Read kumam Tice 7 Bible Online

Tice 7 - kumam bible

Tice 7

¹Ngatel Josaseredoti oko penyo Sitepano be, “Kope go tie me ateni?”

²Sitepano oko dwoko be, “Imiegu kede joapapi na, winyunu gikame ayaro waco; Rubanga me deyo bin oneeno but kwaru wa Aburaam i kare no di en oudo etie i piny me Mesopotamia, di pwodi likame edak bedo i piny me Aran,

³di eko waco ne be, ‘Yai tenge ki pinyu kede kibut joawade ni, iko ot i piny kame ango abino nyuto ni.’

⁴Kikano Aburaam oko yai ki piny me jo Kaludaya, di eko ot bedo i piny me Aran. Ingei to ka papa mere, Rubanga oko kwanye ki kuno oko kele i piny kame nan wun ibedunu iye noni.

⁵Do Rubanga likame oko mine gimoro kiye pi doko mere, akadi kakame rom kede boro me tien dano, do en ecikere pi mine piny nono doko mere, en karacel kede ikwae mege, bed bala oudo eli kede atin.

⁶Rubanga oko waco ne be ikwae mege bino bedo jokumbor i piny me jo apat, kame bino mino gi kidoko ipasoi di kotisilaro gi ki kuno pi mwakini tol ongwon.

⁷Do Rubanga oko waco be, ‘Ango abino ngolo kop ne ateker kame gin kitio ne, i cen mere di gin kiko bino wok kiko wora ki kane.’

⁸Di do Rubanga oko timo kede Aburaam isikan kame akepo obedo gianena mere. Kikano Aburaam oko nywalo Isaka di eko kepe i ceng me kanyauni, Isaka oko nywalo Yakobo, di Yakobo oko nywalo joakwari wa tomon kiwie are.

⁹“Nyeko bin oko mako joakwari wa kede omin gi Yosepu, di kiko cate i piny me Misiri, do Rubanga oudo tie kede,

¹⁰di Rubanga oko wote ki peko mege dedede. Di Rubanga oko mine winyo kede rieko i nyim Parao, abaka me Misiri. Parao bin oko mino Yosepu bedo ngapug me Misiri dedede, kede bedo ngat kame lo jame mege.

¹¹Kec atek bin oko poto i piny me Misiri dedede karacel kede i piny me Kanan da, kame oko kelo can adwong, oko mino joakwari wa obedo li kede cam.

¹²Do i kare kame bin Yakobo owinyo kede be cam oudo tie Misiri, en eko cwano joakwari wa pi ot kuno tien me agege.

¹³Kakame kioto kede kuno tien me are, Yosepu oko nyutere but imiegu mege di Parao oko ngeno joe ka Yosepu.

¹⁴Di do Yosepu oko lwongo Papa mere Yakobo kede joawade mege dedede pi bino bute, gin jo ot kanyaare kiwie kany.

¹⁵Yakobo oko yai eoto i piny me Misiri. En eko to kuno karacel kede joakwari wa,

¹⁶di oko dwoko kom gi Sekem, oko yiko gi i ates kame bin Aburaam owilo kede sente kibut awobe ka Kamor i Sekem.

¹⁷“Do kakame bin kare me cobere me cikere kame Rubanga oudo omio Aburaam oyapuno tuno kede, wel me jo oko nyai i piny me Misiri,

¹⁸tuno kede i kare kame abaka kalikame oudo ngeo Yosepu ogeo kede pug.

¹⁹En eko ngolo rieko ne ateker wa, di en eko dino joakwari wa uco imukerun gi, tetekeny kitoi.

²⁰Kare nono en kame oudo konywalo iye Musa; en oudo atin acil i nyim Rubanga. En bin oko pite i ot ka papa mere pi dwete adek,

²¹do i kare kame kouce kede, nyar ka Parao oko tere, di eko donyo gwoke bala wode kikokome.

²²Di oko pwonyo Musa i rieko dedede me jo me Misiri, di eko doko dano kame tek i yamo kop kede i tice mege.

²³“Kakame mwakini mege me dongo oromo kede ot ongwon, cunye oko paro pi ot welao imiegu mege, idwe me Isirael.

²⁴Di bin eudo di dano me Misiri tie timo raco ne dano mere acel, en eko konye di eko nyango kede juto dano me Misiri nono paka to.

²⁵Musa oudo tamo be imiegu mege oudo niang be Rubanga oyaro tic kede en pi lako gi, do kara gin likame oudo kiniang.

²⁶Oru mere en eko ngoole i kom gi, di eko udo jo are di tie lok. En eko mito ribo cuny gi di ewaco ne gi be, ‘Jogi, wun itienu imiegu, pinyo bo komio itienu lok kenu kenu?’

²⁷Do ngat nono kame oudo tie timo ne ngawote raco oko remoro en tenge di ewaco ne be, ‘Ngai koketi bedo ngapug kede ngangolkop wa?

²⁸Mam imito neka bala kite kame nyoro ineko kede dano me Misiri?’

²⁹Kop kame edwoko nono oko mino Musa oringo eoto gwokere i piny me Midian, kakame en eko nywalo kiye awobe are.

³⁰“Ingei Musa bedo i piny me Midian pi mwakini ot ongwon, malaika oko neeno bute i tim i moru me Sinai, i leb mac kame oudo tie liel i amwonin.

