Read kumam 1 Jokorinti 4 Bible Online

1 Jokorinti 4 - kumam bible

1 Jokorinti 4

¹Poore iterunu wa bala jotic ka Kirisito kede jogwok me mung ka Rubanga.

²Gikame mitere kibut jogwok en ine be, gin kipoore bedo jo kame genere.

³Do kibuta, ango likame aparo ka wun amoto ekiko moro me jo ongolo na kop; akadi ango da likame angolo kop i koma kena.

⁴Cunya likame ngeo gimoro arac kame atimo, cite likame do be ango ali kede kop moro. Rwot en kame ngolo nango kop.

⁵Pi mano, kur ingolunu kop ne ngatamoro di pwodi likame kare otuno, di pwodi Rwot likame odwogo. En ebino woto i lero gikame nan kokano i colo, doko ebino mino iik kame tie i cuny jo ngere. Di do dano acelacel ko bino udo pwoc kibut Rubanga.

⁶Imiegu kede amiegu na, kope nogi ango ayamo di adwoko i koma kede i kom Apolo pi bero wu, tetekeny isiaonu kibut wan dwong me kop kame kowandiko be, “Kur ikalamo gikame kowandiko,” tetekeny ngatamoro kibutu kur wakere pi ngat acel di eko cano ngat ocelu.

⁷Kara ngai komii ibedo pat kede jo icegun? Nyo kame in itie kede kalikame komii amia? Aso ka komii amia, pinyo komio iwakere bala oudo likame ebedo giamia?

⁸Wun itiekunu udo gi dedede kame imitunu! Itiekunu baro! Itiekunu doko abakai abongo kony kame yai kibut wa. Cunya oudo mito be koto idokunu abakai, tetekeny koto wada obedo abakai kede wu.

⁹Pien ango atamo be Rubanga onyuto wan joor bala jo kocoko, bala jo kame kongolo ne gi kop me to; pien wan otieko doko gikame piny lung ngio, ne imalaikan kede ne jo da.

¹⁰Wan obedo jomingo pir Kirisito, do i Kirisito wun iriekunu. Wan ogoro, do wun itekunu. Jo mio wun wor do wan kocao wa.

¹¹Tuno iesawa noni, kec kede orio neko wa, likame otie kede igoen abeco, jo bungo wa doko likame otie kede miere,

¹²wan ocane kitek, di otio kede cing wa. Kame koyeto wa, wan omio winyo; kame kotidilo wa, wan okanyakino;

¹³kame kodubo nying wa, wan oyamo kede dwan me mwolo. Tuno tin wan otieko doko bala yugi me piny, cete kame kojililo kede gi dedede.

¹⁴Ango likame atie wandiko man pi mino wu lewic, do pi pwonyo wu bala idwe na kame amaro.

¹⁵Pien bed bala wun itienu kede jo kalikame marere, kame telo wu i Kirisito, likame itienu kede papi wu kame tot. Pien ango oudo adoko papa wu i Kirisito Yesu, pien akelo ne wu ejiri.

¹⁶Pi mano, ango abako doga butu be, lubunu ekite na.

¹⁷Nan ango atie cwano Temeseo butu pi kop noni, en ebedo atin na kame amaro, kede kame genere i Rwot. En ebino mino wu iyutununu yote na i Kirisito Yesu, bala kame ango abedo pwonyo gi kede i kabedo dedede i ikodeta dedede me jokirisito.

¹⁸Do jo mogo kibutu otieko doko joewaka, pien oudo kiparo be ango likame ayaro bino butu.

¹⁹Do ka Rwot oyei, ango ayaro bino butu i kare iyapiyapi, likame pi niang kop kame jo kame wakere nogo yamo kenekene, do amito da ngeno twer kame kitie kede.

²⁰Pien Ajakanut ka Rubanga likame obedo yamo kenekene, do ebedo da gikame tie kede twer.

²¹Imitunu mene? Abin butu kede popo, arabo kede amara kede cuny me mwolo?