oko riamo kede Paulo, mogo kikom gi oko penyere be, “Icuo kame yamo mingomingo ni da twero yamo kop nyo?” Jo icegun oko waco be, “Ineno bala etie tatamo kop i kom rubangan mogo me kumbor.” Gin kiyamo kamano pien Paulo oudo tie pwonyo kop i kom Yesu kede iyarun.

¹⁹Gin kiko make di kiko tere i nyim kansulo me Areopaga, di kiko waco ne be, “Mi wa ongei dwong me pwony anyen kame in ikelo noni.

²⁰Pien in ikelo gimogo anyen kame wan lem pwodi likame owinyo. Pi mano, wan omito be ongei dwong gi.”

²¹Oudo jo me bomba me Asene karacel kede jokumbor kame bin bedo kuno, tero kare gi i tatamo kede winyo kope mogo anyen kenekene.

²²Kikano Paulo di do oko cungo i dier kansulo me Areopaga di eko waco be, “Wun jo me Asene, ango atieko neno be wun ibedunu joedini i yote dedede.

²³Pien kakame ango abedo bebeo kede di angingico jame kame wun iworunu, ako da udo alutari moro kame tie kede iwandik kame waco be, ‘But rubanga kalikame ngere.’ Pi mano, gikame wun iworunu kalikame kongeo nono en ine kame ango atie tuco ne wu kop i kome.

²⁴En ebedo Rubanga kame ocweo piny kede jame dedede kame tie iye. Bala kite kame en Rwot me malo kede piny, likame ebedo i iroro kame dano en kogero.

²⁵Doko likame emito giamia kame cing dano mie, ineno bala en oudo emito gimoro; piento en nono kame emio jo dedede kuo, kede wei, kede gi dedede.

²⁶En bin ecweo atekerin dedede pi bedo i wi lobo lung di kiyai kibut dano acel, ingei en poko ne gi kare me kuo gi kede ikor me kabedo gi.

²⁷En etimo kaman tetekeny kimoe kede gen be amoto kibino rarapo en di kiko ude. Do akadi da, Rubanga likame bor kede ngat acelacel kibut wa.

²⁸Pien kowandiko be, ‘Wan okuo, doko ooto, kede otie pi en’; bala kame jotet were wu mogo owaco kede be, ‘Pien wada obedo nywal mege.’

²⁹Bala kite kame wan obedo kede anywali mege, miero kur opar be Rubanga cal kede Saabu, arabo Siliba, amotoko engaro, cal kame dano oluro i tam mere.

³⁰Rubanga otieko weko kop me kare kame bin jo kwie kede nono, do nan eciko jo dedede me kabedo dedede pi swilaro,

³¹piento en etieko cibo ceng kame en ebino ngolo ne kede jo me piny kop kede ateni. Dano kame en etieko yero en kame bino timo man, doko en etieko moko kop noni but jo dedede di eyaruno dano nono kikom jo oto.”

³²Kakame kiwinyo kede Paulo di yamo kop i kom iyarun, mogo kikom gi oko donyo nyero nyero me anywar, do mogo oko waco be, “Wan obino medo winyo kope nogi kibuti bobo.”

³³Di do Paulo oko yai kibut gi di eko ot.

³⁴Do jo mogo oko donyo bute kiko yei Yesu. Kikom gi oudo tie iye Dionisio dano me Areopaga, karacel kede dako kame oudo nyinge Damari, kede jo apat da.