Read kumam Tice 4 Bible Online

Tice 4 - kumam bible

Tice 4

¹Kakame Petero kede Yokana oudo tie yamo kede jo, josaseredoti kede ngadwong me isirikalen me tempulo kede Isadukayon oko bino but gi.

²Gin oudo kitie kede wangcuny, pien Petero kede Yokana oudo tie pwony be jo yaruno, di kiyamo be Yesu oyaruno kikom jo oto.

³Di do gin kiko mako Petero kede Yokana kiko rwako gi i otkol tuno oru mere, pien piny da do oudo oyuto.

⁴Do jo atot oko yei ingei winyo kop kame Petero kede Yokana opwonyo, di wel me cuo koyei oko romo bala tutumia kany.

⁵Oru mere, jo kame pugo Iyudayan, joadongo me piny kede jopwony me Iswil oko cokere Yerusalem,

⁶karacel kede Anas kame oudo obedo Ngatel Josaseredoti, kede Kayapa kede Yokana, kede Alekesanda kede jo dedede kame wok ki ekeko me Ngatel Josaseredoti.

⁷Gin kiko kelo Petero kede Yokana i diere gi, di kiko penyo gi be, “Wun itimunu gini kede twer mene, arabo i nying ngai?”

⁸Kikano Petero oko pong kede Tipo Kacil, di eko waco ne gi be, “Wun wegi apugan karacel kede joadongo me piny,

⁹ka tin kotie pepenyo wa kop i kom gi aber kame kotimo ne engwalas, epone kame kocange kede,

¹⁰wek wun dedede kede jo me Isirael dedede ingeunu be, icuo ni nan tie cungo i nyimu kan di eber, pi nying Yesu Kirisito me Nasaret. Yesu nono en kame wun bin igurunu i kom musalaba, di Rubanga oko yaruno en kikom jo oto.

¹¹Man en kidi kame bin wun jogedo idagunu, kame nan oko lokere odoko kidi kame pire tek me esonda.

¹²Doko likame tie ngatamoro kame wan otwero udo alako kibute, pien likame tie nying moro i piny kan kame kotieko mino jo, kame mio wa alako.”

¹³Kakame kineno kede nwangcuny ka Petero kede Yokana, kede bobo di oudo kiniang be gin kibedo jo atatai kalikame osomo, kiko uro; di kiko ngeno be Petero kede Yokana oudo obedo kede Yesu.

¹⁴Do bin di kineno icuo kame kocango nono di cungo i nget gi, likame tie gimoro arac kame oudo kiromo yamo.

¹⁵Di do gin bin kitieko cwano Petero kede Yokana ooko me kansulo, kiko donyo ber poro kop di kipenyere be,

¹⁶“Otimunu ne jogi nyo? Pien kitieko timo gianena kame tie kakaler but jo dedede kame bedo Yerusalem, kame wada likame otwerunu dagi.

¹⁷Do pi mino kop ni kur med sarakin, wan poore omiunu gi dwan atek kame gengo gi bobo yamo nying Yesu but ngatamoro.”

¹⁸Di do gin kiko lwongo Petero kede Yokana, di kiciko gi kitek be miero kiwek atwal yamo nying Yesu arabo pwonyo jo kop amake.

¹⁹Do Petero kede Yokana oko dwoko ne gi be, “Wun en kame miero iyerunu, arabo epoore i nyim Rubanga pi wan winyo dwanu, amoto dwan Rubanga;

²⁰pien wan likame otwero weko yamo kop i kom gikame oneno, kede kame owinyo.”

²¹Kakame bin kitieko kede medo wowono gi, kiko weko gi kioto, pien oudo likame tie epone moro kame gin kitwero mino gi kede alola moro. Gin oudo kilworo jo, pien jo dedede oudo tie pako Rubanga pi gikame otimere.

²²Icuo kame bin gianena me cango otimere i kome nono oudo mwakini mege me dongo kalamo ot ongwon.

²³Kakame kogonyo kede Petero kede Yokana, gin kiko dok but jowot gi, di kiko tatamo ne gi gikame jodongo me josaseredoti, kede joadongo me piny owaco ne gi.

²⁴Kakame kiwinyo kede kop nono, gin dedede kiko kwano Rubanga kede dwan acel di kiwaco be, “Okwe Rwot Won twer, ngat kocweo malo kede lobo kede nam kede jame dedede kame tie i yi gi.

²⁵In en kame bin iwaco i dog ngatic ni kwaru wa Daudi kede twer me Tipo Kacil be, ‘Pinyo komio jo kalikame Iyudayan odoko ger; pinyo komio jo odonyo bedo kede tam i kom gikame kony gi li?

²⁶Abakai me lobo ni otieko iikere kiteere cungo, kede jotel da otieko cokere karacel, pi yi kede Rwot kede Kirisito mere.’

²⁷Pien ateteni bin Erode kede Pontio Pilato, kede jo kalikame Iyudayan, karacel kede jo me Isirael bin ocokere i bomba noni pi suro Yesu Ngatic nin kacil, kame in iwiro.

²⁸Gin kitimo man pi cobo gi dedede kame cingi kede tam ni bin otieko iiko sek be bino timere.

²⁹Okwe Rwot, nan do nen ber epone kame gin kitie wowono wa kede, di iko mino jotic ni nwangcuny me yamo abongo lworo moro.

³⁰Riei cingi iko cango jo, doko wek kotim gi me isuur kede gianena pi nying Yesu Ngatic nin kacil.”

³¹Kakame kitieko kede ilega, kabedo kame gin oudo kicokere iye nono oko yangere, di gin dedede kiko pong kede Tipo Kacil, kiko donyo yamo kop ka Rubanga kede nwangcuny.

³²Ekodet me jokoyei Kirisito oudo tie kede tam acel kede cuny da acel. Likame tie ngatamoro kikom gi kame oudo waco be gikame en etie kede obedo mere kene, do gin oudo kinywako jamini dedede karacel.

³³Joor oko mino ijura i kom yaruno ka Rwot Yesu kede twer adwong. Doko kisa ka Rubanga oudo tie kede gin dedede.

³⁴Likame tie ngatamoro kikom gi, kame gimoro oudo oremo, pien ngat acelacel kikom gi, kame oudo tie kede lobo arabo ode moro, bin ecato di eko tero sente kame eudo,

³⁵di eko keto i cing joor. Bin sente nogo kopopoko ne ngat acelacel di lubo kony kame mitere ne.

³⁶En komio Yosepu kame oudo joor ocako ne nyinge be Baranaba (kame dwong mere be ngasup cuny jo), kame oudo obedo Ngalebi, anywali me piny me Sipuro,

³⁷oko eda cato poto mere di eko tero sente kame eudo but joor.