Read kumam Joroma 15 Bible Online

Joroma 15 - kumam bible

Joroma 15

¹Wan jo kame yei wa tek opoorenu kanyakino popoto me jo kame yei gi goro, di likame otimo gikame yomo cuny wa kenwa.

²Wek dano acelacel yomcuny dano ocelu, pi gero yei mere.

³Pien Kirisito bin likame oyomo cunye kene, bala kite kame kowandiko kede be, “Ayet kame jo oyeti kede opoto i koma.”

⁴Pien gi dedede kame oudo kowandiko i kare okato, oudo kowandiko pi pwonyo wa, tetekeny obedunu kede gen pi ikanyakin kede nwangcuny kame iwandik kacil mio wa.

⁵Ango akwao Rubanga ngat kame mio jo ikanyakin kede nwangcuny pi mino wu bedo kede tam acel, wun kenu kenu, di lubere kede anyut kame Kirisito Yesu omio,

⁶tetekeny wun dedede, kede dwan acel, ipakunu Rubanga, en Papa me Rwot wa Yesu Kirisito.

⁷Pi mano, gamunu jo icegun bala kame Kirisito da ogamo wu kede, tetekeny imiunu Rubanga deyo.

⁸Pien awaco ne wu be, Kirisito odoko ngat kame tio ne jo kame kokepo pi nyuto ateni ka Rubanga, tetekeny emi cikere mere but joakwari me agege me Isirael cobere,

⁹kede me wek jo kalikame Iyudayan pak Rubanga pi cuny me kisa mere, bala kame kowandiko kede be, “Pi mano, ango abino paki i dier jo kalikame Iyudayan, di ako wero were me pako nyingi.”

¹⁰Bobo be, “Lelunu karacel kede jo mege, wun jo kalikame Iyudayan.”

¹¹Bobo ewaco be, “Pakunu Rwot, wun jo dedede kalikame Iyudayan, doko wek jo dedede pake.”

¹²Isaya bobo oko meede kede yamo be, “Akwar Yese oyaro bino, en eyaro bino pi pugo jo kalikame Iyudayan; jo kalikame Iyudayan bino bedo kede gen i kome.”

¹³Wek Rubanga ngat kame mio gen, pong kuo wu kede yomcuny kede mulem pi yei wu i kome, tetekeny ibedunu kede gen adwong pi twer me Tipo Kacil.

¹⁴Imiegu kede amiegu na, ango kikoma atie kede niang aber i komu, be wun ipongunu kede bero, doko itienu kede ngec dedede, doko itwerunu pwonyere kenu kenu.

¹⁵Do kope mogo tie kame awandiko kede nwangcuny pi mino wu iyutun. Atimo manoni pi kisa kame Rubanga omia,

¹⁶pi bedo ngatic ka Kirisito Yesu but jo kalikame Iyudayan, di atio bala ngasaseredoti kame tuco ejiri ka Rubanga, tetekeny jo kalikame Iyudayan dok giamia kame Rubanga karuno gamo, kame Tipo Kacil olonyo.

¹⁷Pi mano, atie kede tien kop kame mia awakere i Kirisito Yesu pi tic kame atimo ne Rubanga.

¹⁸Likame abino waco kop i kom gimoro ace, kwanyo gikame Kirisito omio otimere kibuta, pi mino jo kalikame Iyudayan lubo kop ka Rubanga. En etimo manoni i kope kede tice na,

¹⁹i gianena kede i gi me isuur, kede i twer me Tipo ka Rubanga. Manoni en komio atieko tuco ejiri ka Kirisito kakare, cako ki Yerusalem tuno Iluriku.

²⁰Man oko mina bedo kede mit me tuco ejiri kakame pwodi likame kolwongo kiye nying Kirisito, tetekeny kur arop gedo i wi tic ka ngatamoro apat.

²¹Bala kame kowandiko be, “Jo kalikame kowaco ne gi kop i kome bino nene, kede jo kalikame pwodi owinyo kop i kome bino niang kop i kome.”

²²Man en kop komio nakanaka likame atwero bino butu.

²³Do nan bala kite kalikame doko atie kede tic moro i adulion me kan, bala kame abedo paro kede sek, cunya mito do bino butu

²⁴di atie ot Sipania. Pien ageno be abino neno wu i kare kame atie ot kede kuno di ikounu bino mina kony pi mina meede kede ot na, ingei ango bedo kede wu pi kare moro acecek.

²⁵Bed bala kamano da, nataman ango atie ot Yerusalem pi tero kony ne jokacil.

²⁶Pien jo me Makedonia kede jo me Akaya cuny gi obedo yom pi nywako jame gi kede jocan kikom jokacil kame tie Yerusalem.

²⁷Cuny gi oudo yom pi timo kamanono, doko i ateteni etie banya but gi. Pien ka Iyudayan onywako winyo gin me cuny kede jo kalikame Iyudayan, jo kalikame Iyudayan da poore mino Iyudayan kony me jame.

²⁸Pi mano, kame atieko timo tic noni, kede kame atieko mino gi gikame kocoko, abino beo butu di atie ot Sipania.

²⁹Doko angeo be, kame atuno butu, abino kelo winyo adwong kame oyai kibut Kirisito.

³⁰Imiegu kede amiegu na, akwao wu i Rwot wa Yesu Kirisito kede i amara me Tipo Kacil be, riberenu keda i timo teko ilega karacel keda but Rubanga pira,

³¹me wek amotoko kolaka ki cing jo kalikame oyei kame tie Yudea, kede me wek jokacil pwoi tic na kame atieko timo Yerusalem.

³²Manono bino mina adwogo butu kede yomcuny, di ako bino udo alakanar kame atie karacel kede wu, ka Rubanga oyei.

³³Rubanga won mulem bed kede wu dedede. Amen.