³¹Kakame Musa oneno kede gino, en eko uro di eko nyiko kuno pi mito neno kiber; do en eko winyo dwan Rwot di waco be,

³²‘Ango en Rubanga ka joakwari ni, Rubanga ka Aburaam, me ka Isaka kede me ka Yakobo.’ Kom Musa oko miel di likame doko eko kanyakino neno kuno.

³³Di Rwot oko waco ne be, ‘Gonyi amuka ki tieni tenge, pien kakame in itie cungo iye noni en kabedo kacil.

³⁴Ango atieko neno epone kame kotie tisilaro kede jo na i Misiri, doko atieko winyo cur gi. Ango nan atieko bino pi lako gi. Nan do bia, amito cwani Misiri.’

³⁵“Musa noni, ngat kame gin bin kidagi, di kiwaco be, ‘Ngai koketi bedo ngapug kede ngangolkop wa?’ en nono kame Rubanga oko cwano pi bedo ngapug kede pi lako gi pi twer me malaika kame bin oneeno bute i amwonin.

³⁶En etelo gi woto gi di eko kelo gi di etimo gi me isuur kede gianena i piny me Misiri, kede i Nam Akwar, kede i tim pi mwakini ot ongwon.

³⁷Musa nono en kame bin owaco ne jo me Isirael be, ‘Rubanga bino cwano ne wu enabi kikom imiegu wu, bala kite kame ecwao ango kede.’

³⁸En noni kame bin etie kede jo me Isirael kocokere i tim; en oudo etie kuno kede joakwari wa karacel kede malaika koyamo kede en i moru me Sinai, di en eko gamo kop ka Rubanga ekelo ne wa.

³⁹Joakwari wa oko dagi winyo kop mere; kiweke di cuny gi oko donyo paro Misiri,

⁴⁰di kiwaco ne Aroni be, ‘In tim ne wa cal mogo bed rubangan, kame bino telo ne wa yongayo; pien wan likame ongeo gikame otieko timere ne Musa, ngat kame bin okwanyo wa ki piny me Misiri.’

⁴¹Di kiko cweno gimoro kame tie i cal me roya, kiko donyo yalo cal jwogi nono di kilelo pi tic me cing gi.

⁴²Do Rubanga bin oko lokere, di en eko jalo gi woro acerin me malo, bala kite kame kowandiko kede i itabu me inabin be, ‘Wun jo me Isirael, likame ango en kame bin ingolonanu leini di ikounu mina giayala pi mwakini ot ongwon i tim.

⁴³Riki wun iterunu kima me eema ka rubanga kame nyinge Molok, kede acer me rubanga wu kame nyinge Repan, gin oudo kibedo cal kame wun oudo itimunu me awora. Pi mano, ango abino mino kotero wu kakabor kalamo Babilon.’

⁴⁴“Joakwari wa bin tie kede kima me eema i tim, kame nyuto tie ka Rubanga. Oudo bin kotime iepone kame Rubanga ngat koyamo kede Musa oudo ociko kede be time.

⁴⁵I cen mere joakwari wa da bin oko game kibut papi gi, di gin karacel kede Yosua kiko donyo kede i piny kame Rubanga oriamo kiye atekerin apat i wang joakwari wa. Man otimere tuno i kare ka Daudi,

⁴⁶ngat kame bin oko udo winyo kibut Rubanga, di eko penyo akarunikin pi gero ot ne Rubanga ka Yakobo.

⁴⁷Do Sulumani en kame bin oko gero ne Rubanga ot.

⁴⁸“Aso di Ngamalo Twal likame bedo i ude kame kogero kede cing, bala kite kame bin enabi owaco kede be,

⁴⁹‘Malo en obedo kapug nango, doko lobo en abanya me teno tiena. Rwot owaco be, nan do ot acal nadi en kame iyarunu gero nango? Tuai en kame kawei nango?

⁵⁰Mam cinga en kotimo gigi dedede?’

⁵¹“Wun jo kame wi wu tek, jo kame cunyu kwia Rubanga, doko yitu likame winyo kop mere, wun nakanaka ijemunu ne Tipo Kacil. Itienu timo bala kite kame riki papi wu otimo kede.

⁵²Enabi mene kame bin joakwari wu likame otidilo? Gin kineko jo kame bin ogeo tuco sek bino me Ngat Kopoore, kame wun irupaunu di ikounu neko.

⁵³Wun nogi en kame bin igamunu Iswil kame malaika okelo di likame ikounu lube.”

⁵⁴Kakame jo me kansulo owinyo kede yamo ka Sitepano, kiko doko ger di kom gi miel i kome.

⁵⁵Do Sitepano oudo opong kede Tipo Kacil, di eko ngoloro malo di eko neno deyo ka Rubanga, di Yesu tie cungo iye i bad tetu cam ka Rubanga.

⁵⁶En eko waco be, “Nenunu, ango atie neno malo di oyabere, di Wot ka dano tie cungo i bad tetu cam ka Rubanga.”

⁵⁷Do gin kiko donyo ilelem di kiculo yit gi, kiko onyaro i kome.

⁵⁸Di do kiko tere ooko me bomba, kiko donyo didipo en kede kide, di ijurak oko gonyo igoen gi kiketo katien awobi moro kame nyinge Saulo.

⁵⁹Kakame oudo kitie didipo en kede, Sitepano oko ilega be, “Rwot Yesu, gam tipo na.”

⁶⁰Di do eko riondiko piny, eko yamo kede dwan amalo be, “Rwot, kur imar dub noni i wi gi.” Ingei waco kamano di do eko to.