Read kumam 1 Jokorinti 8 Bible Online

1 Jokorinti 8 - kumam bible

1 Jokorinti 8

¹Nan do, i kom kop kame mako gikame koyalo ne cal jwogi, wan ongeunu be “wan dedede otienu kede ngec.” Ngec kacal kamanono kelo ewaka, do amara gero yei.

²Ka ngatamoro tamo be en engeo gimoro, likame udo engeo bala kite kame oudo epoore ngeno kede.

³Do ka dano maro Rubanga, dano nono Rubanga ngeo.

⁴Aso i kom kop kame mako camo cam kame koyalo ne cal jwogi, wan ongeunu be “cal jwogi cungo pi gikame li,” kede be “likame tie Rubanga moro ace kwanyo Rubanga acel kenekene.”

⁵Pien bed bala tie gimogo kame kolwongo be rubangan i malo arabo i lobo, bala kame i ateteni rubangan tie kede, karacel kede rwode atot,

⁶do kibut wan Rubanga tie acel, en Papa, ngat kame ocweo gi dedede doko wan okuo pire, kede Rwot acel, en Yesu Kirisito, kame mio jamini dedede bedo tie, doko wan okuo pi en.

⁷Do likame jo dedede tie kede ngec noni. Do jo mogo otieko nao kede kop me cal jwogi, omio tuno tin ka gin kicamo cam kame cal kamanono, pwodi kitamo be ebedo cam me cal jwogi; pien kite kame ngec me cuny gi goro kede, mio gin kiparo be cam nono munao gi.

⁸Cam likame bino mino wa odoko jo kame beco i nyim Rubanga. Ka likame ocamo, likame tie gimoro kame okei, doko ka ocamo, likame tie gimoro aber kame oudo.

⁹Do gwokerenu me wek kur twero wu noni lokere dok gikame reto jo kame yei gi goro.

¹⁰Pien ka ngatamoro kame ngec me cunye goro, oneno in dano kame itie kede ngec di icamo i tempulo me cal jwogi, iparo be likame etwero udo nwangcuny di eko camo cam kame koyalo ne rubangan?

¹¹Aso, ngec nin ko bino dubo dano kame yei mere goro, ngakirisito wadu kame Kirisito oto pire.

¹²Iepone acel noni da, ka idubo but jokirisito wadu, di iko mino awanon i kom ngec agoro me cuny gi, udo idubo but Kirisito.

¹³Pi mano, ka cam en kame mio gin kipoto, likame abino camo ringo, tetekeny kur ami ngatamoro kikom gi poti.