Read kumam 1 Jokorinti 6 Bible Online

1 Jokorinti 6 - kumam bible

1 Jokorinti 6

¹Kame ngatamoro kikom wu tie kede kop moro arac kede ngakirisito ocelu, pinyo kame mio en edire ot pide i nyim jo kalikame woro Rubanga, akaka ot pide i nyim jokacil?

²Mam ingeunu be jokacil bino ngolo kop ne piny? Aso ka wun ibinunu ngolo kop ne piny, benyo, likame do itwerunu ngolo kope atitino i ekiko?

³Mam ingeunu be wan obinunu ngolo kop ne imalaikan? Aso ka tie kamanono, wan otwerunu ngolo kop kame makere kede kuo me i kare ni kalamo.

⁴Pi mano, ka itienu kede pido, pinyo kame mio iterunu gi but jo kame ekodet me jokirisito likame mio dwongo?

⁵Awaco man me wek lewic maku. Iparunu be likame tie ngatamoro kame riek kikom wu, kame twero poko jokirisito are kame tie kede atwomutwomun?

⁶Do kibutun, ngakirisito acel pido ocelu i nyim jo kalikame oyei Kirisito.

⁷Bedo kede pido i diere wu kenu kenu nyuto be kop do otieko bwono wu. Pinyo kame mio likame ikanyakinunu raco kame kotimo ne wu? Pinyo kame mio likame ijalunu kokwalo wu?

⁸Do wun kikomu itimunu raco, doko ikwalunu, itimunu kamanono kiton ne jokirisito wadu da.

⁹Mam ingeunu be jo kame timo gikareco, Ajakanut ka Rubanga likame bino doko mergi? Kur ngalu! Pien jocaro, arabo jo kame woro cal jwogi, joadote, cuo kame buto kede cuo wad gi,

¹⁰jokuwo, arabo joeranga, joamera, jo kame dubo nying jo, amoto joyak, Ajakanut ka Rubanga likame bino doko mergi.

¹¹Jo mogo kikom wu oudo cal kamagonogo. Do wun kotieko lwoko dub wu, kotieko lonyo wu, kotieko mino wu idokunu jo kopoore pi nying Rwot Yesu Kirisito kede pi Tipo ka Rubanga wa.

¹²“Koyei na timo gi dedede,” do likame gi dedede konya. Arabo, “Koyei na timo gi dedede,” do likame gimoro bino mina abedo epasoit mere.

¹³“Cam tie pi yic, yic da tie pi cam,” ebo, do Rubanga bino jiko gin dedede. Kom wa likame tie pi timo caro, do pi tic ne Rwot, doko Rwot en kame tie kede loc i kom wa.

¹⁴Rubanga oyaruno Rwot, doko ebino yaruno wada kede twer mere.

¹⁵Mam ingeunu be komu obedo adulion me kom Kirisito? Pi mano, iparunu be ango akwany adul me kom Kirisito di ako mine edoki adul me kom malaya? Likame twerere!

¹⁶Mam ingeunu be ngat kame ribere kede malaya edoko kom acel kede en? Pien kowandiko be, “Gin jo are nogo kibino doko kom acel.”

¹⁷Do ngat kame ribakin kede Rwot, en edoko acel kede en i cunye.

¹⁸Wekunu caro. Dub dedede kame dano timo likame timere i kome; do ngat kame timo caro dubo i kome kene.

¹⁹Mam ingeunu be komu obedo tempulo me Tipo Kacil kame tie i komu, Tipo kame Rubanga omio wu? Wun likame megu kenu.

²⁰Pien wun kowilo wu kede wel adwong; pi mano, tiunu kede komu pi mino Rubanga deyo.