Read kumam Joroma 8 Bible Online

Joroma 8 - kumam bible

Joroma 8

¹Pi mano, nan do likame kobino ngolo kop i wi jo kame tie i Kirisito Yesu.

²Pien iswil me Tipo, kame mio jo kuo i Kirisito Yesu otieko gonyo wa kiye iswil kame kelo dub kede to.

³Rubanga otieko timo gikame oudo Iswil likame twero timo, pien kite me kuo me anywali otieko mine edoko goro. En eoro Wode kikokome pi bino i cal me kuo me kom kame opong kede dub, di en eko ngolo kop me raco i wi dub.

⁴Rubanga otimo kaman tetekeny gikame opoore, gikame Iswil mito miero cobere kakare i kom wa, wan jo kalikame obedo i kite me kuo me kom, do obedo bala kame Tipo mito.

⁵Pien jo kame bedo i kite me kuo me kom keto tam gi i kom gikame kom mito, do jo kame bedo bala kame Tipo mito, keto tam gi i kom gikame Tipo mito.

⁶Keto tam i kom gikame kom mito kelo to, do keto tam i kom gikame Tipo mito kelo kuo kede mulem.

⁷Pien tam kame koketo i kom gikame kom mito tie kwor kede Rubanga, pien likame elubo iswil ka Rubanga, ateteni likame ekaruno lubo.

⁸Doko jo kame bedo i kite me kuo me kom likame karuno yomo cuny Rubanga.

⁹Do wun likame ibedunu i kite me kuo me kom, do ibedunu bala kame Tipo mito, pien Tipo ka Rubanga bedo i komu. Ngat kame li kede Tipo ka Kirisito, udo likame en me ka Kirisito.

¹⁰Do ka Kirisito tie i kuo wu, akadi bed bala komu oto pi dub, do tipo wu kuo pien itiekunu doko jo kopoore.

¹¹Ka Tipo me ngat koyaruno Yesu kikom jo oto bedo i kuo wu, ngat nono koyaruno Kirisito Yesu kikom jo oto bino mino komu da kame to kuo, pi Tipo mere kame tie i kuo wu.

¹²Pi mano, imiegu kede amiegu na, wan otienu kede gimoro kame miero otimunu, kame tie banya, do likame ne kuo me kom amoto pi bedo bala kame kom mito,

¹³pien ka ibedunu i ekite me kuo me kom, ibinunu to, do ka ijikunu tice me kom pi Tipo, ibinunu kuo.

¹⁴Pien jo dedede kame Tipo ka Rubanga telo, gin idwe ka Rubanga.

¹⁵Pien likame igamunu Tipo kame loko wu idokunu ipasoi di eko mino wu bedo kede lworo, do igamunu Tipo kame mio wu ibedunu idwe ka Rubanga. Kame okokunu but Rubanga be, “Aba! Papa!”

¹⁶udo Tipo nono kikome en kame tie mino ijura karacel kede tipo wa be wan obedunu idwe ka Rubanga.

¹⁷Aso ka wan idwe ka Rubanga, udo otienu jo kame bino udo winyo mere, di onywakunu udo winyo nono karacel kede Kirisito, ka di ateteni wan otienu neno can kede en me wek mi wa deyo karacel kede en.

¹⁸Ango angeo be can kame nataman wan otienu neno i kare ni likame romo porere kede deyo kame kobino nyuto ne wa.

¹⁹Pien cwec lung tie daro kede mit adwong pi Rubanga nyuto idwe mege.

²⁰Pien oudo koketo cwec lung i twer me gikame dwong mere li, likame pi mit mere, do pi mit me ngat kame bin okete i twer nono, di egeno be

²¹kobino gonyo cwec lung ki bedo mabus me gikame top, di eko donyo i deyo me bedo idwe kogonyere ka Rubanga.

²²Wan ongeo be cwec lung obedo cur kede aramo alit tuno nan.

²³Do likame cwec kenekene, wada kikom wa, wan jo kame otienu kede giamia ka Rubanga me Tipo bala anyakini me agege, ocurunu eliling di odaro Rubanga loko wa doko idwe mege, gikame obedo alako me kom wa.

²⁴Pien pi bedo kede gen noni en komio kolako wa. Gen kame neeno udo likame en gen, pien ngai kame geno gikame en etie neno?

²⁵Do ka ogenunu gi kalikame otienu neno, odiunu cuny wa pi dare.

²⁶Kamanono da, Tipo konyo wa i goro wa; pien likame wan ongeunu epone me lego bala kame opoorenu timo kede, do Tipo nono bako doge pirwa kede cur kalikame wacere.

²⁷Doko ngat kame neno cuny jo ngeo tam me Tipo, pien Tipo bako doge pi jokacil bala kame Rubanga mito kede.

²⁸Wan ongeunu be, i gi dedede, Rubanga tio pi kelo bero ne jo kame mare, jo kame en elwongo di lubere kede iik mere.

²⁹Pien Rubanga oudo ogeo moko sek pi loko doko cal kede Wode jo kame en oudo egeo ngeno, tetekeny Wode bed kao kikom imiegu atot.

³⁰Jo kame en oudo egeo moko kop gi sek bin en eko lwongo da; jo kame elwongo, en eko da mino gi kidoko jo kopoore; jo kame emio odoko jo kopoore, en eko da mino gi deyo.

³¹Nan owac do benyo? Ka Rubanga tie kede wa, ngai kame twero mon kede wa?

³²En ngat kalikame bin ecere kede Wode kikome, do ejale pirwa dedede, mam ebino da mino wa gi dedede karacel kede en?

³³Ngai kame karuno kelo pido moro i kom jo kame Rubanga otieko yero? Rubanga en kame mio jo bedo di kipoore.

³⁴Ngai kame bino ngolo kop i wi gi? Kirisito Yesu en kame bino timo, en bin eto, ebo, oko yaruno en kikom jo oto, nan etie i bad tetu cam ka Rubanga, ateteni en kame nan ebako doge pirwa.

³⁵Ngai kame bino poko wa ki amara ka Kirisito? Iparunu be peko bino poko wa, amoto cwercuny, amoto itidil, amoto kec, amoto bedo li kede giangapa, amoto gimoro arac kame karuno timere ne wa, amoto epima?

³⁶Bala kite kame kowandiko kede be, “Kotie neko wa piny yuluyul piri; kotero wa bala romini kame koyaro ngongolo.”

³⁷Li, i gigi dedede, wan olounu adikinicel pi ngat kame omaro wa.

³⁸Pien ango angeo kiber be, akadi to amoto kuo, imalaikan amoto jopug me malo, jame me kare kanataman amoto me waru, twer,

³⁹boro malo amoto tuto piny, arabo gimoroni kenekene kame kocweo, likame bino twero poko wa ki amara ka Rubanga kame tie i Kirisito Yesu Rwot wa.