Read kumam Joroma 16 Bible Online

Joroma 16 - kumam bible

Joroma 16

¹Anyuto amin wa Paibe butu, ngakony tic ka Rubanga i ekodet me jokirisito i Kenkerea, bala dano aber, me

²wek igamenu i Rwot bala kame poore ne jokacil timo, di ikounu mine kony dedede kame eromo mito kibutu. Pien lem en ebedo konyo jo atot akadi kiton ada.

³Motanu Purisila kede Akwila, kame obedo jotic jowota i Kirisito Yesu,

⁴jo kame oudo oyei to pi kuo na. Likame ango kena en kame apwoyo gi, do kiton ekodet me jokirisito kalikame obedo Iyudayan.

⁵Motanu ekodet me jokirisito kame cokere i ot gi. Motanu ngawota kame amaro Epaenato, kame oudo obedo dano me agege me lokere but Kirisito i Esia.

⁶Motanu Maria, ngat kobedo timo tic atek i diere wu.

⁷Motanu Anduroniko kede Yunia, kame obedo joawade na kame bin kotwea kede gi i otkol. Gin kitie jo angere kikom joor, doko gin kigeo nango doko jokirisito.

⁸Motanu Ampuliato, ngawota kame amaro i Kirisito.

⁹Motanu Urbano da, ngatic wad wa i Kirisito, kede ngawota kame amaro Sitaku.

¹⁰Motanu Apele ngat kame kopwoyo i Kirisito. Motanu jo me i ot ka Arisitobulo.

¹¹Motanu wad wa Erodion. Motanu jo kame tie i Rwot, kame obedo jo me ot ka Narisisa.

¹²Motanu jogo kame timo tic ka Rwot, Teropaina kede Teroposa. Motanu ngawota me amaro Peresi, kame obedo timo tic atek i Rwot.

¹³Motanu Rupus dano kame koyero i Rwot, kede toto mere kame obedo toto nada.

¹⁴Motanu Asinkerito, Pelegon, Kereme, Patroba, Kerema kede imiegu kede amiegu kame tie karacel kede gi.

¹⁵Motanu Pilologa, Julia, Nereu kede amin mere, kede Olimpas, kede jokacil dedede kame tie karacel kede gi.

¹⁶Moterenu kenu kenu kede amot kacil me notere. Ikodeta dedede me jokirisito moto wu.

¹⁷Imiegu kede amiegu na, akwao wu pi gwokere ki kom jo kame kelo apokapoka kede kame totolo yei me jo, jo kame dagi lubo kop kame kopwonyo wu; kur ibedunu kede gi.

¹⁸Pien epone me jo nogo likame tio ne Rwot wa Kirisito, do kitio pi cobo mit gi. Gin kingalo jo kame tam gi likame tut kede kope gi amit, kame winyo ber.

¹⁹Jo dedede otieko winyo be wun ilubunu kop me ejiri, en komio ango cunya yom i komu. Amito ibedunu jo kame tie kede rieko me ngeno gikaber, kede jo kame li kede kop moro kame makere kede gikarac;

²⁰di do Rubanga won mulem ko bino nyonyoto Sitani di eko kete i loc wu i kare kiyapiyapi. Kisa ka Rwot wa Yesu Kirisito bed kede wu.

²¹Temeseo, ngatic ngawota moto wu. Lukio kede Jason kede Sosipata kame obedo joawade na da, moto wu.

²²Ango Teritio, ngat kowandiko baluwa noni, amoto wu i Rwot.

²³Gayo ngat kame tie gwoka i ture, karacel kede jo me kan dedede koyei Kirisito moto wu. Erasito, ngakan lim me bomba, kede omin wa Kuato moto wu.

²⁴Kisa ka Rwot wa Yesu Kirisito bed kede wu dedede. Amen.

²⁵Omiunu Rubanga deyo, en ngat kame karuno mino wu icungunu di itekunu i yei, di upere kede ejiri kame ango atuco kede kop kame apwonyo i kom Yesu Kirisito, di lubere kede nyutere me gikame omungere, kame oudo kokano pi kare alac.

²⁶Do nan kotieko nyute, di oko mine engere but jo kalikame Iyudayan dedede i iwandik kacil me inabin, di lubere kede cik kame Rubanga ngat kame bedo nakanaka omio, pi mino jo yei kop mere di kiko lubo.

²⁷Deyo bed but Rubanga acel kenekene won rieko, pi Yesu Kirisito, ikar kede ikar. Amen.