Read kumam 1 Jokorinti 14 Bible Online

1 Jokorinti 14 - kumam bible

1 Jokorinti 14

¹Aso, canenu pi bedo kede amara, doko ketunu cunyu pi udo giamia me Tipo, singo twatwal giamia me imurai.

²Pien ngat kame tie kede giamia me yamo i leb anyen likame yamo kede jo, do eyamo kede Rubanga; pien likame tie ngat kame niang kop mere; en eyamo gi komungere pi twer me Tipo.

³Do ngat kame murao, yamo kede jo pi mino yei gi doko tek, kede supo cuny gi, kede kweno cuny gi.

⁴Ngat kame tie kede giamia me yamo i leb anyen gero yei mere kene, do ngat kame murao gero yei me ekodet me jokirisito.

⁵Aso, ango amito ne wun dedede yamo i leb anyen, do akalamo mere, ango amito ne wun murao. Ngat kame murao pire tek kalamo ngat kame yamo i leb anyen, kwanyo ka ngatamoro ogonyo dwong me kop kame en eyamo, tetekeny eger ekodet me jokirisito.

⁶Aso, imiegu kede amiegu na, likame tie bero moro kame iudunu kibuta ka abino butu di ayamo i leb anyen, kwanyo kenekene ka akelo ne wu kop kame Rubanga onyuto na, arabo ngec, arabo imurai, amoto pwony moro.

⁷Ka tum, gi kalikame kuo, bala nat bilo arabo adungu, di likame kiko kok kede dwan kame pokere, dano twero ngeno gikame kotie gono arabo kuto benyo?

⁸Kede ka agwara me yi likame okok kede dwan kame niangere, ngai kame bino iikere pi ot i yi?

⁹Etie kamanono kede wuda; ka itiunu kede giamia me yamo i leb anyen di ikounu waco kop moro kalikame niangere, dano bino ngeno gikame itienu waco benyo? Pien kop kame iyamo udo kei i wi yamo.

¹⁰Ateteni leb atot tie i piny, do likame tie acel moro kame li kede dwong mere.

¹¹Do ka ango likame angeo leb kame kotie yamo, udo ango atie ngakumbor but ngat kame tie yamo nono, doko eda etie ngakumbor buta.

¹²Etie kamanono kede wuda; bala kame cunyu mito kede giamia me Tipo, akalamo mere canenu pi tic kede giamia kame gero ekodet me jokirisito.

¹³Pi mano, ngat kame tie kede giamia me yamo i leb anyen poore kwano Rubanga pi mino twer me gonyo dwong mere.

¹⁴Pien ka ango alego di ayamo i leb anyen, tipo na en kame lego do tam na li kiye.

¹⁵Nan do atim benyo? Abino lego i tipo na, do abino lego kede tam na da; abino wero wer me pako Rubanga i tipo na, doko abino wer kede tam na da.

¹⁶Aso ka likame kamano, ka in imio pwoc but Rubanga i tipo ni kenekene, dano apat kame tie i cokere kede wu, kame li kede giamia me niang kede me gonyo leb anyen, bino waco be “Amen” benyo do di likame en engeo gikame in itie waco i ilega ni me pwoc nono?

¹⁷Pien in iromo mino pwoc kiber, do udo likame ikonyo kuo me cuny dano ocelu.

¹⁸Ango apwoyo Rubanga pien ango ayamo i leb anyen kalamo wun dedede;

¹⁹do i cokere me jokirisito, tikatika ayam kope kany kame tam na niang, pi pwonyo jo icegun, akaka yamo kope tutumia tomon i leb anyen.

²⁰Imiegu kede amiegu na, kur ibedunu bala idwe i tam wu, akaka manono bedunu bala imukerun kame tie abongo gikarac moro, kede bedunu jo kocato i tam wu.

²¹Kowandiko iwandik kacil be, “Kibut jo kame yamo leb anyen, kede i dog jokumbor abino yamo kede jo na, doko akadi atim kamano da, likame kibino winya.”

²²Aso, yamo i leb anyen obedo gianena but jo kalikame oyei Kirisito, likame ne jokirisito. Do giamia me imurai likame tie pi jo kalikame oyei Kirisito, do pi jokirisito.

²³Aso, ka ekodet me jokirisito lung ocokere karacel, di jo dedede oko donyo yamo i leb anyen, di do jo apat arabo jo kalikame yei Kirisito oko bino kanono, mam kibino waco be wun ipounu?

²⁴Do ka jo dedede omurao, di ngatamoro kalikame yei Kirisito arabo dano apat oko bino, jo dedede bino mine engeo dub mere, kede kope dedede kame ewinyo bino ngolo ne kop,

²⁵di oko bino woto mung me cunye kakaler. Mano bino mine eriondiko piny pi woro Rubanga, di etuco be, “Ateteni Rubanga tie i diere wu kan.”

²⁶Jokirisito jowota, nyo do kame poore atima? Kame icokerenu karacel, dano acelacel tie kede gimoro; moro tie kede wer, moro tie kede pwony, moro tie kede kop kame Rubanga onyuto ne, moro yamo i leb anyen amoto egonyo kop kame koyamo i leb anyen. Miero itimunu gi dedede pi gero ekodet me jokirisito.

²⁷Ka dano moro yamo i leb anyen, wek jo are, arabo jo kalikame kalamo adek en kame yami, doko kiyami di kilubere aluba, di ngatamoro gonyo.

²⁸Do ka ngat kame gonyo likame tie, poore gin kilingi di kiko yamo but gi ken gi kede but Rubanga.

²⁹Wek inabin are arabo adek en kame yami, di jo icegun pimo kop kame gin kiyamo.

³⁰Do ka gianyuta moro oneeno ne ngatamoro kame tie bedo kanono, wek dano me agege kame oudo tie yamo ber kong lingi.

³¹Pien wun dedede itwerunu mino ikwenyar me kop ka Rubanga, di itimunu acelacel, tetekeny jo dedede ud niang di gin dedede kiko udo asupacuny.

³²Giamia me imurai tie i loc me inabin,

³³pien Rubanga likame obedo Rubanga me atotolun, do en Rubanga me mulem. Bala kame etie kede i ikodeta dedede me jokacil,

³⁴mon poore ling i kacokere. Pien likame koyei ne gi yamo, do miero kibed i dud loc bala kame Iswil da waco.

³⁵Ka tie gimoro kame kimito ngeno, wek kidok penyo cuog gi i miere. Pien etie gi me lewic pi dako yamo i cokere me jokirisito.

³⁶Benyo, iparunu be kop ka Rubanga owok kibutu arabo etuno butun kenekene?

³⁷Ka ngatamoro paro be en ebedo enabi arabo etie kede twer me Tipo, miero en engei be gikame ango atie wandiko butu Rwot en kame ociko.

³⁸Ka ngatamoro likame oketo tam mere iye, kur iketunu tam wu i kome.

³⁹Aso, imiegu kede amiegu na, bedunu kede cuny me mito imurai, do kur igengunu yamo i leb anyen;

⁴⁰do miero itimunu gi dedede kiber di ilubunu yore kame poore.