Read kumam Joroma 5 Bible Online

Joroma 5 - kumam bible

Joroma 5

¹Pi mano, bala kite kame otiekunu doko kede jo kopoore pi yei, otienu do kede anapakin kede Rubanga pi Rwot wa Yesu Kirisito.

²En etieko mino wa oudo epone me tuno i kisa ka Rubanga kame nan wan otienu iye, di olelunu pi gen wa kame otienu kede me nywako deyo ka Rubanga.

³Do akalamo mere, obedunu kede kilel pi neno can, di ongeunu be neno can kelo ikanyakin,

⁴kede ikanyakin mio Rubanga pwoyo ikiteso wa, kede ikiteso kame Rubanga pwoyo kelo gen.

⁵Gen likame ngalo wa, pien kotieko onyo amara ka Rubanga i cuny wa di beo kibut Tipo Kacil kame kotieko mino wa.

⁶Di pwodi oudo otienu jo agoro, Kirisito oko to i kare kopoore pi jo kalikame woro Rubanga.

⁷Pien etek ne dano to pi ngat kopoore, bed bala cengemogo dano romo yei to pi ngat aber.

⁸Do Rubanga onyuto amara mere pirwa, pien di oudo wan pwodi jodubo, Kirisito oko to pirwa.

⁹Pi mano, bala kame nan remo mere otieko mino wa odoko kede jo kopoore, akalamo mere, obinunu udo bwot ki lilo ka Rubanga pi en nono.

¹⁰Pien ka i kare kame wan oudo pwodi otienu kede jokwor ka Rubanga, en eko dwoko wa i nywak kede en pi to ka wode, do akalamo mano, bala kame nan do otiekunu dok i nywak kede en, Kirisito bino do lako wa kede kuo mere.

¹¹Likame mano kenekene, do wan olelo da i Rubanga pi Rwot wa Yesu Kirisito, ngat kame odwoko wa i nywak kede Rubanga.

¹²Pi mano, bala kame dub obino kede i piny pi dano acel, to da obino i piny pi dub. Kikano, to oko sarakin ne jo dedede, pien jo dedede odubo.

¹³Ateteni dub oudo tie i piny di bin pwodi likame komio Iswil, do kakame Iswil li kiye, likame komaro dub i wi ngatamoro.

¹⁴Do to obedo kede loc cako i kare ka Adamu tuno i kare ka Musa, akadi kiton but jo kame turo iswil gi oudo likame cal kede me ka Adamu. Adamu bin tie apor me ngat kame oudo oyaro bino.

¹⁵Do giamia me nono ka Rubanga likame rorom kede dub ka Adamu, pien ka jo atot bin oto pi dub me dano acel, do akalamo mano, kisa ka Rubanga kede giamia mere me nono opong ne jo atot pi kisa me dano acel, en Yesu Kirisito.

¹⁶Doko giamia me nono noni likame cal bala adwokini me dub me dano acel nono, pien dub acel omio kongolo kop i wi jo, do giamia me nono kame oko lubo dub atot, kelo ne jo poore.

¹⁷Ka pi dub me ngat acel, to oko bedo kede loc pi ngat acel nono, do akalamo mano, ateteni jo kame ogamo twon kisa kede giamia me nono kame mio gi kibedo jo kopoore, bino bedo kede kuo kede loc pi dano acel, en Yesu Kirisito.

¹⁸Pi mano, bala kite kame dub me dano acel omio oko ngolo kop i wi jo dedede, kamanono da tic kopoore me dano acel kelo agonya kede kuo ne jo dedede.

¹⁹Pien bala kame pi dano acel bedo abongo wor oko mino jo atot odoko jodubo, kamanono da, pi bedo me dano acel kede wor bino mino jo atot doko jo kopoore.

²⁰Kokelo Iswil di dub oko meede; do kakame dub meede nyai iye, kisa ka Rubanga medo doko dwong iye kalamo.

²¹Etie kamano tetekeny bala kame dub obedo kede loc di ebeo ki to, wek kisa da bed kede loc di ebeo ki poore, di eko kelo kuo kame bedo nakanaka pi Rwot wa Yesu Kirisito.