Read kumam 2 Jokorinti 6 Bible Online

2 Jokorinti 6 - kumam bible

2 Jokorinti 6

¹I tic wa karacel kede Rubanga, wan obako dog wa butu be, kur imiunu kisa kame iudunu kibut Rubanga bed gi me nono.

²Pien Rubanga owaco be, “I kare me timo bero ango ako winyo kwac ni; i ceng me alako, ango ako konyi.” Neni, nataman en esawa me Rubanga timo bero; tin en ceng me alako!

³Wan likame otie rire i yongayo ka ngatamoro, tetekeny kur ud raco moro i tic wa.

⁴Do bala jotic ka Rubanga, wan onyuto bero wa i yote dedede: di okanyakino can, peko, kede kuo atek.

⁵Wan kobungo wa, kotweo wa i otkol, ekodet me jo suro wa, otimo tic atek, likame onino, doko kec da neko wa.

⁶Doko da wan onyuto bero wa bala jotic ka Rubanga i cuny wa kame ber, i ngec, i dire, i mwolo, i bedo tie kede Tipo Kacil, kede i amara me ateni,

⁷i kope kame oyamo me ateni, kede i twer ka Rubanga. Wan otie kede poore bala gi me yi, me suro jokwor kede me gwoko kom wa ka kosuro wa.

⁸Cengemogo koworo wa arabo komio wa lewic; cengemogo koyeto wa arabo kopwoyo wa. Kotero wa bala joangalo do di wan oyamo kop me ateni;

⁹kotero wa bala jo kalikame kongeo do di kongeo wa kiber; kotero wa bala jo oto, do nenunu wan okuo. Bed bala komio wa alola, do likame koneko wa;

¹⁰akadi di cuny wa cwer, do wan olelo nakanaka; akadi di wan obedo jocan, do wan otie mino jo atot baro; akadi di wan oneeno bala oli kede gimoro, do wan otie kede gi dedede.

¹¹Wun Jokorinti, wan oyamo kede wu abongo mungo ne wu kop moro; cuny wa maro wu.

¹²Wan likame cuny wa weko maro wu, do wun en kame cunyu nonok i kom wan.

¹³Pi mano, ango ayamo kede wu bala idwe na; yabunu cunyu but wada.

¹⁴Kur inywakunu kede jo kalikame oyei Kirisito. Pien kite kopoore nywako kede turo iswil benyo? Arabo lero kede colo nywako benyo benyo?

¹⁵Winyere nyo kame tie i dierediere ka Kirisito kede Sitani? Arabo nyo kame dano koyei Kirisito nywako kede dano kalikame oyei Kirisito?

¹⁶Winyere nyo kame tie i dierediere me tempulo ka Rubanga kede cal jwogi? Pien wan otienu tempulo ka Rubanga kakuo; bala kame Rubanga owaco kede be, “Ango abino bedo i diere gi di aoto kiye, di ako bino bedo Rubanga gi, di gin kiko bino bedo jo na.”

¹⁷Pi mano, Rwot owaco be, “Yaunu tenge kibut gi, di ikounu pokere kede gi, doko kur imulunu gimoro kalikame cil; di ango ako bino gamo wu.

¹⁸Ango abino bedo Papa wu, di wun ikounu bino bedo awobe kede anyira na, man Rwot won Twer en kowaco.”