Read kumam Joroma 9 Bible Online

Joroma 9 - kumam bible

Joroma 9

¹Ango atie waco kop me ateni i Kirisito, likame atie ngalo, ngec me cunya da, pi twer me Tipo Kacil, jurao ango

²be ango atie kede par adwong kede cwercuny kalikame jik i cunya.

³Pien oudo amito be ka koto twerere, ango kikoma koto kolama di oko poka kede Kirisito pi imiegu na, kame obedo joawade na.

⁴Gin jo me Isirael, jo kame Rubanga omio odoko idwe mege. Komio gi deyo, isikan, Iswil, woro Rubanga, kede cikere.

⁵Joakwari me agege me Isirael obedo mergi, doko i kom kop kame mako anywali me kom, Kirisito owok ki ateker gi. Pak bed but Rubanga ngat kame lo jame dedede ikar kede ikar. Amen.

⁶Do likame etie bala kop ka Rubanga do oudo likame ocobere kakare. Pien likame anywali dedede me Isirael obedo jo me Isirael,

⁷doko likame ikwae ka Aburaam dedede obedo idwe ka Rubanga; do Rubanga bin owaco ne Aburaam be, “Ikwae ni bino wok kibut Isaka.”

⁸Man dwong mere be likame idwe me anywali me kom en kame idwe ka Rubanga, do idwe kame kocikere pirgi en kame kotero be ikwae mege.

⁹Pien cikere nono bin waco be, “Abino dwogo tetu kare noni di ako bino udo Sara tie kede atin awobi.”

¹⁰Do likame man kenekene, do doko da i kare kame bin Rebeka oyaco kede idwe kede icuo acel, en kwaru wa Isaka.

¹¹Akadi di oudo pwodi likame konywalo gi, arabo di pwodi likame kitimo gimoro aber amoto arac, do pi mino iik me yer ka Rubanga meede,

¹²likame pi tice do pi lwongo mere, omio en eko waco ne Rebeka be, “Awobi adwong bino tic ne awobi atidi.”

¹³Bala kame kowandiko be, “Amaro Yakobo, do adagi Esau.”

¹⁴Nan do owacunu benyo? Mam be Rubanga likame timo gi dedede i yore me ateni? Likame kamano.

¹⁵Pien bin Rubanga owaco ne Musa be, “Cunya bino bedo kede kisa i kom jo kame kisa maka kede gi, doko cunya bino bedo kede isasir i kom jo kame cunya bino mito bedo kede isasir i kom gi.”

¹⁶Pi mano, likame etimere pi mit ka dano arabo cane mere, do pi Rubanga ngat kame nyuto cuny me kisa.

¹⁷Pien iwandik kacil bin owaco ne Parao be, “Ango atingi malo pi nyuto twer na di beo kibuti, tetekeny bin tatamo nyinga i wi lobo lung.”

¹⁸Pi mano, en kisa make kede ngat kame cunye oyero, doko ngat kame en emito be bed ngaepali emio bedo ngaepali da.

¹⁹Wun ibinunu waco na be, “Pinyo komio pwodi Rubanga waco be odubo? Pien ngai kame karuno dagi gikame en emito?”

²⁰Do in ngai, in kom dano adana dwoko dog Rubanga? Iparo be gikame kocweo bino waco ne ngat kocwee be, “Pinyo komio icwea kaman?”

²¹Mam ngacwei agune tie kede akarunikin i kom elupe, pi cweno tabo acel kame cil kede doko cweno acel ararac kede atukit acel me elupe kame onyongo nono?

²²Etie kamanono da kede Rubanga, pien di bin emito nyuto lilo mere kede mino twer mere ngere, di do en eko kanyakino kede dire adwong, pi jo kame etie kede lilo i kom gi, kame epoore dudubo.

²³En etimo kaman pi nyuto abar me deyo mere ne jo kame ebino bedo kede cuny me kisa ikom gi, jo kame egeo iiko sek pi udo deyo mere,

²⁴akadi kiton wada jo kame elwongo wa, likame kibut Iyudayan kenekene, do kibut jo kalikame Iyudayan da.

²⁵Bala kite kame ewaco kede i itabu ka Kosia be, “Jo kalikame oudo obedo jo na abino lwongo gi be ‘jo na,’ kede ngat kalikame oudo atie kede amara bute, abino lwonge be ‘me amaro.’

²⁶Doko i kabedo kame oudo owaco ne gi kiye be, ‘Wun likame jo na,’ kobino lwongo gi kiye be idwe ka Rubanga kakuo.”

²⁷Isaya oko yamo kop i kom Isirael be, “Akadi bed bala wel me idwe me Isirael rom kede asinge me nam adwong, donge gi mogo anonok en kame bino bwot;

²⁸pien Rwot bino mino kop kame engolo ne lobo timere iepone kame en emito abongo gal.”

²⁹Doko etie bala kame Isaya bin omurao kede be, “Ka koto Rwot me yi likame oweko ne wa idwe mogo, koto odoko cal bala Sodoma kede bala Gomora.”

³⁰Nan owac do benyo? Owac kaman be, jo kalikame obedo Iyudayan, gin jo kalikame oudo cane pi bedo jo kopoore, odoko jo kopoore pien kibedo kede yei.

³¹Do jo me Isirael kame oudo ocane lubo iswil pi bedo jo kopoore, likame oko twero cobo gikame iswil nono mito.

³²Pinyo? Pien gin likame kicane bedo jo kopoore pi yei, do pi timo tice kame Iswil mito. Pi mano, gin kiko gete ki wi engaro kame getaro jo,

³³bala kame kowandiko be, “Neningo, ango atie keto engaro i Sion kame bino getaro jo, lela kame bino mino gi kipopoto. Do ngat kame yei en likame kobino mino lewic mako.”