Read kumam 2 Jokorinti 3 Bible Online

2 Jokorinti 3 - kumam bible

2 Jokorinti 3

¹Benyo, wan bobo do otie pwore ken wa? Arabo, iparunu be wan omito baluwa kame kowandiko butu kame pwoyo wa, amoto ogam baluwa kibutu kame pwoyo wa, bala kame jo mogo timo?

²Wun kikomu ibedunu baluwa kame pwoyo wan, kame kowandiko i cuny wa, me wek jo dedede ngei, doko kisomi.

³Doko wun inyutunu be wun ibedunu baluwa ka Kirisito kame ecwao wan kede, baluwa kalikame kowandiko kede bwino, do kede Tipo ka Rubanga kakuo, doko likame kowandiko en i kidi, do kowandiko en i cuny jo.

⁴Manono en gen atek kame wan otie kede but Rubanga pi Kirisito.

⁵Likame wan otie kede gimoro kame romo mino wan owaco be otwero timo gini kede twer wa; twer kame wan otie kede owok kibut Rubanga.

⁶En ngat kame emio wan twer me bedo jotic me isikan kanyen, kalikame owok pi Iswil kame kowandiko awandik, do pi Tipo; pien Iswil kame kowandiko neko, do Tipo mio kuo.

⁷Ka riki inyukutan me Iswil kame kowandiko i kidi, kame kelo to, obino kede deyo kame rom kano, kame oko mino jo me Isirael likame oko twero ngino wang Musa pi rieny mere, bed bala oudo etie pi kare acecek,

⁸mam do tic me Tipo bino bino kede deyo kame kalamo?

⁹Pien ka gikame mio ongolo kop i wi jo oudo tie kede deyo; mam do gikame kelo poore tie kede deyo kame kalamo?

¹⁰Ateteni pi kop noni, gikame oudo tie kede deyo, odoko li kede deyo atwal pi deyo kame kalamo en.

¹¹Pien ka gikame oudo tie pi kare acecek obino kede deyo, gikame bedo nakanaka miero do bed kede deyo kame kalamo.

¹²Aso, pi kite kame otienu kede gen kame cal kamano, wan oyamunu abongo lworo,

¹³likame bala Musa ngat kame bin oumo nyime tetekeny kur jo me Isirael nen ekite kame meny mere rwenyo kede.

¹⁴Do oudo koumo tam gi. Ateteni tuno tin kame kitie somo itabun me isikan kacon, udo gikame umo tam gi nono pwodi tie, pien gikame umo tam gi nono twero kwanyere kenekene kame gin kitie i Kirisito.

¹⁵Ateteni, kiton tuno tin kame kotie somo Iswil ka Musa, gikame umo nono pwodi ogalao tam gi;

¹⁶do kame dano olokere but Rwot, kokwanyo gikame umo tam mere.

¹⁷Aso Rwot en Tipo; doko kakame Tipo ka Rwot tie iye, gonyere udo tie iye.

¹⁸Doko wanunu dedede kame kotieko kwanyo gikame galao nyim wa, wan jo kame onyutunu deyo ka Rwot, kotie loko wa i cal mere yai ki deyo tuno i deyo kame meede ameda, man Rwot kame obedo Tipo en kame timo.