Read kumam Tice 18 Bible Online

Tice 18 - kumam bible

Tice 18

¹Ingei mano, Paulo oko yai ki Asene di eko ot Korinti.

²Kakame etuno kede kuno, en eko udo Ngayudaya moro kame nyinge Akwila, kame oudo obedo anywali me Pontu. Akwila oudo pwodi obino abina ki Itali, en kede cege kame nyinge Purisila, pien Kulaudio oudo owoto cik be Iyudayan dedede yai tenge ki Roma. Paulo oko ot neno gi.

³Bala kite kame eda oudo etimo kede tic acel nono me timo kima me eema, omio en eko bedo timo tic kede Akwila gini, pien tic kame kelo ne gi sente oudo inonono.

⁴Paulo oudo piemo i sinagoga Ceng Sabato acelacel, di eloko tam me Iyudayan kede Jogurik.

⁵Kakame Sila kede Temeseo otuno kede Makedonia, kiko udo Paulo ojalo kare mere lung tuco ejiri, di emio ijura but Iyudayan be Yesu en Kirisito.

⁶Do kakame gin kijemo ne kede di kiyeyeto en, Paulo oko tetengo igoen mege di ewaco ne gi be, “Remo wu dong i wi wu! Ango ali kede raco moro. Doko cako nan ango abino do ot but jo kalikame Iyudayan.”

⁷En eko yai ki kuno di eko ot i ot me icuo kame nyinge Tito Yusito, icuo kame bin woro Rubanga, kame ode oudo iyapiyapi kede sinagoga.

⁸Kirisipo, kame bin obedo ngatel me sinagoga, oko yei Rwot karacel kede jo me i ode dedede. Doko jo atot me Korinti kame bin owinyo pwony ka Paulo oko gida yei, di oko batiso gi.

⁹Di Rubanga oko yamo ne Paulo iwor acel i gianyuta be, “Kur ibed kede lworo, do yami, doko kur ilingi,

¹⁰pien ango atie kedi. Likame tie ngatamoro kame bino suri di eko mini awanon, pien ango atie kede jo na tot i bomba noni.”

¹¹Paulo oko bedo kuno pi mwaka acel kede dwete kanyape, di epwonyo gi kop ka Rubanga.

¹²Do i kare kame Galio oudo tie kede ngapug adwong me Akaya, Iyudayan oko ribere karacel suro Paulo, kiko make di kiko tere pide i nyim ekiko

¹³di kiwaco be, “Icuo ni tie loko tam me jo pi woro Rubanga, iepone kame iswil likame yei.”

¹⁴Do kakame Paulo oudo mito cako kede yamo, Galio oko waco ne Iyudayan be, “Okwecunu Iyudayan, ka koto di oudo man kop kame mako tim moro arac arabo turo iswil, koto nan ango ayei kanyakino winyo pido wu di atie kede kacungo.

¹⁵Do bala kite kame pido wu mako kede piem i kom kope mogo kede nying, kede iswilia wu, wun tiekenu kenu. Ango adagi ngolo kop iye.”

¹⁶En eko riamo gi tenge ki nyim ekiko.

¹⁷Gin dedede kiko mako icuo kame nyinge Sosetene, kame oudo telo sinagoga, di kiko bunge i nyim ekiko kanono. Do Galio likame oko keto tam mere iye.

¹⁸Ingei mano, Paulo oko ber bedo kede jo koyei Kirisito pi ceng atotot, di eko yai eweko gi, kiko kwang kioto Siria, gin karacel kede Akwila kede Purisila. I kare kame kituno kede Kenkerea, Paulo oko lielo wie, piento en bin ekwongo.[4]

¹⁹Di bin kituno Epeso, en eko weko Akwila kede Purisila kuno, eko ot i sinagoga, di eko donyo piem kede Iyudayan.

²⁰Gin kiko kwane be ber ebebedo kede gi, do en eko dagi.

²¹Do esawa kame oudo etie yai kede, en eko waco ne gi be, “Ango abino dwogo butu ka Rubanga oyei.” Di do en eko kwang eyai ki Epeso.

²²Kakame etuno kede Sisiria, en eko ot moto ekodet me jokirisito, di do eko ot elor Antiokia.

²³Ingei tieko kare moro acecek kuno, en eko yai di eko donyo ririmo adulion me Galatia kede Purigia, di emio jo kame lubo Kirisito tekcuny.

²⁴Kikano Ngayudaya kame nyinge Apolo, kame oudo bin obedo anywali me Alekesanderia, oko bino Epeso. En oudo ebedo icuo kame ngeo yamo kiber doko di engeo kope me iwandik kacil twatwal.

²⁵En oudo kopwonye kiber i kom kop kame mako Yongayo ka Rwot. Doko pi kite kame en oudo eketo kede cunye kitek, omio en eko yamo kop i kom Yesu doko di epwonyo i yore i yore, bed bala oudo en engeo batisimu ka Yokana kenekene.

²⁶En bin eko cako yamo i sinagoga abongo lworo. Do kakame Akwila kede Purisila owinyo kede kop mere, gin kiko tere di kiko tatamo ne kop kame mako Yongayo ka Rubanga odocon.

²⁷Kakame en eko bedo kede mit me ot Akaya, jo koyei Kirisito oko mine tekcuny, di kiko wandiko baluwa kuno ne jo kame lubo Kirisito pi game. Kakame Apolo otuno kede kuno, en eko konyo adikinicel jo kame bin oyei Kirisito pi kisa ka Rubanga.

²⁸Piento en oudo epiemo kede Iyudayan kitek di eko bwono gi i nyim jo, di enyuto ne gi i iwandik kacil be Yesu en Kirisito.