Read kumam Joroma 4 Bible Online

Joroma 4 - kumam bible

Joroma 4

¹Nan do owac kop nyo i kom Aburaam, ngat kame obedo kwaru wa?

²Pien ka koto Aburaam oudo odoko ngat kopoore pi tice mege, koto oudo etie kede gikame mie ewakere, do likame i nyim Rubanga.

³Pien iwandik kacil waco be, “Aburaam oyei Rubanga di oko tere be epoore pi yei mere nono.”

⁴Nan do dano kame timo tic, egelit mere likame otero bala giamia, do bala gikame poore cule.

⁵Do ngat kalikame timo tic, do di eko keto gen mere i kom Rubanga, ngat kame mio jo kalikame wore doko jo kopoore, kobino tere bala ngat kopoore pi yei mere.

⁶Kamanono da, Daudi owaco kop i kom winyo kame dano tie kede ka Rubanga otere bala ngat kopoore, akadi di likame pi tice mege, bala kame bin kowandiko be,

⁷“Kitie kede winyo jo kame kosasiro gi ki raco gi, jo kame koumo dub gi.

⁸Etie kede winyo ngat kame Rwot likame bino maro dub mere i wie.”

⁹Benyo, bin Daudi owaco kop me winyo noni pi jo kame kokepo kenekene arabo kiton pi jo kalikame kokepo da? Iwandik kacil waco be, “Rubanga otero Aburaam bala ngat kopoore pi yei mere.”

¹⁰Awene en kame bin Rubanga otero kede be Aburaam opoore? Benyo etimere di pwodi likame kokepe arabo di kotieko kepe? Likame etimere di kotieko kepe, do di pwodi likame kokepe.

¹¹En eyei kepere tetekeny kepere mere bed gianena kame moko be en ebedo ngat kopoore pi yei kame oudo etie kede di pwodi likame kokepe. Man otimere pi mino Aburaam bedo bala papa me jo dedede kame yei, do di likame kokepo gi, di Rubanga ko tero be kipoore.

¹²Iepone acel nono, en etie da bala papa me jo kame kokepo, jo kalikame okepere akepa kenekene, do da gin kilubo anyut me yei kame kwaru wa Aburaam oudo tie kede di pwodi likame kokepe.

¹³Cikere kame Rubanga bin omio Aburaam kede ikwae mege, be piny noni bino doko mergi, likame emio be pien Aburaam ogwoko Iswil, do emio piento en oudo ebedo ngat kopoore pi yei.

¹⁴Ka jo kame gwoko Iswil en kame piny noni bino doko mergi, udo kony me yei do li, doko cikere ka Rubanga da udo kony mere li.

¹⁵Pien Iswil kelo lilo ka Rubanga, do kakame Iswil li kiye, udo turo Iswil da li.

¹⁶Pi mano, cikere kame Rubanga omio Aburaam oudo cungo i yei, tetekeny cikere mere bed gi me kisa, di eko bedo gikame komoko ne ikwae ka Aburaam dedede, likame ne jo kame gwoko Iswil kenekene, do da ne jo kame tie kede yei bala bin Aburaam. Pien Aburaam tie kwaru wan dedede,

¹⁷bala kame kowandiko be, “Atieko mini idoko papa me atekerin atot.” Komoko cikere noni i nyim Rubanga kame en eyei, ngat kame mio jo oto udo kuo, kede kame mio gikame li bedo tie.

¹⁸Aburaam bin obedo kede gen di eko yei, bed bala gikame oudo egeno oudo neeno bala likame twerere. En oudo eyei be ebino doko papa me atekerin atot, bala kame bin Rubanga owaco ne kede be, “Ikwae ni bino bedo tot rom kano.”

¹⁹Yei mere likame odok cen pi tio me kome, bala kite kame oudo ecal acala do bala gikame otieko to; pien mwaka me dongo mere oudo romo bala tol acel. Doko yei mere likame oko dok cen da be pien Sara oudo obedo adonge.

²⁰Aburaam bin likame obedo abongo yei, omio likame en eko bedo kede gung i kom cikere ka Rubanga, do yei mere omedo doko tek ameda di emio Rubanga deyo.

²¹En oudo engeo kiber be Rubanga oudo twero timo gikame ecikere iye.

²²Man en komio pi yei mere, “oko tere bala ngat kopoore.”

²³Do kop kame waco be, “oko tere bala ngat kopoore,” likame bin kowandiko piren kene,

²⁴do pir wada. Kobino tero wada bala jo kopoore, wan jo kame oyei Rubanga ngat koyaruno Yesu Rwot wa ki to.

²⁵Bin koneke pi dub wa, di oko yaruno en pi mino wa doko jo kopoore.