Read kumam 1 Jokorinti 7 Bible Online

1 Jokorinti 7 - kumam bible

1 Jokorinti 7

¹Nan do i kom kop kame mako gikame iwandikunu, eber ne icuo weko buto kede dako.

²Do pi gengo atama me caro, poore icuo acelacel bed tie kede dako mere kame make, bobo dako acelacel da poore bed tie kede cware kame make.

³Icuo poore tieko mit me buto ka dako mere, doko dako da poore timo kamanono ne cware.

⁴Pien dako likame tie kede akarunikin i kome kene, do cware en kame tie kede akarunikin iye; kamanono da icuo likame tie kede akarunikin i kome kene, do dako mere en kame tie kede akarunikin iye.

⁵Kur itwon ngawoti komi, kwanyo amoto ka iwinyerenu pi timo kamanono pi kare moro acecek, me wek imiunu kare wu i ilega; do i cen mere di bobo ikounu dok iye. Mano bino mino itwerunu dino mit me komu di Sitani likame ko karuno tamo wu.

⁶Ango atie waco ne wu man bala gikame ango ayei ne wu timo, do likame bala cik.

⁷Ango oudo amito be koto jo dedede bed bala ango. Do dano acelacel tie kede giamia mere kame Rubanga omie, ngat acelacel tie kede giamia me epone apat.

⁸Aso ango awaco ne jo kalikame onyomere kede ne apuserun be, eber ne gin dong di likame kinyomere bala kite kame ango atie kede.

⁹Do ka likame gin kitwero dino mit me kom gi, poore kinyomere. Pien eber nyomere kalamo dire kanyo mit me kom.

¹⁰Amio cik but jo konyomere, likame ango en kame aciko gi, do Rwot en kame ciko gi be, dako kur pokere kede cware

¹¹(Do ka en eko pokere kede cware, miero edong di likame enyomere, aso ka li, edok but cware), kede icuo da miero kur pokere kede dako mere.

¹²But jo icegun ango ayamo kaman, ango i koma likame Rwot, be, ka ngakirisito moro tie kede dako mere kalikame oyei Kirisito, di dako no oko yei bedo kede, miero kur epokere kede.

¹³Ka dako ngakirisito moro tie kede icuo kalikame oyei Kirisito, di icuo nono oko yei bedo kede, miero kur epokere kede.

¹⁴Pien icuo kalikame oyei Kirisito doko dano kolonyere pi dako mere, doko da dako kalikame oyei Kirisito doko dano kolonyere pi cware. Ka koto likame kamanono, koto idwe gi oudo likame bedo jo kolonyere, do bala kame etie kede, gin kitie jokacil.

¹⁵Do ka ngat acel kalikame oyei Kirisito mito pokere, weke epokere; iepone me kop kame cal kamanono, ngakirisito, icuo arabo dako, likame tie kede adiadia moro i nyom gi, pien Rubanga olwongo wa pi bedo i mulem.

¹⁶Dako, ngei kiber be cengemogo ibino lako cwari. Icuo, ngei kiber be cengemogo ibino lako dako ni.

¹⁷Kenekene wek ngat acelacel meede lubo ekite me kuo kame Rwot Yesu omie, kuo kame Rubanga bin olwonge di etie iye. Man en gikame ango aciko ne ikodeta dedede me jokirisito.

¹⁸Benyo, tie ngatamoro kame oudo kokepo i kare kame kolwonge kede? Kur emoi kwanyo tenge alama me kepere. Benyo, tie ngatamoro kame oudo likame kokepo i kare kame kolwonge kede? Kur emit kepere.

¹⁹Pien kepere arabo bedo abongo kepere kony mere likame tie; gikame pire tek en lubo cik ka Rubanga.

²⁰Poore dano acelacel dong iekite me kuo kame bin kolwonge di etie iye.

²¹Benyo, oudo in itie epasoit i kare kame kolwongi kede? Kur ipari. Do ka itwero udo epone me gonyere, tim kamanono.

²²Pien epasoit kame Rwot olwongo obedo dano kogonyere ka Rwot. Kamanono da, dano kame oudo tie i akarunikin mere kene i kare kame kolwonge kede obedo epasoit ka Kirisito.

²³Wun kowilo wu kede wel adwong; pi mano, kur idokunu ipasoi me jo.

²⁴Aso imiegu kede amiegu na, ngat acelacel poore dong i nyim Rubanga i kite me kuo kame bin kolwonge di etie iye.

²⁵Nan do kop kame mako jo kalikame pwodi onyomere, ango likame atie kede cik kame Rwot omio, do ango amio tam na bala ngat kame genere pi cuny me kisa ka Rwot.

²⁶Ango atamo be, pi peko kame tie bino, eber ne in dong bedo bala kite kame itie kede.

²⁷Mam in itie kede dako? Kur do iriame. Mam in likame inyomere? Kur do inyomere.

²⁸Do ka inyomere, udo likame idubo, kede ka dako kalikame pwodi konyomo oko yei nyomere, udo likame edubo. Do jo kame onyomere bino bedo kede peko me piny kan, kame ango amito gwoko wu kur ibeunu iye.

²⁹Imiegu kede amiegu na, gikame ango atie waco en ine be, kare kame koiko otieko doko iyapiyapi; cako nan, wek jo kame tie kede mon kibed bala kili kede.

³⁰Doko jo kame tie koko kibed bala likame kitie koko, kede jo kame tie kilel, kibed bala likame kitie kilel. Doko jo kame wilo jame, kibed bala kili kede gimoro,

³¹kede jo kame tio kede jame me piny kan, kibed bala likame ginogo omao kare gi. Pien piny, i kite kame nan etie kede noni, oyapuno jik.

³²Ango amito ibedunu abongo par moro. Icuo kalikame onyomere keto par mere i kom kop ka Rwot, iepone me yomo cuny Rwot;

³³do icuo konyomere keto par mere i kom kope me piny kan, iepone me yomo cuny dako mere,

³⁴tam mere udo opokere. Dako kalikame pwodi onyomere, arabo nyako kalikame pwodi ngeo icuo, keto par mere i kop ka Rwot, emito mino kome kede cunye lung but Rwot; do dako konyomere keto par mere i kom kop me piny kan, iepone me yomo cuny cware.

³⁵Ango awaco man pi bero wu, likame pi gengo wu i yore moro, do pien ango amito ibedunu iepone aber kede imiunu kuo wu lung but Rwot.

³⁶Ka ngatamoro paro be en etie kwina bedo kede nyako kame en enero, ka mit mere tek, bala kite kame epoore bedo kede kamanono da, wek enyomere bala kite kame emito kede, pien mano likame obedo dub.

³⁷Do ka ngatamoro otieko moko tam mere abongo adiadia moro, di edio mit mere, doko di etieko moko tam mere daro nyako mere kame enero, udo etimo gikaber.

³⁸Aso ngat kame nyomo nyako kame enero udo etimo ber; do ngat kalikame onyomere udo otimo gikaber kalamo.

³⁹Dako kame konyomo likame doko romo nyomere di pwodi cware kuo; do ka cware oto, en etwero nyomere kede ngatamoro kame cunye mito, kenekene miero ebed dano koyei Kirisito.

⁴⁰Do iekite kame ango aneno kede, dako no bino bedo kede yomcuny kame kalamo ka edong bala kite kame etie kede. Doko atamo be ango da atie kede Tipo ka Rubanga.