Read kumam Tice 9 Bible Online

Tice 9 - kumam bible

Tice 9

¹Do kakame Saulo oudo pwodi tie meede wowono kede neko jo kame lubo Rwot, en eko ot but Ngatel Josaseredoti,

²di eko penye baluwan me ot nyutere i sinagogan kame tie Damasiko, tetekeny kame eudo jo kame lubo Yongayo ka Rwot, cuo arabo mon, wek emak gi di eko kelo gi Yerusalem.

³Di do bin Saulo onoko bomba me Damasiko, cucuto di asara kame rieny yai ki malo oko care.

⁴En eko poto piny di eko winyo dwan kame waco ne be, “Saulo, Saulo, pinyo komio in itie tidilo ango?”

⁵Saulo oko penye be, “In ngai, Rwot?” Dwan nono oko dwoko be, “Ango en Yesu kame in itie tidilo;

⁶do yai malo di iko ot donyo i bomba, oko bino yamo ni gikame ipoore timo.”

⁷Jo kame en bin eupere kede oko cungo di likame kitwero yamo, pien oudo kiwinyo dwan, do likame kineno ngatamoro.

⁸Saulo oko yai ki piny, do kakame eyabo kede wange, likame eko sobolo neno gimoro. Di do gin kiko mako cinge, kiko pene kitere Damasiko.

⁹En eko tieko ceng adek di likame eneno piny, doko da di likame ecamo akadi mato gimoro.

¹⁰Ngasiao moro oudo tie Damasiko, kame nyinge Anania. Rwot oko lwonge i gianyuta be, “Anania.” Di en eko dwoko be, “Rwot, ango ine.”

¹¹Rwot oko waco ne be, “Yai iko ot i gudo kame kolwongo be, Gudo Koriere, di iko penyo ki ot me icuo kame nyinge Yuda kakame icuo moro kame nyinge Saulo me Taruso tie iye; pien neningo, en etie ilega,

¹²doko en etieko neno dano moro kame nyinge Anania di ebino eko keto cinge i wie, tetekeny wange nen bobo.”

¹³Do Anania oko dwoko ne be, “Rwot, ango atieko winyo kop i kom icuo no kibut jo atot, twon raco kame en etieko timo ne jo ni i Yerusalem.

¹⁴Doko ki kane da, en etieko udo twer kibut jodongo me josaseredoti pi tweno jo dedede kame lwongo nyingi.”

¹⁵Do Rwot oko waco ne be, “In oti, piento en etie ngatic nango kame ango ayero pi mino nyinga ngere but jo kalikame Iyudayan, kede abakai, karacel kede idwe me Isirael.

¹⁶Ango ayaro nyuto ne epone kame miero enen kede can pi nyinga.”

¹⁷Anania di do oko yai eko ot edonyo i ot nono. En eko keto cinge i wi Saulo di ewaco ne be, “Omina Saulo, Rwot Yesu ngat kame bin oneeno buti i yongayo di oudo itie bino Damasiko kane, oora buti tetekeny wangi nen piny bobo di iko pong kede Tipo Kacil.”

¹⁸Cucuto nono di do gimoro kame cal kede abokoya me aporogo oko poto ki wange di wange oko cako neno piny bobo, di do en eko yai oko batiso en;

¹⁹eko cam di eko doko tek. Saulo oko tieko ceng atot Damasiko di ebedo kede josiao.

²⁰Cucuto nono en eko ot cako tatamo nying Kirisito i sinagogan di ewaco be, “En nono kame ebedo Wot ka Rubanga.”

²¹Jo dedede kame bin owinyo kop mere oko uro di kiwaco be, “Mam icuo noni en kame oudo neko jo kame lwongo nying Yesu i Yerusalem? Kop acel noni en komio ebino kan da, pi mako jo di etero gi i nyim jodongo me josaseredoti di etweo gi.”

