Read kumam 2 Jokorinti 2 Bible Online

2 Jokorinti 2 - kumam bible

2 Jokorinti 2

¹Pi mano, ango ako moko tam na be likame bobo abino dwogo welao wu, tetekeny kur awang cunyu.

²Pien ka ango awango cunyu, alu apat kede jo kame ango awango cuny gi nogo kame bobo bino mina yomcuny?

³Manono en komio ango awandiko baluwa kamano, me wek ka ango abino, kur aud wangcuny kibut jo kame koto omia kilel. Pien ango ageno kitek be yomcuny nango kelo ne wun dedede yomcuny.

⁴Pien ango awandiko ne wu baluwa kede iturur kede cwercuny di pige wanga cwer; likame pi wango cunyu, do pi mino wu ngeno amara adwong kame ango atie kede butu.

⁵Do ka ngatamoro owango cuny dano moro, udo likame ewango cuny ango, do abongo medo iye munyo, twatwal mere udo etimo ne wun dedede.

⁶Alola kame jo atot kikom wu omio akodi dano nono rome.

⁷Aso, nan do akaka manono, poore isasirunu en di ikounu kweno cunye tetekeny kur cwercuny bwone.

⁸Aso, ango akwao wu pi medo nyuto ne be wun imarenu.

⁹Kop noni en komio oudo awandiko ne wu baluwa, pien oudo amito tamo wu, kede ngeno ka ilubunu gi dedede kame awaco ne wu.

¹⁰Kame wun isasirunu ngatamoro, ango da asasiro en. Gikame ango atieko sasiro dano iye, ka di ateteni atieko sasiro ngatamoro pi gimoro, udo atimo piru i nyim Kirisito.

¹¹Wan otimo kaman tetekeny kur Sitani ud yongayo me ngalo wa; pien likame wan okwianu iik mege.

¹²I kare kame oudo abino kede Teroa pi tuco ejiri ka Kirisito, Rwot oudo oyabo na yongayo me timo tic;

¹³do wia oko dubere pien oudo likame audo omina Tito kuno. Aso ango ako moto gi di ako yai aoto Makedonia.

¹⁴Do opwounu Rubanga ngat kame nakanaka telo wa i Kirisito di osiritunu pi nyuto be en elo. Rubanga tio kede wan pi nyano ngec i kom Kirisito kabedo dedede bala ngwece kame kur.

¹⁵Pien wan ocal bala giayala kame ngwe kur kame Kirisito mio but Rubanga, kame ngwece mere sarakin but jo kame Rubanga tie lako, kede but jo kame tie rwenyo.

¹⁶But jo kame tie rwenyo, en ebedo ngwece atulutul kame kelo to; do but jo kame Rubanga tie lako, en ebedo ngwece akur kame kelo kuo. Ngai kame twero timo gi nogi?

¹⁷Pien wan likame ocal bala jo ace atot, jo kame tero kop ka Rubanga pi ot cato; do pien Rubanga en ooro wa, wan oyamo kop me ateni i Kirisito i nyim Rubanga.