Read kumam 1 Jokorinti 2 Bible Online

1 Jokorinti 2 - kumam bible

1 Jokorinti 2

¹Imiegu kede amiegu na, kakame oudo abino kede butu pi tatamo ne wu mung me ateni ka Rubanga, likame oudo abino kede yamo amit, arabo kede rieko.

²Pien oudo bin amoko tam na pi weko ngeno gi dedede i diere wu, kwanyo kenekene Yesu Kirisito, ngat kame koguro i kom musalaba.

³Ango ako bedo kede wu di agoro, di atie kede lworo kede mielkom;

⁴doko yamo na kede kop kame oudo apwonyo likame bin amio kede rieko kame wao tam wu, do amio kede gikame nyuto twer me Tipo ka Rubanga,

⁵tetekeny yei wu kur cungi i rieko ka dano do ecungi i kom twer ka Rubanga.

⁶Akadi kamanono da, wan opwonyo kop me rieko but jo ocato i yei, bed bala en likame ebedo rieko me piny kan, arabo rieko me jopug me piny kan, rieko kame bino doko li.

⁷Do wan opwonyo rieko ka Rubanga, rieko komungere kede kokanere, kame Rubanga omoko riki sek di pwodi likame ecweo piny pi mino wa udo deyo.

⁸Likame tie ngapug moro me piny kan kame oko niang iye: pien ka koto oudo kiniang, koto likame kiguro Rwot me deyo.

⁹Do bala kame kowandiko be, “Gikame wang moro likame pwodi oneno, akadi yit moro da likame pwodi owinyo, akadi ngatamoro da pwodi likame otamo pire, gi nono en kame Rubanga otieko iiko ne jo kame mare.”

¹⁰Rubanga omio Tipo Kacil onyuto ne wa gi nono. Pien Tipo Kacil mo gi dedede, akadi kakatut me tam ka Rubanga.

¹¹Ngai kame ngeo tam me dano kwanyo tipo mere kame tie i en? Kamanono da likame tie ngat kame ngeo tam ka Rubanga kwanyo Tipo ka Rubanga.

¹²Wan likame ogamunu tipo me piny kan do wan ogamunu Tipo kame wok kibut Rubanga, me wek oniangunu i kom giamia kame Rubanga omio wa.

¹³Manoni en gikame wan opwonyo, likame kede kope kame kopwonyo kede rieko ka dano, do kede kope kame Tipo en kame opwonyo, di ogonyo kope me cuny but jo kame tie kede Tipo.

¹⁴Dano kame li kede Tipo ka Rubanga likame twero udo giamia me Tipo ka Rubanga, pien gin kitie gi me mingo kibute, doko likame etwero niang i kom gi, pien dano kame tie kede Tipo ka Rubanga en kame twero poko bero gi.

¹⁵Dano kame tie kede Tipo ka Rubanga, en kame twero ngeno poko bero me gi dedede, do likame tie ngat kame twero ngeno poko bero arabo raco meren.

¹⁶Bala kame iwandik kacil waco be, “Ngai kame ngeo tam ka Rwot? Ngai kame twero mine tam?” Do wan otie kede tam ka Kirisito.