²²Do Saulo oko meede ameda doko tek, di eko cungo wi Iyudayan kame oudo bedo Damasiko, di enyuto ne gi be Yesu en Kirisito.

²³Ingei ceng atot, Iyudayan oko iiko tam me neke,

²⁴do Saulo oko ngeno tam gi nono. Gin oudo kidaro dog erute iwor kede iceng pi mito neke,

²⁵do iwor acel josiao mege oko tere di kiko kete i yi ebukit, kiko yololo en piny ki wi apama.

²⁶Kakame bin Saulo otuno kede Yerusalem, en eko tamo ribere kede josiao, do gin dedede kiko bedo kede lworo i kome, pien gin oudo likame kiyei be ebedo ngasiao.

²⁷Do Baranaba oko kwanye, di eko tere but joor, di en eko tatamo ne gi epone kame Saulo oneno kede Rwot i yongayo, kede ekite kame Rwot oko yamo kede en. Doko da en eko waco ne gi epone kame Saulo otuco kede ejiri i nying Yesu i Damasiko abongo lworo.

²⁸Di do Saulo oko bedo kede gi, di elologo Yerusalem dedede,

²⁹di etuco ejiri i nying Rwot abongo lworo. En bin eko donyo yamo di epiemo kede Iyudayan kame bin yamo leb Gurik, do gin oudo kitie mito neke.

³⁰Do kakame jo koyei Kirisito oko ngeno kede tam gi nono, gin kiko tere Sisiria di kiko cwane eoto Taruso.

³¹Pi mano, ekodet me jokirisito i Yudea, i Galilaya kede i Samaria dedede oko bedo kede mulem, di kiko doko tek. Doko kiko bedo kede wor but Rwot di kiko meede nyai pi kony me Tipo Kacil.

³²I kare kame Petero oudo tie ririmo kede adulion dedede kame jo koyei Kirisito oudo tie iye, en eko ot but jokacil kame oudo tie Luda.

³³En eko udo icuo moro kame nyinge Aenia kuno, kame oudo tuwo oneko kome di likame etwero yai ki apien pi mwakini kanyauni.

³⁴Di Petero oko waco ne be, “Aenia, Yesu Kirisito ocangi, aso yai malo ipet kabuto ni.” Cucuto nono di en eko yai malo.

³⁵Jo dedede me Luda kede Saron oko nene, di kiko lokere but Rwot.

³⁶Oudo ngasiao moro tie Jopa, kame nyinge Tabisa, kame kolwongo i leb Gurik be Dorika. En oudo etimo tice kabeco doko di ekonyo jo.

³⁷I kare nono tuwo oko make di eko to. Jo oko lwoko kome di kiko piele i agola me malo.

³⁸Kite kame Luda oudo iyapiyapi kede Jopa, josiao oko winyo be Petero oudo tie kuno, di gin kiko cwano jo are bute pi ngangao en be, “Okwe bia but wa abongo gal.”

³⁹Petero oko yai, en eko upere kede gi. Kakame etuno kede, kiko tere i agola me malo nono. Apuserun lung oko cungo i ngete di kikok, di kinyuto ne ikotin kame Dorika oudo lem cweo di pwodi oudo etie kede gi di ekuo.

⁴⁰Do Petero oko cwano gin dedede ooko, di en eko riondiko piny, di eko lego. Ingei ilega, en eko lokere kakame kom ngat oto oudo tie iye, di eko waco be, “Tabisa, yai malo.” Tabisa oko yabo wange. Kakame eneno kede Petero, en eko yai di eko bedo.

⁴¹Petero oko cwano ne cinge, di eko kiarao en malo. Di Petero oko lwongo jokacil karacel kede apuserun ka, di eko mino gi Tabisa di kuo.

⁴²Jo kame bin tie Jopa dedede oko winyo kop i kom gikame otimere, di jo atot oko yei Rwot.

⁴³Di Petero oko dong bedo Jopa pi ceng mogo atotot, di ebedo i paco me icuo kame nyinge Simoni, nganyong launi.