Read kumam 2 Jokorinti 12 Bible Online

2 Jokorinti 12 - kumam bible

2 Jokorinti 12

¹Miero ango awakere; likame tie gimoro aber kame udere kiye, do ango abino meede di awaco kop i kom gikame Rwot onyuto na.

²Ango angeo icuo moro kame tie i Kirisito, kame oudo kotingo oko tero i malo me adek, mwakini tomon kiwie ongwon cen, ango likame angeo arabo etimere i kome amoto likame i kome, Rubanga en kame ngeo.

³Doko ango angeo be kotero icuo noni, arabo kede kome amoto likame kede kome, ango likame angeo, do Rubanga en kame ngeo,

⁴kotere i paradis di en eko winyo kop kalikame kopoore waco, kalikame koyei ne ngatamoro nyogao yamo.

⁵Aso ango abino wakere pi dano noni, do likame pira, kwanyo abino wakere pi goro na.

⁶Akadi koto di ango amito wakere, likame abino bedo ngamingo, pien udo atie yamo kop me ateni. Do likame ango abino timo kamanono, tetekeny kur ngatamoro bed kede tam amalo i koma kalamo gikame eneno kede kame ewinyo kibuta.

⁷Do pi mino kur abed kede tingere pi gianyuta atot ka Rubanga kame aneno, oko mino koma lito adwong, kame obedo bala aor ka Sitani, pi tidilo ango di eko genga tingere.

⁸Ango oudo abedo ngangao Rwot tien adek pi kwanyo gi noni ki koma.

⁹Do en eko dwoko na be, “Kisa nango romi, pien kame in igoro, twer nango dwong kalamo.” Ango do abino meede ameda wakere kede yomcuny pi goro na, tetekeny twer ka Kirisito bed i koma.

¹⁰Aso pi Kirisito, ango apwoyo goro dedede, ayet, kuo atek, itidil kede peko; pien kame ango agoro, udo atek.

¹¹Ango angamingo! Wun en idianu iye, pien wun en kame oudo ipoorenu nyuto pwoc wu pira. Pien likame ango atie piny me jo kame wun ilwongunu be joor adongodongo nogo, akadi di ango gimoro li.

¹²Bin kotimo gikame nyuto ngaor me ateni i diere wu kede dire atek, kede gianena, kede gi me isuur, kede tice me twer.

¹³Pien nyo kame oudo kotero wu iye kirac kalamo ikodeta apat me jokirisito, kwanyo kenekene be ango likame amio wu yeno peko na? Sasirunu ango pi raco na noni!

¹⁴Nan ango ine, atieko iikere me bino butu tien me adek. Likame abino mino wu yeno peko na, pien likame ango amo gikame itienu kede, do ango amo wun nogo; pien idwe likame poore kano mono pi jonywal gi, do jonywal en kame poore timo kamanono pi idwe gi.

¹⁵Cunya bino bedo yom twatwal pi mino gi dedede kame atie kede, kiton ango kikoma da, pi kuo me cunyu. Ka ango amaro wu kalamo, benyo, amara wu buta do bed titidi?

¹⁶Aso oterunu kamano be, ango likame bin amio wu yeno peko na. Do akadi kamanono da, wun iwacunu be oudo ango atio kede rieko di ako ngangalo wu pi dino wu.

¹⁷Benyo, tie ngatamoro kikom jo kame oudo aoro butu kame oko mina adio wu?

¹⁸Ango oudo akwao cuny Tito pi ot, di ako cwano omin wa i Kirisito oupere kede. Benyo, bin Tito oko dino wu? Mam wan oudo otio kede cuny acel? Mam wan oudo otio iepone acel?

¹⁹Benyo, oudo wun ibedunu paro pi kare go dedede be wan otie jurere kenwa i nyimu? Wan obedo yamo i nyim Rubanga i Kirisito. Jo na kame amaro, gi dedede kame wan otimo, otimo gi pi gero yei wu.

²⁰Pien ango atie kede lworo be cengemogo aromo bino di ako udo itienu iekite kalikame ango amito, kede da be cengemogo wuda iromunu udo di ango atie iekite kalikame wuda imitunu. Ango atie kede lworo be cengemogo itienu kede lok, nyeko, gero, woro, dubo nying jo, akwot, ewaka, kede anyonyobun.

²¹Ango atie kede lworo be, kame adwogo butu, Rubanga na romo dwoka piny i nyimu, di ako romo tururo pi jo atot kame otimo dub i kare okato, kalikame pwodi oswilaro ki tim gi me emuna, caro, kede mit me lewic.