Read kumam Tice 28 Bible Online

Tice 28 - kumam bible

Tice 28

¹Ingei wan bwot, oko niang be cula nono oudo kolwongo be Melita.

²Jo me kuno oko timo ne wa bero moro kalikame wacere; gin kimoko mac di kiko lwongo wa iye, pien oudo kot ogeo cwei piny oko doko ngic.

³Paulo oudo oraro rido mogo me yen di eko keto gi i mac, cucuto nono di emosoga oko wokun ki rido nogo pi lworo lieto me mac, di eko tukere i cing Paulo.

⁴Kakame anywali me kuno oneno kede twol nono di ledo i cing Paulo, kiko donyo yamo ken gi ken gi be, “Ateteni icuo ni obedo nganek. Bed bala ebwot ki nam do ngolo kop me ateni otieko dagi ne kuo.”

⁵Do Paulo oko lakaro twol nono i mac abongo awanon moro.

⁶Gin kiko donyo daro neno di kigeno be kom Paulo oyaro amumurun, arabo oudo eyaro poto piny di eko to. Do kakame kikuro kede kwe, di likame kineno gimoro arac kotimere ne, kiko loko tam gi, di kiko waco be Paulo obedo rubanga.

⁷I ngete i ngete kanono, oudo tie iye lobo me icuo moro kame nyinge Pubulio, kame oudo obedo ngapug me cula nono. En egamo wa di eko gwoko wa kiber pi ceng adek.

⁸I kare kame wan oudo otie kede kuno, papa me Pubulio oudo tie i apien, pien musuja kede cado oudo omake. Paulo oko ot bute pi nene di eko lego ne, di eketo cinge i wie; en eko cango.

⁹Kakame gini otimere kede, jo icegun kame oudo tuwo i cula nono oko gida bino di Paulo oko cango gi.

¹⁰Kiko mino wa giamia atot. Kakame wan oyai kede pi kwang, gin kiko keto gi dedede kame wan oudo omito i emeri.

¹¹Ingei dwete adek, oko yai ot kede emeri moro me Alekesanderia kame nyinge Imiegu Ibangin, kame oudo odong i cula nono i kare me ngico me piny.

¹²Kakame otuno kede Sirakuse, oko bedo kuno pi ceng adek.

¹³Di do oko yai ki kuno oko kwang ooto Regio. Ingei ceng acel, yamo me tetu piny oko donyo buko, di wan oko tuno Puteoli i ceng me are.

¹⁴Ki kuno, oko udo jo koyei Kirisito, di gin kiko kwano wa be ber obed kede gi pi sabiti acel. Wan di do oko tuno Roma.

¹⁵Kakame jo koyei Kirisito i Roma owinyo kede kop i kom wa, gin kiko bino tuno i atale me Apaya kede kabedo kame kolwongo be Ude Adek me gamo wele, pi riamo kede wa. Kakame Paulo oneno gi kede, en eko mino pwoc but Rubanga di do eko bedo kede nwangcuny.

¹⁶I kare kame wan do otuno kede Roma, jotel oko yei ne Paulo bedo kene di sirikale acel erume en kame do dare.

¹⁷Ingei ceng adek, Paulo oko lwongo jotel me Iyudayan kame tie Roma karacel. Kakame kicokere kede, en eko waco ne gi be, “Imiegu na, bed bala likame ango atimo gimoro arac but jo wa, akadi i kom itok me joakwari wa, do komia abedo mabus i Yerusalem, di oko jala i cing Joroma.

¹⁸Kakame kitieko ngingico kede kop na, kiko bedo kede mit me gonya, pien likame oudo kiudo kop moro arac i koma, kame romo mino kongolo na kop me to.

¹⁹Do kakame Iyudayan ocere kede, manono oko dina juro pido na but Kaisari, bed bala ango oudo likame atie kede kop moro kame aromo pido ateker na iye.

²⁰Kop noni en komio ango akwao be, ber anen wu di ako yamo kede wu. Pien gen me jo Isirael en komio ango nan atie i epingo noni.”

²¹Gin kiko waco ne be, “Wan likame oudo baluwa moro kame wok ki Yudea kame waco kop i komi, doko likame tie ngatamoro i kom imiegu wa kame obino kan kede rwonge moro arabo kame owaco kop moro arac i komi.

²²Do wan omito winyo tam nin, pien i kom kop kame mako ajange noni, wan ongeo be jo yamo kop arac i kome i kabedo dedede.”

²³Kakame kitieko moko kede ceng kede Paulo, cenge nono gin kiko bino di kitot kakame en oudo ebedo iye. Di Paulo oko yeko ne gi kop dedede i yore i yore, cako me odiko tuno piny yuto, di etatamo ne gi kop kame mako Ajakanut ka Rubanga, di etamakino loko tam gi i kom Yesu, di ejuro kop me Iswil ka Musa kede iwandik me inabin.

²⁴Jo mogo oko yei kede kop kame oudo ewaco, do mogo oko dagi.

²⁵Aso kite kame tam gi oudo opokere kede, kiko sarakin ingei Paulo waco be, “Tipo Kacil oudo oyamo ne joakwari wu kop me ateni i dog enabi Isaya be,

²⁶‘Oti but jogo di iko waco ne gi kaman: Ateteni jogi bino winyo kop do likame kiko niang, kede kibino ngino do likame kiko neno.

²⁷Pien wi gi odoko pek, kede kiculo yit gi da kur winy kop, doko kimio wang gi da; ka koto oudo likame kamanono, koto wang gi okaruno neno, doko yit gi da koto owinyo, kede koto wi gi da oniang, di kiko lokere buta di ango ako cango gi.’ ”

²⁸“Poore ingeunu be, kop me alako noni kotieko cwano ne jo kalikame Iyudayan; gin kibino winyo di kiko yei.”

²⁹(Kakame etieko yamo kede kope nogi, Iyudayan oko asarakin di kitie kede piem atek i diere gi.)

³⁰Paulo oko bedo kuno pi mwakini are di eculo garama mere en kikome, di egamo jo dedede kame bino bute.

³¹En oudo epwonyo gi kop kame mako Ajakanut ka Rubanga di ewaco kop i kom Rwot Yesu Kirisito obe abongo gikame genge.