Read kumam 1 Jokorinti 11 Bible Online

1 Jokorinti 11 - kumam bible

1 Jokorinti 11

¹Lubunu ekite nango, bala kame ango da alubo kede ekite ka Kirisito.

²Ango apwoyo wu pien wun nakanaka iyutununu ango i gi dedede, doko ilubunu pwony kame bin komio wu.

³Do ango amito ingeunu be, wi icuo acelacel en Kirisito, doko da wi dako en cware, wi Kirisito en Rubanga.

⁴Aso icuo kame lego arabo kame murao di eumo wie udo likame mio wor but Kirisito ngat kame obedo wie.

⁵Do dako kame lego arabo murao di likame eumo wie, likame mio cware wor, ngat kame obedo wie. Erom aroma bala oudo kolielo wie.

⁶Pien ka dako likame mito umo wie, poore do eliel wie; do ka etie gi me lewic ne dako lielo wie, poore eum wie.

⁷Icuo likame poore umo wie, piento en etie cal ka Rubanga, doko en deyo mere; do dako tie deyo me icuo.

⁸Pien likame bin kocweo icuo kikom dako, do dako en kame kocweo kikom icuo.

⁹Doko da likame bin kocweo i cuo pir dako, do kocweo dako pir icuo.

¹⁰En komio dako miero um wie pi imalaikan.

¹¹Akadi bed kamanono da, i Rwot dako likame cungo kene abongo icuo, doko icuo da likame cungo kene abongo dako.

¹²Pien bala kame dako owok kede kikom icuo, aso, dako en kame nywalo icuo. Do gi dedede wok kibut Rubanga.

¹³Wun ber pokunu; iparunu be eber ne dako lego Rubanga di likame eumo wie?

¹⁴Mam ekite me cwec ka Rubanga pwonyo wu be etie gi me lewic ka icuo oweko yer wie odongo,

¹⁵do ka dako oweko yer wie odongo etie gi me deyo mere? Pien komie yer pi umo wie.

¹⁶Do ka ngatamoro tie kede piem i kom kop noni, wan bobo likame otie kede itok moro ace, akadi paka ikodeta me jokirisito da.

¹⁷Do i acora kame lubo nogi, ango likame apwoyo wu, pien kame wun icokerenu likame tie bero moro iye, do kwanyo raco kenekene.

¹⁸Pien me agege mere, kame icokerenu bala ekodet me jokirisito, ango awinyo be apokapoka tie i diere wu; ango da amo yei kop nono.

¹⁹Pien apokapoka miero bed tie i diere wu, tetekeny jo kame tie kede ateni bin ngere.

²⁰Kame icokerenu karacel, likame Cam ka Rwot me otieno en kame icamunu.

²¹Pien kame itienu cam, ngat acelacel pokere camo cam mere kene, mio jo mogo dong kede kec, di mogo mer.

²²Benyo, iliunu kede miere kame iromunu cam kede amata kiye? Arabo, mam icaunu ekodet me jo koyei Rubanga di ikounu mino jo kame li kede gimoro lewic? Ayam ne wu benyo, apwoi wu pi tim noni? Li, ango likame abino pwono wu.

²³Pien ango agamo kibut Rwot pwony kame ango da ako mino wu, be iwor kame bin korupao iye Rwot, en bin ekwanyo mugati,

²⁴kakame etieko pwono kede Rubanga, eko tuturo en, di eko waco be, “Man en koma kame tie piru. Timunu kamanoni pi yutuno ango.”

²⁵Kamanono da, ingei cam, en eko kwanyo ikopo me bwini di eko waco be, “Man en ikopo me isikan kanyen kame remo na moko. Timunu kamanoni pi yutuno ango i kare dedede kame imatenu kede.”

²⁶Pien i kare dedede kame icamunu kede mugati noni kede di imatunu kiye ikopo noni, udo itienu tuco kop me to ka Rwot tuno en dwogo.

²⁷Pi mano, ngatamoro kame camo mugati ka Rwot arabo mato kiye ikopo mere i yore kalikame poore, en ebino kelo ngolo kop i kome kene pi timo dub i kom Rwot kede i remo mere.

²⁸Miero dano kong ngingico kuo mere, en kame mio di eko camo mugati kede mato kiye ikopo nono.

²⁹Pien ngat kame camo kom Rwot kede kame mato kiye ikopo mere abongo niang dwong mere, en ekelo ngolo kop i kome kene.

³⁰Manoni en komio jo atot kikom wu tie kede goro doko kituo, kede mogo otieko to da.

³¹Do ka koto ber ogeunu ngingico kuo wa, koto likame kongolo ne wa kop.

³²Do kame Rwot ongolo ne wa kop, udo epwonyo wa tetekeny kur bin ngol kop loi wa karacel kede piny.

³³Pi mano, imiegu kede amiegu na, kame icokerenu karacel pi camo Cam ka Rwot me otieno, poore di idarunu jo icegun.

³⁴Ka ngatamoro kec oneko, wek ecam i ture, tetekeny kur ngol ne wu kop kame icokerenu. I kom kope apat abino mino wu gikame poore aluba kame abino.