Read kumam Tice 22 Bible Online

Tice 22 - kumam bible

Tice 22

¹“Imiegu na kede joapapi na, winyunu ber pido kame nan akelo i nyimu.”

²Kakame kiwinyo kede Paulo di tie yamo kede gi i leb Eburania, kiko do temuno ling kiber. Di Paulo oko waco be,

³“Ango Ngayudaya, konywala i Taruso, bomba kame tie Kilikia, di Gamaliel en kame oko pwonya i bomba noni me Yerusalem. Apwonyere iepone me daro Iswilia ka joakwari wa kiber, di aketo cunya i kom Rubanga bala kite kame wuda dedede itimunu kede i kare kanataman.

⁴Ango atidilo jo kame bin lubo Yongayo noni, tuno kede neko gi da. Atweo cuo kede mon di arwako gi i otkol.

⁵Ngatel Josaseredoti kede kansulo me joadongo me piny twero jurao ango. Bin ango agamo baluwa kibut gin, kame kowandiko but imiegu kame tie Damasiko, di ango ako ot kuno pi mako jo kame lubo Yongayo noni, di ako tweno gi ako kelo gi Yerusalem me wek mi gi alola.

⁶“Kakame ango oudo atie ot kede di do anoko Damasiko, tetu esawa kanyape me iceng, asara moro atek kame owok ki malo oko ngoole cara.

⁷Ango ako poto piny di ako winyo dwan kame waco na be, ‘Saulo, Saulo, pinyo komio in itie tidilo ango?’

⁸Ango ako dwoko ne be, ‘In ngai, Rwot?’ En eko waco na be, ‘Ango en Yesu me Nasaret kame in itie tidilo.’

⁹Jo kame bin upere keda oneno asara nono, do likame kiko winyo dwan ngat kame oudo tie yamo keda.

¹⁰Ango di ako penye be, ‘Rwot, nan do atim nyo?’ Di Rwot oko dwoko na be, ‘Yai iko ot Damasiko di oko bino waco ni gi dedede kame koiko pi in timo.’

¹¹Kite kame oudo likame akaruno neno kede piny pi rieny me asara nono, jo kame bin upere keda nogo oko mako cinga di kiko pena kikela tuno Damasiko.

¹²“Icuo moro kame nyinge Anania, dano kame bin woro Rubanga, doko di elubo Iswilia wa oudo tie kuno. Iyudayan dedede kame bin bedo Damasiko oudo pwoye be eber.

¹³En eko bino buta eko cungo i ngeta di eko waco na be, ‘Omina Saulo, cak bobo neno piny.’ Esawa nono di wanga yabere, di ako nene.

¹⁴Anania oko waco na be, ‘Rubanga ka joakwari wa otieko yeri pi ngeno gikame en emito, pi neno Dano Kopoore kede pi winyo kop kame wok ki doge.

¹⁵Pien in ibino bedo ijura mere but jo dedede i kom gikame ineno kede kame iwinyo.

¹⁶Nan do itie daro nyo? Yai batiso in, di ilwongo nying Rwot me wek lwok dub ni.’

¹⁷“I kare kame ango bin adwogo kede Yerusalem, ako neno gianyuta di oudo atie ilega i tempulo.

¹⁸Aneno Rwot di waco na be, ‘Susunyo yai tenge ki Yerusalem, pien jogi likame oyaro yei kop kame in itie yamo i koma.’

¹⁹Ango ako dwoko ne be, ‘Rwot, gin ikom gi kingeo be ango bin abungo jo koyei in i sinagoga acelacel, doko di arwako gi i otkol.

²⁰Doko i kare kame koonyo kede remo ka Sitepano, ngat kame oudo obedo mujura ni, ango da oudo atie cungo kanono di apwoyo tim gi nono, doko di adaro igoen me jo koneke.’

²¹Di en eko waco na be, ‘Yai ioti, pien ango ayaro cwani kakabor but jo kalikame Iyudayan.’ ”

²²Jo oudo obedo ciko yit gi winyo yamo ka Paulo tuno kede i kop me ajikini noni. Di do kiko donyo redo di kiwaco be, “Poore rweny kede epone me dano ni ki lobo kan! Pien likame poore ne kuo.”

²³Kakame oudo gin kicelakino kede di kikwito igoen gi malo, doko di kidunyo apua,

²⁴ngadwong me isirikalen oko ciko be ter Paulo i paco me isirikalen. En eko mino dwan be dae di kopepenyo en pi udo niang i kom gikomio jo oudo tie woo i kome kamano.

²⁵Do kakame gin oudo kitieko twene kede auno, Paulo oko penyo ngadwong me isirikalen kame oudo tie cungo kuno be, “Iswil yei ne wu dano ngat kobedo Ngaroma i anywali mere, doko da di pwodi likame kongolo ne kop?”

²⁶Kakame ngadwong me isirikalen owinyo kede kop noni, en eko ot but ngadwong kame lo isirikalen dedede di eko penye be, “Nyo kame in imito timo? Icuo ni obedo anywali me Roma.”

²⁷Ngadwong kame lo isirikalen dedede oko bino but Paulo di oko penye be, “Waca ber, in ibedo anywali me Roma?”

²⁸Paulo oko dwoko ne be, “Ebo.” Ngadwong kame lo isirikalen oko dwoko ne be, “Ango aculo sente alac pi bedo anywali me Roma.” Paulo oko waco ne be, “Do ango konywala iye anywala.”

²⁹Cucuto jo kame bin tie mito pepenyo en oko sarakin oweke; kiton ngadwong kame lo isirikalen da oko doko lwor, pien oudo eniang be oudo etweo Paulo, dano kame obedo anywali me Roma.

³⁰Oru mere, ngadwong kame lo isirikalen dedede oudo mito ngeno nyo kikokome komio Iyudayan opido Paulo. En eko gonyo Paulo di eko ciko jodongo me josaseredoti kede kansulo lung pi ariamakin. Di do en eko tero Paulo di eko keto i nyim gi.