Read kumam 2 Jokorinti 4 Bible Online

2 Jokorinti 4 - kumam bible

2 Jokorinti 4

¹Pi mano, wan likame okwanyo cuny wa ki tic noni, pien Rubanga en komio wa time pi kisa mere.

²Wan otieko dagi gi dedede me lewic kame kotimo i mung; wan odagi tim me angalo arabo dwadwanyo kop ka Rubanga. Do wan opwonyo kop me ateni i lero i nyim Rubanga, di dano acelacel ko ngeno i cunye be wan jo kame beco.

³Doko akadi ka ejiri kame wan otuco oumere, en eumere ne jo kame tie rwenyo atwal.

⁴Gin jo kalikame kiyei Kirisito, pien rubanga me piny kan otieko umo tam gi tetekeny kur kinen lero kame wok kiye ejiri me deyo ka Kirisito, ngat kame cal acala kede Rubanga.

⁵Pien likame wan otatamo kop kame mako wan, do wan opwonyo be, Yesu Kirisito en Rwot; wan obedo jotic wun pire.

⁶Pien Rubanga kame owaco be, “Wek lero rieny ki colo,” Rubanga nono en kame orieny i cuny wa pi mino wa lero me ngec be deyo mere neeno i Yesu Kirisito.

⁷Do wan jo kame otie kede abar noni, ocal bala agune kame kocweo kede elupe. Manoni nyuto be Rubanga en kame tie kede twer kame kalamo dedede, do likame wan.

⁸Wan nakanaka komio wa oneno can iepone dedede do likame koridakino wa atwal atwala; wi wa cungo, do gen wa likame kwanyere;

⁹kotidilo wa, do Rubanga likame jalo wa; korereto wa, do wan oko yai bobo;

¹⁰wan nakanaka ooto kede to ka Yesu i kom wa, tetekeny kuo ka Yesu nyutere ki kom wa.

¹¹Pien i kare dedede me kuo wa, wan ojalere i to pi Yesu, tetekeny kuo mere nyutere i kom wa kame to nogi.

¹²Aso, to tie tic i kom wan, do kuo tie tic i kom wun.

¹³Do bala kame otienu kede cuny acel me yei, bala kame kowandiko be, “Ango oudo ayei omio ako yamo,” kamanono da wada oyei di oko yamo.

¹⁴Pien wan ongeo be, ngat koyaruno Rwot Yesu bino yaruno wada karacel kede Yesu, di eko bino tero wan karacel kede wu i nyime.

¹⁵Magi dedede tie piru, tetekeny bala kite kame kisa ka Rubanga tie meede ameda kede nyai but jo, wek emi pwoc kame jo mio meede di ko kelo ne Rubanga deyo.

¹⁶Aso wan likame okwanyo cuny wa. Akadi bed bala kom wa tie dubere momot, do ceng dedede kotie mino kuo wa me cuny doko nyen bobo.

¹⁷Pien can kame nataman wan otie neno tunutunu noni, tie iiko ne wa deyo adwong kalikame wacere, kame bedo nakanaka.

¹⁸Pien wan likame oketo tam wa i kom gikame neeno, do i kom gi kalikame neeno. Pien gikame neeno tie pi kare acecek, do gi kalikame neeno bedo nakanaka.